ဆၧကဲၪထၪ့SFX Bro အနံၪ့အီၪထၪ့ဘၭဝ့ၫဒၪ ၂၅နံၪ့ စ့ၩဘျံၭယူၩဘလံၫဒဲ ဆၧထိးဆၧၫ့ဒိၭန့ဆၧအုၩ့လၩ့လဆိၩယၫ ဆၧထံၪလၩ့ဒီၪလၩ့အဂဲး

နံၪ့၂၀၂၂နံၪ့ လၩမၫၡၭ၂၆ၥၫ့ ၥံၭၥီၫမုနံၩ လဂီၩ၆နၩရံၫခီၫ အခံၫ့နီၪ ဆၧမၩလၩမၩဖၩ့ၡီၩ့ ဆၧထိးဆၧၫ့ဒိၭန့ စ့ၩဘျံၭယူၩဘလံၫ ဒဲ ဆၧထိးဆၧၫ့ဒိၭန့ ဆၧအုၩ့လၩ့လဆိၩယၫ ဆၧဎိၭထံၪဎိၭဒီၪအီၪဝ့ၫဒၪလၧ ဝံးပၥံၫ့ မယၩ့ခၠီၩ့ SFX Bro လဖၪ အၥရိၬလးဖၧၩ့နီၪလီၫႉ

ၦအထိးဆၧၫ့ဒိၭန့ဘၪစ့ၩဘျံၩ့ယူၩဘလံၫ Broလဖၪနီၪ မွဲဝ့ၫဒၪ Bro.Innocent , Bro.Juvitar ဒဲ  Bro.Kennyလဖၪနီၪလီၫႉ ၦလၧအထိးဆၧၫ့ဒိၭန့ ဆၧအုၩ့လၩ့လဆိၩယၫBroလဖၪနီၪ မွဲဝ့ၫဒၪ Bro.Victor, Bro.မာတီးယားဘိုဘို ဒဲ  Bro.ဗာလင်တိုင်း လဖၪနီၪလီၫႉ

လၧမံဆၩဆၧလုထၪ့အဖၧၩ့ ဘိၪ့ခိၪၥၫ့ခၫ Fr.Henry အဲၪချံၫ့နီၪ စံၭဝ့ၫဒၪ လၧဂီအဆၧၫ့အထီယီၩ ပကဲၪ ကဲၬၥလံၬဖိၪလဖၪထီးလူၬ ပၧၩနီၪမွဲပၧၩလဲၪအဂဲး ပကဘၪၥ့ၪယၫလၩ့ပၥၭႇ အ့ၪမွဲပကၥ့ၪယၫလၩ့ပၥၭအၪအၪနီၪ မွဲပကၥ့ၪယၫထၪ့ကဆါယွၩအၪအၪအဂဲးႇ  ပထိးဆၧၫ့ဒိၭန့ဆၧအုၩ့လၩ့အၪအၪတၭ မွဲပလူဒိၪဎွ့ၩဒိၪဂဲၫအီၪထၪ့အၪ အၪအဂဲးႇ  ပလူပဎွ့ၩနီၪအီၪၥုၪ့လၩ့ထၬၥၭလၧ ပဆၧအုၩ့လၩ့အဖၫ့ခိၪအဂဲးႇ လၧပဆၧအုၩ့လၩ့အဖၫ့ခိၪ မွဲပကဘၪ ထဲၩ့ဂုးခၧၫ့ လဆိၩယၫအဂဲးႇ ယူၩဘလံၫဆါလဖၪ အနံၪ့၂၅နံၪ့အဖၧၩ့ ဂဲၫထဲၩ့လီၩ့ဎွါထၪ့ထၬကဆါယွၩအဂဲးႇ  လကၭဘၪ ကဆုးထဲၩ့လီၩ့ဎွါထၪ့ကဆါယွၩအဂးဆ့ ကနံၩယီၩ Broၥၧၫ့ဂၩ အုၩ့လၩ့ဆၫ့လၩ့အၥၭ ဆၧအုၩ့လၩ့လဆိၩ ယၫအဂဲးႇ ပဝ့ၫၥံၪယီၩ အ့ၪမွဲပလီၩ့ဎွါကဆါယွၩနီၪ မွဲပကဒၪထၪ့ဘၪကဆါယွၩအဂဲးႇ ပကဘၪလီၩ့ဎွါထၪ့ ကဆါယွၩအဂးနီၪ ပဝ့ၫၥံၪယီၩ ပမူၩဒၩအီၪဝ့ၫဒၪ ဖၭဒိၪအဂဲးႇ  စံၭဝ့ၫဒၪနီၪလီၫႉ

