ဆၧဎူၫဆၧဎၩ့ကအီၪအဂး ဆၧဘိၪ့ဆၧဘၩလဖၪစူၭကီၪ့ဘၩဆိၪဖၪဆၧဒဲ မၩလၩမၩဖၩ့ ဎြံၬအီၪဖျဲၪဘိၪ့မုနံၩအဂဲး

၂၀၂၃ နံၪ့ လၩဒံၫဇဲၩ့ဘၧၫ၁၈ၥၫ့အထီအိၩ ဝံးမၫ့တၨၭဖၧၩ့ ဆၧဘိၪ့ဆၧဘၩအဖၨၪၥံၪလဖၪ စူၭကီၪ့အၪ့ကံၩ့ဘၩဆိၪဖၪလၩ့ဎိၭ ဘဲၫၥိၭဆၧဎူၫဆၧဎၩ့ကအီၪထၪ့အဂးဒဲ မၩလၩမၩဖၩ့ဎြံၬအီၪဖျဲၪ အဘိၪ့မုနံၩ လၧဝံးမၫ့တၨၭကၭၥလံၬဆၧအီၪကီၪ့ ကဒံၫဒရဲၫၥရိၬဖၧၩ့နီၪလီၫႉ

ဝံးမၫ့တၨၭဆၧအီၪကီၪ့ ကၭၥလံၬၥၫ့ခိၪဒိၪ မၫကုတ့ၫဝ့ၩ ချဲၩ့လၩ့ဘၪဆၧထိးဆၧၫ့မုၬဆၧချဲၩ့ ဘဲၫယီၩအၥိၭနီၪလီၫႉ “ၦလၧအဂဲၫထၪ့ဝ့ၫဒၪ ဆၧဘၩဆိၪဖၪလၩ့ဎိၭယီၩ ဆၧဘိၪ့ဆၧဘၩကိၭဖၨၪဖၧၩ့ ၥၫ့မုၥၫ့ခၫလဖၪႇ မံၭထၭမုၪလဖၪႇ ဆရၫႇမုၪလဖၪ ထီးလူၬ ပကၭၥလံၬဆၧဘိၪ့ဆၧဘၩဖိၪၥံၪအဂး ပၥၭဎွံၪဝ့ၫဒၪဒိၪဒိၪဒ့ၭနီၪလီၫႉ ပဎြံၬဖိၪလဖၪနီၪ အ့ၪမွဲထီၩ့လၧလၩဒံၫဇဲၩ့ဘၧၫအထီ ပမၩလၩမၩဖၩ့ဘၪ ဎြံၬအီၪဖျဲၪအဘိၪ့မုနံၩနီၪလီၫႉ လၧခးပယၩ့အဂးမွဲဂ့ၩႇ ဂၪ့ခိၪထၧၫ့ဘံၪ့ယၫ ဘဲၫၥိၭဆၧဎူၫဆၧဎၩ့ က အီၪအဂးမွဲဂ့ၩႇ ဆၧဘိၪ့ဆၧဘၩအဖၨၪကိၭဖၨၪဒ့ၭ ပကအီၪလၩ့ဎိၭဎူၫဎူၫဎၩ့ဎၩ့ဂီၩ့ ဂၪ့ခိၪချိၫ့အဂးပက ဖ့ၪဆၧၫ့လၩ့ပၥၭ လၧဆၧဎူၫဆၧဎၩ့ကန့အဂး ပထိစိၩထၬဂီၩ့ လချူၭထီၩ့ဒံၭဘၪ ဎြံၬအီၪဖျဲၪအထီ ပစူၭကီၪ့လၩ့ဎိၭလိၬၥၭဘယီၩနီၪလီၫႉ

