ဆရၫဆရၫမုၪလဖၪမးၥံၫဒဲ ၥဖၠးဖျါလၩ့အဂဲး

ထၧၫ့ဖုဝဲထံၩၥိၭထီးလူၬၥံၪဧ့ နံၪ့၂၀၂၂နံၪ့ လၩမ့ၫ၉ၥၫ့လဂီၩခီၫနီၪ ဒိၩ့ပၥံၫ့ဆၧအီၪကီၪ့ထၧၫ့ဒီၪ့ယၫ ဆၧအီၪ ကီၪ့ဆရၫ ဆရၫမုၪလဖၪ အမးၥံၫဒဲၥဖၠးဂီၩ့ခွံၬဝ့ၫဒၪနီၪလီၫႉ

မွဲလၧဆၧဆၫခီၫကမံၩ့ မွဲလၧထံၪခးဂဲးခီၫကမံၩ့အကၠီၩ့ အဝ့ၫၥံၪယီၩဒၪလၩ့ဎိၭလိၭၥၭလၧခီၫ့လန့ဘၪ အီၪဝ့ၫ နံၫနံၪ့ယူၭအကၠီၩ့ ကနံၪ့ယီၩနီၪမွဲလၧဆၧဆၫလၩ့ၡၩခွံၬဝ့ၫအကၠီၩ့တၭ ဒၪလၩ့ဎိၭထဲၩ့လိၭၥၭနီၪလီၫႉ လၧကဘျၩ့ယီၩ မးၥံၫဒဲၥဖၠးယီၩအဖၧၩ့ ဘၪၥီၪ့လိၪကၠၭအၥၭမန့လဲၪနီၪဘိၭ ဆရၫမိၩဇဲၫ စံၭဝ့ၫဒၪ ဘဲၫယီၩအၥိၭနီၪလီၫႉ

“ကနံၪ့ယီၩနီၪ  ၥၫ့ဎွၩဒိၪဖရၫ့စံၭ ထုၬထၪ့ထၬဝ့ၫ မွဲနံၪ့လၧ ဆၧလ့ၩဎုၬဆၧကၠၧၫ့ကၠၧၫ့ဆၧအီၪကီၪ့အနံၪ့ (အတူ တကွခရီးပြုနေသောအသင်းတော်နှစ်)တၭ ကနံၪ့ယီၩၥဖၠးကဘျၩ့နီၪ မွဲပဘၪမၩလိၪဆၧအဂဲးယီၩနီၪလီၫႉ ပမၩလိၪဘၪဆၧအဂဲးယီၩအခၫ ပန့ထဲၩ့ဘၪအခိးအတၩနီၪမွဲဝ့ၫဒၪ ပၧၩယီၩပအီၪဒၪပၧၩကဂၩန့လၧၩ့အ့ၬႉ ပကဘၪ လီၩ့လ့ၩစိၩလၧအခၫ့ထံၭ လၧၦဆူၩနဲၩဖိၪလဖၪအအီၪဂီၩ့ ပကဘၪဖီၪ့ထၪ့ဖံၭထၪ့ကၠၭဆၧအီၪကီၪ့အဆၧမၩလဖၪနီၪ ပၥ့ၪယၫဘၪလီၫႉ လၧအခီၩ့အိၩနီၪ ပခိၭနၪၥၫ့မုၥၫ့ခၫလဖၪအလူဂီၩ့ ပလ့ၩစဲၪ့လၩ့လၧ ၦဆူၩနဲၩဖိၪလဖၪအအီၪႇ ဘဲၫယီၩနီၪလမွဲလၧၩ့ဘၪဘဲၫနီၪဂီၩ့ ပလခွံၬၡိၭထၬဘၪဘၪ ၦဆူၩနဲၩဖိၪလဖၪဂီၩ့ လၧၦဆူၩနဲၩဖိၪၥံၪကၠၧၫ့ကၠၧၫ့ လၧBro, Srလဖၪကၠၧၫ့ကၠၧၫ့ ပကဘၪလ့ၩကၠၧၫ့ကၠၧၫ့ ပကဖီၪ့ထၪ့ဖံၭထၪ့မိဆၧအီၪကီၪ့အဆၧဖံၭဆၧမၩ ကၠၧၫ့ကၠၧၫ့ အဂဲးနီၪ မွဲပၥ့ၪယၫထၪ့ဘၪနီၪလီၫႉ”