ၦလၧအထိးဆၧၫ့ဒိၭန့ စ့ၩဘျံၭယူၩဘလံၫလဂၩမွဲဝ့ၫ Bro.Kenny နီၪစံၭဝ့ၫဒၪ ယဒိၭန့ထၪ့ Broအဆၧကီၩ့ ဆၧၥိၭအခံၫ့ဒၪအိၩ ဘိၪ့ခိၪၥၫ့ခၫၥံၪဂဲၫဖ့ၪဂဲးဖ့ၪဘၭ အီၪဝ့ၫဒၪၡၩၡၩဖိၪလီၫလါနၫ့ ကနံၩယီၩ ယဒၪဘၪၥၫ့မု ၥၫ့ခၫ လဖၪအၪမၬလ့ၬနီၪ ယၥၭဎွံၪဝ့ၫဒၪနၭမၬနီၪလီၫႉ ယၧၩယီၩ ဘဲၫၥိၭ ယကကဲၪထၪ့ဘၪ Broကဂၩအဂး ကဆၫ့ ကဆၫ့နီၪ ယဘၪဂဲၫထဲၩ့ ကျ့ၭစၨၭထၪ့ဝ့ၫ ဖိၭဘိၭ၅နံၪ့နီၪလီၫႉ ယၧၩယီၩနီၪ လၧယအီၪဖျဲၪၥၫ့အိၩ ယဖျံၩနီၪဘုၭထၬ လၧယထၫချၭအကၠီၩ့ ယချဲၩ့ၥ့ၪအ့ၬႉ လါနၫ့ယမိမိနီၪ လ့ၩဖ့ၪနဲၪယၧၩလၧဆရၫဂီၩ့ ဘၠၩ့ထဲၩ့ဝ့ၫအခၫ မွဲလၧကဆါယွၩ အဆၧမၩဆၧၩ့အဖၧၩ့ ယချဲၩ့ထဲၩ့ၥ့ၪဝ့ၫဒၪနီၪလီၫႉ ယၧၩယီၩ ယထၪ့ဆၧမၩလိၪအခံၫ့ဒၪအိၩ ယဘၪထၪ့ဝ့ၫ ဆၧမၩလိၪ ကဖၨၪနီၪ၂နံၪ့နီၪလီၫႉ ယကကဲၪထၪ့Broကဂၩနီၪ ၦၡၩစီၪယၧၩလမိဘၪဘၪနီၪလီၫႉ  လါနၫ့အခံၫ့ထီၩ့နီၪ ကဆါယွၩ ရွံထၪ့ယၧၩဒဲ ယကဲၪထၪ့ဘၪBroကဂၩနီၪလီၫႉ ကနံၩယီၩနီၪ ယထိးဆၧၫ့ဒိၭန့ထၪ့ထဲၩ့ဘၪ 25နံၪ့စ့ၩဘျံၭယူၩဘလံၫ ယူၭနီၪလီၫႉ  ဆုးထဲၩ့အၪ့ကံၩ့ဘၩဆိၪဖၪအ့ၪယၧၩ ယဂးခလူၬအဂဲး ယမိစံၭဘၪနီၪလီၫႉ

