စ့ၩဘျံၭယူၩဘလံၫဒဲ ဆၧဒိၭန့ ဆၧအုၩ့လၩ့အဆိၪထုၬ

နံၪ့ ၂၀၂၂နံၪ့ လၩမ့ၫ ၂၅ၥၫ့လဂီၩခီၫနီၪ St.Paul ခရၧၩ့ Broနံၫဂၩနီၪ ထိးဆၧၫ့ဒိၭန့ ဆၧအုၩ့လၩ့အဆိၪထုၬ ဒဲ ၥၫ့ခၫ ကဂၩဒဲ Broကဂၩနီၪ ထိးဆၧၫ့ဒိၭန့ စ့ၭဘျံၭယူၩဘလံၫ မံဆၩဆၧလုထၪ့ ဆၧဎိၭထံၪဎိၭဒီၪ အီၪဝ့ၫဒၪလၧ ဒိၩ့ပၥံၫ့ဝံးႇ မြက်တိုႇ St.Paul ခရၧၫ့အီၪဝ့ၫဒၪလးဝၩ့နီၪလီၫႉ
ၦလၧအဒိၭန့ဘၪ စ့ၩဘျံၭယူၩဘလံၫနီၪမွဲဝ့ၫဒၪလၧ Fr.Thomas & Bro. Thimoty ဂီၩ့ ၦလၧအဒိၭန့ ဆၧအုၩ့ လၩ့အဆိၪထုၬကဆၫ့နီၪ မွဲဝ့ၫဒၪ Bro.Saw Charls Bo & Bro.John နီၪလီၫႉ ဆၧထံၪလၩ့ဒီၪလၩ့ကဘျၩ့ယီၩအဖၧၩ့ ကၫဒံၫနဲၫခၠၩမီၫ့ဘိၫ ဒဲ ၥၫ့ခိၪဒိၪ စီၩနီၩအ့ၩၥံၪ ဂဲၫထၪ့ဖ့ၪဂဲးဖ့ၪဘၭဝ့ၫဒၪနီၪလီၫႉ
ၦလၧအဂဲၫထဲၩ့ ၥုၪ့ကဲၪထၪ့ St.Paul ခရၧၫ့ယီၩနီၪ မွဲဝ့ၫဒၪလၧ ကၫဒံၫနဲၫခၠၩမီၫ့ဘိၫနီၪလီၫႉ ၥၫ့ခိၪဒိၪစီၩနီၩအ့ၩ စံၭ ဝ့ၫဒၪ ‘’ပကဲၪၦၡၩနီၪ ပကဘၪစံၭခိးစံၭတၩဆၧကဘၪၥ့ၪနီၪလီၫႉ ပကဲၪၦၡၩနီၪ ပမိအီၪမုၬမုၬၡုၪၡုၪကိၭဂၩဒ့ၭနီၪလီၫႉ အ့ၪမွဲနမိမုၬလၩနီၪ စံၭခိးစံၭတၩဆၧ အ့ၪမွဲၥ့ၪႇ အ့ၪမွဲနစံၭခိးစံၭတၩဆၧၥ့ၪနီၪ နကမုၬလၩဘၪနီၪလီၫႉ ဆၧထယီၩ ဆၧအၪ့ စၪ့ကအီၪကမံၩ့နီၪ ဆၧမုၬပၥၭအကၠီၩ့ ပစံၭခိးစံၭတၩဧၪ ပစံၭခိးစံၭတၩအကၠီၩ့ ဆၧမုၬပၥၭဧၪ နီၪလီၫႉ
