ဆၧမၩဆံၫ့ဎံၪဆၧဎူၫဆၧဎၩ့မိမၫရံၫအလိးအိၩအဂဲး

နံၪ့၂၀၂၂နံၪ့ လၩမ့ၫ၈ၥၫ့ အဂၫလၩ့၄နၩရံၫအခံၫ့နီၪ ဆၧမၩလၩမၩဖၩ့ ဆိၪဂ့ၩဆိၪဘွၩ ဆၧဎူၫဆၧဎၩ့မိမၫရံၫအလိးအိၩ လၧကၠဲၭလၭဆၧအီၪကီၪ့ႇ မကၠံၩကိၩ့တဝၫ့နီၪလီၫႉ လၧဆၧထံၪလၩ့ဒီၪလၩ့နီၪအဖၧၩ့ ဖိၪၥၪဆံၭဖိၪအဂၩ၆၀ဘျဲၪနီၪဆ့ မွဲဒိၭန့ဘၪ ဆၧဒူၩယၫ့စကရမဲၫတူၩနီၪလီၫႉ

လၧဆၧထံၪလၩ့ဒီၪလၩ့နီၪအဖၧၩ့ Fr.Henry Eikhlein စံၭဝ့ၫဒၪ “ကဂၫယီၩပဂဲၫဒၪလၩ့ဎိၭဘၪလိၭၥၭလၧ ကၠဲၭလၭဆၧအီၪကီၪ့ယီၩအကၠီၩ့ ယစံၭခိးစံၭတၩဘၪလီၫႉ ၦအထိးဆၧၫ့ပၧၩ လၧဆၧထိးဆၧၫ့မုၬလဖၪမွဲဝ့ၫဒၪ Fr.Zuzel, Sr လဖၪႇ ဆၧအီၪကီၪ့ခိၪနါလဖၪဒဲ ၦဆူၩနဲၩဖိၪၥံၪလဖၪဆ့ ယစံၭခိးစံၭတၩဘၪလီၫႉ မုကနံၩယီၩ ယနၪ့ ထၪ့ဘၪ Fr.ဂျေရုန်း, Fr.ဂျိးဇက်အောင်အောင်, Fr.ဖူးတကောဒဲ Fr.မၩ့ၥၭချံၫ့လဖၪနီၪလီၫႉအဝ့ၫၥံၪယီၩ မွဲၦအဂဲၫထဲၩ့ဖ့ၪလၫ့လၩ့ၥၭလၧဆၧ အလးယီၩနီၪလီၫႉ

ဒိၩ့ပၥံၫ့ဆၧအီၪကီၪ့ထၧၫ့ဒီၪ့ယၫအဖၧၩ့ ကၠဲၭလၭဆၧအီၪကီၪ့ယီၩနီၪ မွဲလၩ့ဆၫ့ဝ့ၫဒၪနီၪလီၫႉ ဘၪန့လဲၪနီၪဘိၭ ပအဲၪကွံၩယူၭယၪ့ဘၪ ၦလၧအလ့ၩဖီၩ့ခွံၬဒၪ ပၧၩ ၥၫ့ခိၪဒိၪဂၠိၫ့မၩ့ဆံၫ့ဎံၪနီၪ မွဲဂဲၫအီၪဖျဲၪထၪ့လၧ ကၠဲၭလၭဆၧအီၪကီၪ့ယီၩအဖၧၩ့နီၪလီၫႉ ဆၧအီၪကီၪ့အဆၧၥီၫ့ ဆၧၥၫ့အဖၧၩ့ စံၭထၬဝ့ၫ ကနံၪ့ယီၩနီၪ မွဲပကဘၪၥုၪ့ဎွံၪၥၭယီၫနီၪလီၫႉ ပဘၪၥၭမဲၪၥၭဖျဲၩ့ဆၧ ပဘၪၥုၪ့အုၭၥၭအုၭဆၧ လဖၪနီၪ လမွဲဘၪပဆၧၥၭမၧၫ့တၡါတၭ ပဆၧၥၭမၧၫ့တၡါနီၪ မွဲဝ့ၫဒၪလၧဆၧၥုၪ့ဎွံၪၥၭယီၫလီၫႉ

ကဆါယွၩနီၪ ဂဲၫ ဆိၬန့ထၬအ့ၪပၧၩ ဆၧဎူၫဆၧဎၩ့ ဒဲ ဆၧၥုၪ့ဎွံၪၥၭယီၫအကၠီၩ့ ပကဲၪၦဆူၩနဲၩဖိၪလဖၪဆ့ မွဲပကဘၪကျ့ၭစၨၭအီၪ မၧၫ့ဝ့ၫဒၪလၧ ဆၧၥုၪ့ဎွံၪၥၭယီၫဖၧၩ့ႇ လၧဆၧဎူၫဆၧဎၩ့ဖၧၩ့ ဒဲ ဆၧလဖၪယီၩနီၪ မွဲအီၪၥုၪ့လၩ့ထၬအၥၭလၧ ဆၧအဲၪ ဆၧကွံၩအဖၫ့ခိၪနီၪလီၫႉ မုကနံၩယီၩဖိၪၥၪလၧ အဒိၭန့ထၪ့ဆၧဒူၩယၫ့စကရမဲၪတူၩလဖၪယီၩနီၪ မွဲကဘၪဆုးထဲၩ့ မၩဂ့ၩထၪ့ဂၪ့ခိၪချိၫ့ယီၩနီၪလီၫႉ ဆၧနီၪအကၠီၩ့ပကမၩလၧၫ့ဎွ့ၩထၪ့အ့ၪအဝ့ၫၥံၪ အထီလၧယၫဘဲၫၥ့ၪလဲၪနီၪဘိၭ ယမိ လီၩဘၪနၥံၪနီၪလီၫႉ”

မန်းဂျော့ကျင်ခ ဒဲ ဂါ့ဆေးလ်ဗီယာဂါ့မြခင်ၥံၪ အထၧၫ့မၪဝၩနံၫဂၩနီၪဆ့ မွဲထိးဆၧၫ့ဒိၭန့ထၪ့ ဆၧအီၪဎုၬ မုၬထၪ့ဘၭဝ့ၫဒၪ နံၪ့ ၅၀ ထီၫ့ယူၩဘလံၫ ဒဲ ၦလၧအထိးဆၧၫ့ဒိၭန့ ဆၧဒူၩယၫ့စကရမဲၪတူၩ အီၪဝ့ၫဒၪ အဂၩ၆၈ဂၩ အဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ

10.5.2022