ဆီးရီးယားထံၪခးဖၧၩ့ မွတ်ဆလင်ၦပိၩ့ထၪ့ဆၧလဖၪ ဖိၭဘံၭထၬကအီၪ၁၀နံၪ့ ၥရိၬကဖျိၪ့နီၪ ဘဲၫယီၩဝဲထၪ့ထဲၩ့ဝ့ၫအဂဲး

လၧIdlibလးဝၩ့ဖၧၩ့ မွတ်ဆလင်ၦပိၩ့ထၪ့ဆၧလဖၪ ဖိၭဘံၭထၬဝ့ၫ ကအီၪဖိၭဘိၭအနံၪ့၁၀ ၥရိၬကဖျိၪ့နီၪ ဘဲၫယီၩ အဝ့ၫၥံၪဝဲထၪ့ထဲၩ့ဂီၩ့ ဖ့ၪလုထၪ့ထဲၩ့ ၦဎြံၬဖိၪၥံၪမံဆၩဆၧလုထၪ့အဂဲး ပၥ့ၪယၫဘၪနီၪလီၫႉ
ဆၧအလးနီၪ မွဲလးကျဲၩ့အၥၧၫ့လၧ ၦပိၩ့ထၪ့ဆၧလဖၪ အၪ့န့ပၧၩ့ထၬဝ့ၫနီၪလီၫႉ လါနၫ့ လၧအဖီၩ့ခွံၬ ၦဆံၫ့ဎံၫSt.Ann အဘိၪ့မုနံၩဒၪအိၩ လၥီၫလၧၩ့ဘၪယံၭယူၭဒိၩ့လွ့ၫနီၪ လၧအလူမုၬမုၬအဖၧၩ့ စၭထၪ့ၥီၫထၪ့ထဲၩ့ဘၪနီၪလီၫႉ ၥရိၬနီၪအမံၩ့မွဲလၧ St.Ann ဒဲ မွဲလၧ အာမေးနီးယားအၥရိၬကဖျိၪ့နီၪလီၫႉ
ၥရိၬနီၪၦၡၩၥုၪ့ထၬလၧ Yacoubiaတဝၫ့ဖၧၩ့နီၪလီၫႉ ဘဲၫယီၩလၧဆၧအလးနီၪအဖၧၩ့ အီၪလၩ့ပြံၩပြၩဝ့ၫဒၪၦဆူၩနဲၩဖိၪ လဖၪ ဂဲၫထဲၩ့စူၭကီၪ့ဘၩဎိၭလၩ့ မံဆၩဆၧလုထၪ့န့ထဲၩ့ယူၭနီၪလီၫႉ ဘဲၫယီၩအၥိၭ ဆၧဘိၪ့ထၪ့ဘၩထၪ့ၡီၩ့ထဲၩ့ယွၩန့ထဲၩ့နီၪ မွဲလၧ Hayat Tahrir al Sham လးဝၩ့ ၦပိၩ့ထၪ့ဆၧခိၪနါMuhammad al Jawlani နီၪ ဒၪလၩ့ဎိၭလၧ ၦဎြံၬဖိၪအခိၪနါ လဖၪဂီၩ့ ချဲၩ့လၩ့ဎိၭကၠၭဝ့ၫဒၪအကၠီၩ့နီၪလီၫႉ
လးဝၩ့ၦပိၩ့ထၪ့ဆၧခိၪနါနီၪ ဘၪထွ့ၪလၧဎြံၬဖိၪၥံၪအဆၧဘိၪ့ထၪ့ဘၩထၪ့ၡီၩ့ဆၧနီၪ ထၧၩ့ဆၧထၪ့ဒုၪဒၩလအီၪဘၪနးမံၩ့ အဂး အဝ့ၫၥံၪကပဒၩ့ထၬအ့ၪအဂဲးႇ ဂျာဟာဒီခရၧၫ့ဖိၪၥံၪ ဂဲၫထဲၩ့မၩန့ထၬ ၡၩခမျၧးၥံၪအဆၧလဖၪနီၪ ကဖ့ၪလၫ့ထဲၩ့အ့ၪ ၡၩခမျၧးလဖၪအဂဲးႇ စံၭဝ့ၫဒၪနီၪလီၫႉ
