ဆၧကဲၪထၪ့မံၭထၭခွၫႇ ဆၧဒိၭန့ဆၧအုၩ့လၩ့လဆိၩယၫဒဲ စ့ၩဘျံၭယူဘလံၫအဂဲး

နံၪ့၂၀၂၃နံၪ့ လၩမၫၡၭ၃၀ၥၫ့နီၪ ဆၧကဲၪထၪ့SFXမံၭထၭခွၫႇ ဆၧထိးဆၧၫ့ဒိၭန့ ဆၧအုၩ့လၩ့လဆိၩယၫႇ ဒဲ ဆၧဒိၭန့စ့ၩဘျံၭယူဘလံၫ မံဆၩဆၧလုထၪ့အီၪဝ့ၫဒၪလၧ ဒိၩ့ပၥံၫ့ဆၧအီၪကီၪ့ မယၩ့ခၠီၩ့ယ့ၫၡူၬအၥၭဆံၫ့ဎံၫၥရိၬလးဝၩ့ဖၧၩ့နီၪလီၫႉ

ၦလၧအထိးဆၧၫ့ဒိၭန့ စ့ၩဘျံၭယူၩဘလံၫ မံၭထၭခွၫလဖၪနီၪ မွဲဝ့ၫBro.Hilary(ဟားခါး), Bro.Maximillian(လွိုင်ကော်), Bro.Nerius (ဟားခါး), Bro.Oswald(လွိုင်ကော်)လဖၪဂီၩ့  ၦလၧအထိးဆၧၫ့ဒိၭန့ ဆၧအုၩ့လၩ့လဆိၩယၫလဖၪနီၪ မွဲဝ့ၫBro.Francisco (လွိုင်ကော်), Bro.Constantine(ဘားအံ), Bro.Gabriel(တောင်ငူ)ဒဲ ကနံၪ့ယီၩ ၦလၧအကဲၪထၪ့ မံၭထၭခွၫလဂၩနီၪ မွဲဝ့ၫ Bro.Paul (မြစ်ကြီးနား)နီၪလီၫႉ

ၦလၧအလ့ၩခိၪလ့ၩနါမံဆၩဆၧလုထၪ့နီၪ မွဲဝ့ၫဒၪဒိၩ့ပၥံၫ့ဆၧအီၪကီၪ့ထၧၫ့ဘံၪ့ယၫ ၥၫ့ခၫဒိၪထုၬ Fr.Henry အဲၪချံၪ့နီၪလီၫႉ လၧမံဆၩ ဆၧလုထၪ့ဖၧၩ့ Fr.Henry စံၭဝ့ၫဒၪ “ထံၪခးကခးအဖၧၩ့ ႇ ခရၧၫ့ကခရၧၫ့အဖၧၩ့ ၦလၧအထိးဆၫၥၭဒဲဖ့ၪဆၧၫ့လၩ့ၥၭလအီၪဘၪစွါဘဲၫ ထီလၧယၫအီၪထၪ့န့အ့ၬႉ ဆၧဖံၭဆၧမၩအယီၩပမၩထၪ့နီၪ မွဲယီၫအကၠီၩ့နီၪအ့ၬ ကၪဂဲၩအကၠီၩ့နီၪ ပမၩထၪ့ဆၧမၩယီၩနီၪလီၫႉ ဆၧဖ့ၪဆၧၫ့လၩ့ၥၭ အ့ၪလအီၪဘၪ ကၭၥလံၬဆၧဘိၪ့ဆၧဘၩယီၩ မွဲကဂဲၫထီၩ့စိၩလၧခးပယၩ့ယီၩအ့ၬႉ ၦလၧအဂဲၫထဲၩ့ဖ့ၪဆၧၫ့လၩ့ၥၭ ထံၪယဲၩ့ခးယဲၩ့ဘိၪ့ခိၪၥၫ့ခၫ ၥံၪ ဂဲၫမၩဂၧၫ့ထၪ့ၥၩလၩ့ ကဆါယွၩအဂဲးအဖး လၧပခးပယၩ့ဖၧၩ့ယီၩအကၠီၩ့ အဝ့ၫၥံၪယီၩ ဂဲၫအခၫအိၩကထဲၩ့ထဲၩ့အထံၪအခးအဂး မွဲဖၧၩ့ၥၭ လအီၪဘၪအဂဲး ၥ့ၪယၫလၩ့ထၬအၥၭဂ့ၩဘၪစဲၪဂီၩ့ ကဆါယွၩအဂးဂဲၫထီၩ့လၧယီၩဒဲ ၥံၫထးလၧပထံၫခးဖၧၩ့ယီၩနီၪလီၫႉ အဝ့ၫၥံၪအဆၧဖ့ၪ ဆၧၫ့လၩ့ၥၭအဂဲးလဖၪနီၪ ပဖီဎီၩ့လူၬလန့ဘၪလီၫႉ ၦအဖ့ၪဆၧၫ့လၩ့ၥၭ အ့ၪလအီၪဘၪနီၪ လၧဆၧအလးယီၩ အီၪဝ့ၫဒၪခရၧၫ့လဖၪယီၩ မွဲက ဘၪဖိၭဘံၭထဲၩ့အၥၭနီၪလီၫႉ ဆၧမၩအယီၩနီၪယီၫအ့ၬကၪဂဲၩဝ့ၫဒၪ လါနၫ့ပဝ့ၫၥံၪယီၩပဆုးထဲၩ့မၩကၠၭဝ့ၫဒၪနီၪလီၫ” အဂဲး လီၩလၩ့လၬလၩ့ဝ့ၫ ဒၪနီၪလီၫႉ