ဂီၩ့နီၪ Fr.Henry Eikhlein ဆုးထဲၩ့စံၭဘၪဝ့ၫ “နံၪ့၂၀၂၁နံၪ့အထးဖၧၩ့ ဘဲၫၥၫ့ဎွၩဖရၫ့စံၭ ထုၬထၪ့ထၬဝ့ၫ ဆၧအီၪကီၪ့ဆရၫ ဆရၫမုၪလဖၪ အၥီၫ့ဆၧဖံၭဆၧမၩနီၪ ကထၪ့ဖျီၪအဂး မွဲပကဘၪကျ့ၭစၨၭထၪ့ဝ့ၫနီၪလီၫႉ ဆၧအ ယီၩနီၪမွဲလၧ ကမၩၥၫ့ထၪ့ထဲၩ့ ဆၧအီၪကီၪ့ဆရၫ ဆရၫမုၪလဖၪ အဆၧၥၭမၧၫ့နီၪလီၫႉ ဆၧအီၪကီၪ့ထၧၩ့ဒီၪ့ယၫယီၩ နီၪဆ့ ဘဲၫၥၫ့ဎွၩထုၬထၪ့ထၬအၥိၭနီၪ မွဲပကဘၪလီၩ့ခိၭနၪဖိၬထွ့ၪဂီၩ့ ပကဘၪမၩကဲၪထၪ့နီၪလီၫႉ ၦယူၬၥိၪနီၪ လၧၥိၪ ဖိၪလဖၪအဂး မွဲကဘၪဖ့ၪလၫ့လၩ့ၥၭနီၪလီၫႉ ပဘၪခိၭနၪၥၫ့မုၥၫ့ခၫအဆၧချဲၩ့ဂီၩ့ ပဘၪဖီၪ့ထၪ့ဖံၭထၪ့ကဆါယွၩ အ ဆၧဖံၭဆၧမၩအခၫ ပကဘၪယိလိၪယိဒီၩ့ ကဆါယွၩဂဲၫထဲၩ့ဖ့ၪလၫ့လၩ့ၥၭလဖၪႇ ဒဲ ကဆါယွၩအဆၧလ့ၩခိၪလ့ၩနါ လဖၪနီၪလီၫႉ လၧဆၧကၪဆၧဂဲၩလဖၪအကျၩ ဆုးထဲၩ့ဖ့ၪလၫ့လၩ့ကၠၭနၥံၪအၥၭနီၪဆ့ ယမိအၪ့ယၫဘၪနီၪလီၫႉ ဆၧကၪဆၧဂဲၩလဖၪ ဆၧၥုၪ့အုၭၥၭအုၭလဖၪနီၪ လမွဲဘၪပဆၧၥၭမၧၫ့တၡါတၭ ပဆၧၥၭမၧၫ့တၡါနီၪ မွဲဝ့ၫဒၪလၧ ဆၧၥုၪ့ဎွံၪၥၭယီၫႇ ဆၧမံၪ့ၥုၪ့မံၪ့ၥၭႇ ဆၧဎူၫဆၧဎၩ့ လဖၪနီၪလီၫႉ ပကဲၪဒၪ ဆၧဒဲၩဘၭဖိၪလဖၪလါနၫ့ ပကဘၪမွဲဝ့ၫဒၪ လၧဆၧထိးထဲၩ့တၩ့ထဲၩ့ကန့ဝ့ၫဒၪဆၧဒဲၩဘၭဖိၪလဖၪႇ ပကဘၪကဲၪဝ့ၫဒၪ ဆၧဒဲၩဘၭဖိၪလၧ ကဆါယွၩထိးဆၧၫ့န့ ဝ့ၫဒၪ ဆၧဒဲၩဘၭဖိၪလဖၪနီၪလီၫႉ ကဆါယွၩအဆၧကွဲၪဖျါခွံၬ အဆၧအွံၪၥၭဆၧၩ့အဖၫ့ခိၪ ပဝ့ၫၥံၪယီၩ ပကဘၪၥၭ ဎွံၪဝ့ၫဒၪနီၪလီၫႉ”

 လၧမးၥံၫဒဲၥဖၠးကဘျၩ့ယီၩအဖၧၩ့ ဒိၩ့ပၥံၫ့ဆၧအီၪကီၪ့ထၧၫ့ဒီၪ့ယၫ ဆၧအီၪကီၪ့ဆရၫႇမုၪလဖၪထီးလူၬ ဂဲၫ ထၪ့ဝ့ၫဖိၭဘိၭအဂၩ(၆၈)အဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ

11.5.2022