ဆရၫႇဆရၫမုၪလဖၪ အဂး ဘၪထၪ့ထဲၩ့ၥဖၠးဒဲ မးၥံၫဝ့ၫဒၪ

နံၪ့၂၀၂၂နံၪ့ လၩမ့ၫ၃ၥၫ့ ထီၩ့စိၩလၧ၉ၥၫ့နီၪ ဒိၩ့ပၥံၫ့ဆၧအီၪကီၪ့ဆရၫႇ ဆရၫမုၪလဖၪ မးၥံၫဒဲၥဖၠး အီၪဝ့ၫ ဒၪလၧ ဝံးပၥံၫ့ႇ မယၩ့ခၠီၩ့နီၪလီၫႉ

မွဲလၧကိၫဘံဆၧဆၫခီၫကမံၩ့ႇ မွဲလၧထံၪဂဲးခးဂဲးခီၫကမံၩ့ ဆရၫႇဆရၫမုၪလဖၪယီၩ ဒၪလၩ့ဎိၭလိၬၥၭဒဲ မးၥံၫကၠၭကၠၧၫ့ကၠၧၫ့ႇ ထၪ့ကၠၭၥဖၠးကၠၧၫ့ကၠၧၫ့လန့ဘၪအီၪဝ့ၫဒၪ၂နံၪ့ယူၭနီၪလီၫႉ လါနၫ့၂၀၂၂နံၪ့ယီၩနီၪ လၧဆၧခိးဂဲး ခိးဘၭအဖၧၩ့ ဂဲၫဒၪဎိၭလၩ့ထဲၩ့လိၬၥၭ လၧအလးထယီၩနီၪလီၫႉ

ၦလၧအဂဲၫဝဲထၪ့အ့ၪအဝ့ၫၥံၪ ၥဖၠး ဒဲ မးၥံၫကဘျၩ့ ယီၩနီၪ မွဲဝ့ၫဒၪလၧ Fr.Henry Eikhlein ဒဲ အဝ့ၫယီၩ စံၭဝ့ၫဒၪ “မွဲလၧကိၫဘံဆၧဆၫခီၫကမံၩ့ႇ မွဲလၧထံၪဂဲး ခးဂဲးခီၫကမံၩ့ႇ ပဆၧအီၪကီၪ့ၦမၩဆၧဖိၪလဖၪ ပမၩဆၧဖံၭဆၧမၩ ဂ့ၩဂ့ၩဘၪဘၪလန့ဘၪကအီၪဖိၭဘိၭ ၂နံၪ့ယူၭနီၪ လီၫႉ

လါနၫ့ ဘဲၫယီၩနီၪ ဆၧဂဲၫပျၩ့လၫ့ထဲၩ့ကဆံၭယူၭအကၠီၩ့ ပမၩထၪ့ထဲၩ့ဆၧဖံၭဆၧမၩန့ယူၭနီၪလီၫႉ အ့ၫယၫဝတံၫ ခးဒီၪ့ယီၩ ဝံးဒီၪ့အီၪဝ့ၫဒၪ၂၆ဒီၪ့အဖၧၩ့ ၁၉ဝံးဒီၪ့နီၪ ပကဲၬ၁လံၬဆၧအီၪကီၪ့ အီၪဝ့ၫဒၪ၃၆ဒီၪ့နီၪလီၫႉ  ဆၧအီၪကီၪ့ ထၧၩ့ကကဲၪထၪ့ထဲၩ့၄၀ဒီၪ့အဂးနီၪ ဆရၫႇမုၪလဖၪ ကၩ့ကၩဎိၭလၩ့ကၠၭလါဆံၭႉ လၧဒိၩ့ပၥံၫ့ဆၧအီၪကီၪ့အဖၧၩ့ယီၩ ကဲၬၥလံၬဆၧဘိၪ့ဆၧဘၩဖိၪၥံၪအီၪဝ့ၫဒၪ အဂၩ၆၀၀၀၀ဘျဲၪနီၪလီၫႉ

ၦအီၪလၧ ၦဆူၩနဲၩဖိၪလဖၪ န့ဝ့ၫဘူၭဘူၭထံး ထံးနီၪ မွဲဒၪလၧဆၧအီၪကီၪ့ဆရၫႇမုၬလဖၪနီၪလီၫႉ ၦဆူၩနဲၩဖိၪၥံၪအဆၧၥၭမၧၫ့ ဆၧကၪဆၧဂဲၩလဖၪႇ အဝ့ၫၥံၪအ နးၥၭအဂး လိၪဝ့ၫဆၧမၩဆၧၩ့လဖၪနီၪ ပကဘၪမၩဆၧၩ့ထၪ့ဝ့ၫနီၪလီၫႉ ၥၫ့ဎွၩဖရၫ့စံၭနးဆ့ လခဲၫ့ခီၫကိ ကဖ့ၪလၫ့ အ့ၪဆရၫႇ မုၪလဖၪ (သိက္ခာတင်)နီၪဆ့ လီၩထၬဝ့ၫအီၪနီၪလီၫႉ”

လၧမးၥံၫဒဲၥဖၠးကဘျၩ့ယီၩအဖၧၩ့ ဆၧအီၪကီၪ့ဆရၫႇမုၪလဖၪ ထီးလူၬဂဲၫထၪ့ဝ့ၫ ကအီၪဖိၭဘိၭအဂၩ ၇၀ ဘျဲၪ အဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ

3.5.2022