ၦလၧထိးဆၧၫ့ဒိၭန့ဘၪ စ့ၩဘျံၭယူဘလံၫလဂၩမွဲဝ့ၫ Bro.Hilary နီၪစံၭဝ့ၫဒၪ “ဘဲၫကဆါယွၩစံၭထၬဝ့ၫ မွဲနၥံၪရွံန့ယၧၩအ့ၬ မွဲလၧယရွံထၪ့န့နၥံၪလီၫအၥိၭ ပမံၭထၭခွၫလဖၪယီၩ မွဲပၥ့ၪပဘၪအၪမၬအကၠီၩ့ မွဲလၧပဆံၫ့ဎံၫဝ့ၫဒၪအၪမၬအကၠီၩ့ ပဖီၪ့ထၪ့ဖံၭထၪ့ကဆါယွၩ အဆၧဖံၭဆၧမၩအ့ၬႉ လၧဆၧကၪဆၧဂဲၩအဖၧၩ့ လၧလကြၨၭလဘၪဘၪအဖၧၩ့ မွဲလၧကဆါယွၩရွံထၪ့န့ပၧၩအကၠီၩ့ ပန့ထၪ့ဘၪဆၧၥၭမၧၫ့ယီၩဂီၩ့ ပဖီၪ့ထၪ့ဖံၭထၪ့ဘၪကဆါယွၩအဆၧဖံၭဆၧမၩနီၪလီၫႉ ကနံၩယီၩၦလၧအကဲၪထၪ့ မံၭထၭခွၫအၥၫ့အီၪဝ့ၫဒၪကဂၩလီၫႉ ပကဘၪကူၭဆၧအီၪဝ့ၫ ဒၪအၪမၬ လါနၫ့ ၦလၧကကူၭဆၧနီၪ အီၪဝ့ၫဒၪၡၩခိၬဖိၪနီၪလီၫႉ ဆၧနီၪအကၠီၩ့ၦလၧ အဂဲၫထၪ့ Come and See ၥၭဘၪ့ဖိၪၥံၪလဖၪနီၪ ယယိ လါလၧကဒၪထၪ့ဘၪဆၧအဂဲးယီၩနီၪလီၫႉ လၧမိဆၧအီၪကီၪ့အဂး ၥၭဘၪ့လၧကဖ့ၪဆၧၫ့လၩ့ၥၭလဖၪ မွဲလိၫဒံၭအၪမၬဒံၭအဂဲး” Bro.Hilary စံၭဘၪဝ့ၫနီၪလီၫႉ

