ဆၧဎူၫဆၧဎၩ့ကအီၪထၪ့ဝ့ၫအဂး ၥၫ့ဎွၩဒိၪဖရၫ့စ့ၭဘၩဆိၪဖၪဝံဖဲၫဆံၫ့ဎံၪ

နံၪ့ ၂၀၂၂ႇ လၩမ့ၫ ၃၁နီၪ ၦဎြံၬဖိၪၥံၪအီၪလၧဂၪ့ခိၪထၧၫ့ဖျိၪ့ယၫလၧဆၧလၧမံၩ့ဎး ကၠၧၫ့ကၠၧၫ့လၧၥၫ့ဎွၩဒိၪဖရၫ့စ့ၭ ဝံထၪ့ဖဲၫဆံၫ့ဎံၪ လၧဆၧဎူၫဆၧဎၩ့အဂး လၧ St. Mary Major ဘစံၫလံၫကၫဘၩယွၩၥရိၭအဖၧၩ့ အီၪလၧရိမၫဝံး နီၪလီၫႉ

ၥၫ့ဎွၩဒိၪဖရၫ့စ့ၭ အၪ့ကံၩ့ထၪ့ ဆၧဎူၫဆၧဎၩ့အနးဎွၩမုၪႇ ၦမုၪနၩ့ၥံၫ့ဆ့ၭနးမၫရံၫအဆၧအၪ့ကံၭဘၩဆိၪဖၪ ဘဲၫၥိၭၦၡၩခမျၧးၥံၪကဒိၭန့ဘၪ ဆၧဎူၫဆၧဎၩ့အခိးအတၩနီၪလီၫႉ

လၧအဖီၩ့ခွံၬဒၪအတုၬမုနံၩ(မ့ၫ ၂၉ၥၫ့) အိၩႇ ၥၫ့ဎွၩဒိၪဖရၫ့စ့ၭကိၭဖံၭၥိၭဘၪ ၦဆူနဲၩဖိၪၥံၪအီၪလၧဂၪ့ခိၪထၧၫ့ဖျိၪ့ယၫ ကဘၩဆိၪဖၪဝံထၪ့ဖဲၫဆံၫ့ဎံၪ လၧမိမၫရံၫအလၩမ့ၫအလးခဲၫ့ထုၬမုနံၩႇ လၧဆၧဒုၭဆၧယၩ  မၩကဲၪထၪ့ ဆၧၥံၫဆၧဆၫႇ ဆၧနိၫ့ဆၧနၭ ဒဲဆၧဂၭဂီၩ့ဂၭစၪ လၧဂၪ့ခိၪဖၧၩ့ယီၩအထီနီၪလီၫႉ

ၦဆူနဲၩဖိၪလၧအဒၪခီၩ့ဆၧၫ့ယၫဆၧဒုၭဆၧယၩႇ ၦလၧအဘၪစဲၪဒၪခွံၬအထံၫအခးဒဲ ၦလၧအဘၪဎဲၪ့ဆၧဒုၭဆၧခၭလဖၪနီၪ ဂဲၫအၪ့ကံၩ့ဘၩဆိၪဖၪဆၧ လၧဆၧဘၩဆိၪဆၧဝံထၪ့ဖဲၫဆံၫ့ဎံၪအထံၫလၩ့ဒီၪ့လၩ့အဖၧၩ့နီၪလီၫႉ