လါနၫ့စၭထၪ့လၧ၂၀၂၀နံၪ့အထီ မွဲလၧဆၧဆၫခီၫကမံၩ့ မွဲလၧဆၧဒုၭဆၧခၬနီၪကမံၩ့အ ကၠီၩ့ ဆၧဘိၪ့ဆၧဘၩအဖၨၪလဖၪ ပဒၪလၩ့ဎိၭလိၬၥၭလဘၭလၫ့ဘၪအီၪဝ့ၫဒၪ၄နံၪ့ယူၭနီၪလီၫႉ ဆၧ နီၪအကၠီၩ့ကနံၩယီၩ ပစၭထၪ့ထဲၩ့ ဆၧဘိၪ့ဆၧဘၩအဖၨၪလဖၪ စူၭကီၪ့ဘၩလၩ့ဎိၭထဲၩ့ယွၩနီၪလီၫႉ ပဒၪလၩ့ဎိၭဘၪလိၬၥၭဘယီၩအကၠီၩ့ လၧဆၧဘိၪ့ဆၧဘၩကိၭဖၨၪဒ့ၭ ၥီၪ့ၥၫ့ထၬပၧၩ ပကဘၪပၧၩ့ထၬ ဆၧအဲၪဆၧကွံၩလဖၪဂီၩ့ ပကဘၪအီၪမၧၫ့ကၠၭပၥၭအၥိၭ ပဝ့ၫၥံၪလဖၪဆ့ ပဒၩလၩ့ဆၧအဲၪဆၧကွံၩ ယီၩဂီၩ့ ပဂဲၫဒၪလၩ့ဎိၭလိၬၥၭယီၩနီၪ မွဲလၧဆၧနဲၪ့ကမံၩ့နီၪလီၫႉ

ဆၧနီၪအကၠီၩ့ ပဂဲၫဒၪလၩ့ဎိၭလိၬၥၭဘယီၩအခၫ ပကဆီၫ့မီၪ့ထၪ့စိၩ ပဆၧဘိၪ့ဆၧဘၩၥီၪ့ၥၫ့ ထၬပၧၩ လံၬဆံၫ့ဎံၪအဂဲးလဖၪႇ ပယွၩယယွၩအဂဲးလဖၪဂီၩ့ ခးပယၩ့အဂးမွဲဂ့ၩ ဂၪ့ခိၪထၧၫ့ဘံၪ့ယၫ အဂးမွဲဂ့ၩ ဘဲၫၥိၭဆၧဎူၫဆၧဎၩ့ကအီၪအဂး ပကထိစိၩထၬဂီၩ့ ကနံၩယီၩပကအၪ့ကံၩ့ဘၩဆိၪဖၪ ကၠၭဆၧနီၪလီၫႉ

ပဆူနဲၩဝ့ၫဒၪ ဆၧဘိၪ့ဆၧဘၩလဖၪ လမီၪ့ဎီၩ့ဘၪလါနၫ့ မွဲလၧပၥုၪ့လၩ့ဎိၭ ၥၭလၩ့ဎိၭအကၠီၩ့ တၭ ပဂဲၫနုၬလၩ့ပၫဝ့ၫဒၪကၠၧၫ့ကၠၧၫ့လီၫႉ ဆၧနီၪအကၠီၩ့ ၦလၧအဂဲၫထၪ့ဝ့ၫဒၪ ဆၧဘိၪ့ဘၩလၩ့ဎိၭယီၩ ကိၭဂၩဒ့ၭနီၪ ယစံၭခိးစံၭတၩဘၪအၪမၬနီၪလီၫႉ” အဂဲး ၥၫ့ခိၪဒိၪ မၫကုတ့ၩဝ့ၩ စံၭဝ့ၫဒၪဘဲၫနီၪအၥိၭ လီၫႉ

ဂီၩ့နီၪ ဆၧဘိၪ့ဆၧဘၩကဖၨၪဘၪကဖၨၪ ဆၧဎူၫဆၧဎၩ့ကအီၪထၪ့အဂး အၪ့ကံၩ့ဘၩဆိၪဖၪ ကၠၭဝ့ၫဒၪ လၧပဆၧဘိၪ့ဆၧဘၩ ယဆၧဘိၪ့ဆၧဘၩအၥိၭအဂဲး ဆၧပရၧၫ့ယီၩ ပန့ထၬဘၪလၧ RVA Myanmar service ဖၧၩ့နီၪလီၫႉ

နးအဲၪဖီၫဘွၩ