လကၭဒံၭဘၪ ၦလၧအထိးဆၧၫ့ဒိၭန့ဘၪ ဆၧအုၩ့လၩ့လဆိၩယၫ မံၭထၭခွၫလဂၩမွဲဝ့ၫ Bro.Gabriel နီၪစံၭဝ့ၫဒၪ ‘’စံၭခိးစံၭတၩဘၪ ၦလၧအဂဲၫဖ့ၪဂဲးဖ့ၪဘၭအဝ့ၫၥံၪ ၦလၧဂဲၫမၩဆၧၩ့အဝ့ၫၥံၪလဖၪအဂဲးႇ အဝ့ၫၥံၪအဂး ၦဆူနဲၩဖိၪလဖၪကအၪ့ကံၩ့ဘၩဆိၪဖၪအ့ၪဝ့ၫဆ့နီၪ ဆူနဲၩဝ့ၫအဂဲးႇ ထီၩ့စိၩလၧကနံၩယီၩ အဝ့ၫဒိၭန့ထၪ့ဆၧအုၩ့လၩ့လဆိၩယၫနီၪ မွဲဒၪကဆါယွၩအခိးအတၩလီၫအဂဲးႇ အဝ့ၫအဆၧအီၪကီၪ့နီၪ ဂဲၫကဲၪထၪ့အီၪဝ့ၫဒၪအနံၪ့၃၀ယူၭလါနၫ့ ထီးမုဆၫကနံၩယီၩ ၦၡၩကဲၪထၪ့ဘိၪ့ခိၪၥၫ့ခၫဒဲ မံၭထၭမုၪ မွဲလအီၪဒံၭဘၪနးဂၩအဂဲးႇ အီၪဒၪမံၭထၭ ခွၫ အဝ့ၫကဂၩဒံၭလီၫအဂဲးႇ လၧအဝ့ၫအတဝၫ့ဖၧၩ့ ၦလၧအဖျီၫ့ဆံၫဖၨၪဆ့ အီၪဒၪအဝ့ၫအဖုခွၫ ကဂၩဒံၭလီၫအဂဲးႇ အဝ့ၫၥံၪနီၪမွဲလၧ ၦမုၪမဲၪ ကဂၩအဖိၪအဒံၪအဂဲး” စံၭဝ့ၫဒၪနီၪလီၫႉ

SႉFႉX မံၭထၭခွၫခရၧၫ့ယီၩနီၪ မွဲခရၧၫ့လၧအဘၪအုၩ့လၩ့ထိးဆၧၫ့ ဆၧအုၩ့လၩ့၃မံၩ့နီၪလီၫႉ ဆၧအုၩ့လၩ့လဖၪနီၪ မွဲဝ့ၫဒၪ ဆၧၡၪ့ဆၧ ယၬႇ ဆၧခိၭနၪဒဲ ဆၧဆံၫ့ဎံၫ လဖၪနီၪလီၫႉ အဝ့ၫၥံၪယီၩနီၪ မွဲကဘၪအီၪလၧ ဆၧၡၪ့ဆၧယၬအဖၧၩ့ ဆၧခိၭနၪအဖၧၩ့ဒဲ ဆၧဆံၫ့ဆၧဎံၫဖၧၩ့ဂီၩ့ ကဘၪဖီၪ့ထၪ့ဖံၭထၪ့ ကဆါယွၩအဆၧဖံၭဆၧမၩလဖၪနီၪလီၫႉ SႉFႉX မံၭထၭခွၫခရၧၫ့ယီၩ ထီးမုဆၫကနံၩယီၩ မံၭထၭခွၫထီးလူၬ အီၪဝ့ၫဒၪ ဖိၭဘိၭအဂၩ (၉၀)အဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