လၧဆၧပိၩ့ထၪ့အထီဒၪအိၩ အဝ့ၫၥံၪယီၩ ဂဲၫထဲၩ့ပၧၩ့န့ထၬၥရိၬလဖၪဒဲ ၦဎြံၬဖိၪၥံၪလဖၪအဆၧထူၭဆၧလၧၫ့လဖၪ အၪအၪ ဒ့ၭနီၪလီၫႉ ၦပိၩ့ထၪ့ဆၧခိၪနါယီၩနီၪ ဖ့ၪၥ့ၪယၫထၪ့ဘၪ အဆၧဘိၭဘၪၥ့ၪယၫလဖၪ လၧဆၧဘိၪ့ဆၧဘၩဂူၫဂၩခိၪနါလဖၪအအီၪ ဆ့နီၪလီၫႉ လၧအဝ့ၫအဆၧဘိၭဘၪၥ့ၪယၫအဖၧၩ့ အဝ့ၫယီၩကမိဝဲထၪ့ထဲၩ့လံၬဘျံၭအၥၫ့ကဘျံၭအဂဲးႇ မွတ်ဆလင်လမွဲဘၪ ဆၧဘိၪ့ဆၧဘၩဂူၫဂၩအဖၫ့ခိၪ ဘၪထွ့ၪလၧၡၩခံးဂးဒဲ ဆၧဘိၪ့ဆၧဘၩအဂဲးလဖၪ လပဒၩ့လၧၩ့ဘၪဝ့ၫနးမံၩ့အဂဲး ထံၭလၩ့ ဘိၭဘၪၥ့ၪယၫထၪ့ဝ့ၫလီၫႉ
မွဲလၧဆၧဘိၭဘၪၥ့ၪယၫထၪ့ဆၧယီၩအကၠီၩ့ ဖံၭထံၫဝံကိၪ့ၥ့ၪလဂၩမွဲဝ့ၫ Aaron Y Zelin နီၪယိကဒၩထဲၩ့ ၦပိၩ့ထၪ့ဆၧ ခိၪနါJawlaniယီၩဂီၩ့တၭ စံၭဝ့ၫ Jawlaniဒဲအခရၧၫ့ယီၩနီၪ လမွဲလၧၩ့ဘၪၦပိၩ့ထၪ့ဆၧခရၧၫ့ဖိၪလဖၪဂီၩ့တၭ အဝ့ၫၥံၪယီၩ ကမိ အီၪထဲၩ့လၧ အမ့ၫရံကၫ့အဆၧဘၪၥၭဖၧၩ့အဂဲး စံၭဝ့ၫဒၪလီၫႉ ဂီၩ့နီၪ Hayat Tahrir al Sham လးဝၩ့နီၪ ၥိၫ့စိၩ ဆၧချဲၩ့လၧ အမ့ၫရံကၫ့အီၪ ဘဲၫယီၩအၥိၭနီၪလီၫႉ ပဝ့ၫၥံၪယီၩ ပမိကဲၪနၥံၪအထံၩၥိၭလီၫႉ ပဝ့ၫၥံၪယီၩနီၪ လမွဲဘၪ ၦပိၩ့ထၪ့လဖၪလီၫႉ ပဝ့ၫၥံၪယီၩ မွဲဒၪပပိၩ့ထၪ့ ဆီးရီးယားထံၪခးခိၪနါAssadနီၪလီၫႉ ပဝ့ၫၥံၪယီၩနီၪ နၥံၪအဂး လမွဲဘၪဆၧဆူၪ ဆၧမဲၪလဖၪလီၫႉ
နးအဲၪဖီၫဘွၩ