လကၭဒံၭဘၪ Bro.Juvitar နီၪဆုးထဲၩ့စံၭဘၪဝ့ၫ (ကဆါယွၩအဆၧကိၭနီၪစၭထၪ့ဝ့ၫဒၪလၧ ဆၧအဲၪဆၧ ကွံၩလီၫႉ ယၧၩနီၪယၥၭထ့ဖၭအကၠီၩ့ ယဂဲၫကဲၪထၪ့ Broကဂၩနီၪလီၫႉ ယကဲၪထၪ့ဆၧအီၪကီၪ့ဆရၫကဂၩဂီၩ့အထီ ယဒၪဘၪလၧ ၥၫ့ခၫကဂၩဂီၩ့ ၥၫ့ခၫနီၪအၪ့စၪ့ယၧၩ နလ့ၩမၩဆၧအီၪကီၪ့ဆရၫအဆၧမၩအလးခလဲၪအခၫ ယစံၭဆၧၫ့ ထဲၩ့ ယမၩနးစီၪ့အ့ၬႉ အ့ၪမွဲဘနီၪ နမိလ့ၩကဲၪယိ Broအ့ၬဧၪ ၥၫ့ခၫနီၪဆုးထဲၩ့အၪ့စၪ့ယၧၩဘနီၪတၭ ယစံၭဆၧၫ့ထဲၩ့ ယမိလ့ၩကဲၪယိနဲၪမၩ့ကၠဲၬ ဘနီၪဂီၩ့ ယဂဲၫထီၩ့လၧ မယၩ့ခၠီၩ့SFX Broကၠီးယီၩ နီၪလီၫႉ ပၥိၭ၃ဂၩယီၩ မွဲလၧၦၡၩ အနါကဲၪ့လဖၪအကၠီၩ့ ပခိၪနါ Bro.Gyiနီၪ ၥီၪ့ၥၫ့ပၧၩလနၧၩ့ဎီၩ့ဘၪနီၪလီၫႉ လါနၫ့ ဘဲၫယီၩနီၪ မွဲလၧကဆါယွၩ အစီၩ့အမၩ့အကၠီၩ့ မွဲလၧမိဖါဘူၭထံး ထံၩၥိၭလဖၪအဆၧဘၩဆိၪဖၪအကၠီၩ့  ပဒိၭန့ထၪ့ဘၪ ၂၅နံၪ့စ့ၩဘျံၭယူၩဘလံၫ ယူၭႉ ယစံၭခိးစံၭတၩဘၪ မိဖါဘူၭထံးထံၩၥိၭလဖၪဒဲ ယဆၧအဲၪတၩ့လၧခီၩ့ခီၩ့အိၩနီၪလီၫႉ အဝ့ၫစံၭထၬယၧၩ နကဲၪ Broနီၪ ကဲၪထၧၩ့နၥံၫနၡါမွဲအ့ၪန့ ယကအၪ့ကံၩ့ဘၩဆိၪဖၪအ့ၪနၧၩ စံၭထၬယၧၩဘဲၫနီၪအၥိၭနီၪလီၫႉ  ကနံၩယီၩ ၦလၧအဂဲၫထၪ့ မၩလၩမၩဖၩ့အ့ၪပၧၩ ယူၩဘလံၫ ကိၭဂၩဒ့ၭနီၪ ယစံၭခိးစံၭတၩဘၪကိၭဂၩဒ့ၭနီၪလီၫႉ

ယူၩဘလံၫဒဲ ဆၧအုၩ့လၩ့လဆိၩယၫ မံဆၩဆၧလုထၪ့နီၪဂီၩ့ခွံၬဝ့ၫဒၪလၧ လဂီၩ့ဖိၭဘိၭ ၈နၩရံၫခီၫအခံၫ့ဂီၩ့ ဘူၪ့အၪ့ဘူၪ့အီၩၦၡၩလၧ လဂီၩဆၧအၪ့အဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ

26.3.2022