ပဖိၬလၫ့ကဆါယွၩအခဲၫ့နီၪ လမွဲဘၪၦအလီၩ့လ့ၩဆၧယိၩယိၩဖိၪလဖၪနီၪလီၫႉ ပဖိၬလၫ့ကဆါယွၩအခဲၫ့နီၪ မွဲဝ့ၫဒၪ ၦအလီၩ့ဘၩကၠဲၬလဖၪနီၪလီၫႉ ဆၧအယီၩနီၪ မွဲပဖီၫထုၪ့နီၪလီၫႉ ယၧၩယီၩမွဲၦအဖိၬဆၪ့ကဆါယွၩအခဲၫ့ဧၪ မွဲၦ လၧအဖ့ၪဂဲးဖ့ၪဘၭ ကဆါယွၩဧၪႉ အ့ၪမွဲပယိၭထုၪ့စူၪယၫလနၧၩ့ဘၪနီၪ ပစံၭလၩ့ပၥၭလၧ ပလီၩ့ဖိၬကဆါယွၩအခဲၫ့ လန့ ဘၪနီၪလီၫႉ လခဲၫ့ထုၬယမိလီၩဘၪနီၪ ပကၥ့ၪယၫလၩ့ကၠၭပၥၭထံၪထံၪဆၭဆၭဆံၭႉ ပၧၩယီၩ မွဲၦအလီၩ့ဖိၬ ကဆါယွၩ အခဲၫ့ဧၪ အ့ၪလမွဲဘၪဘိၭ ပၧၩယီၩပမွဲလၧ ကဆါယွၩအခမျၧးဧၪႉ’’
လကၭဒံၭဘၪ Bro.Thimothy စံၭဝ့ၫဒၪ ‘’ယၧၩနီၪမွဲလၧ ယမိမိနီၪအီၪဖျဲၪထၪ့န့ယၧၩဂီၩ့ ကဆါယွၩနီၪ ဘုၪလၩ့ ယၧၩနီၪလီၫႉ ယထၪ့တၩ့ဖၨၪဆၧမၩလိၪဂီၩ့ ယထီၩ့စိၩလၧ မၠီၩ့မၠၭနီၪလီၫႉ ယထီၩ့လၧနီၪအခၫ ၦလၧအဘၪယိပၧၩ ၦလၧ အဖ့ၪလၫ့ပၧၩ ဆၧဒီၩ့ဆၧထ့ၬအဂ့ၩအဘွၩလဂၩမွဲဝ့ၫဒၪ Bro.အလိုက်စီ နီၪ ယစံၭခိးစံၭတၩဘၪ ဒိၪဒိၪဒ့ၭနီၪလီၫႉ လၧယမ့ၬၥၪဖၧၩ့ ယဒၪဖျးထၪ့ထဲၩ့ဘၪ ဆၧလၩ့ဆၫ့ကမံၩ့နီၪ အဝ့ၫယီၩ အီၪအၪ့လၧဆၧၡၪ့ၡၪ့ယၬယၬအဖၧၩ့ န့ဝ့ၫအၪမၬ လီၫႉ အဝ့ၫအခၪ့ဖံၭကခိၪနီၪမွဲဝ့ၫလၧ တၫယၫခၪ့ဖံၭ ဒၧၩ့ဝ့ၫဒၪ ကအီၪ စူၪမုကမုနီၪလီၫႉ ဖၪ့ဖံၭအနီၪအဝ့ၫၥိၭ အခၪ့ဆၫ လဆၫနီၪ ယၥ့ၪယၫအ့ၬ ခၪ့ဖံၭအနီၪ အဝ့ၫၥိၭဝ့ၫဒၪကအီၪ ၄နံၪ့၅နံၪ့နီၪလီၫႉ ယမိလီၩနီၪ ၦလၧအယိပၧၩလဂၩယီၩ ဂဲၫထဲၩ့အီၪအၪ့ယိၩယိၩဖိၪလီၫ ဂဲၫထဲၩ့အီၪချံၫ့ချံၫ့လီၫ ဂဲၫထဲၩ့ထိးၡၪ့ထိးယၬအၥၭလၧယမ့ၬၥၪဖၧၩ့အကၠီၩ့ ယရွံထၪ့ဖၧၩ့ ၥၭယီၩအခၫ ဆၧအဂဲးလဖၪနီၪ မွဲကပၫထဲးဆ့ ယဆီၪ့မီၫ့ဘၪ ဘဲၫနီၪလီၫႉ ဆၧနီၪအကၠီၩ့လၧ ယဂဲၫထဲၩ့ဖီၪ့ထၪ့ဖံၭထၪ့ ကဆါယွၩအဆၧဖံၭဆၧမၩ၂၅နံၪ့အထးဖၧၩ့ယီၩ ယဘၪထိးဆၧဆၫဎိၩဎိၩဒိၪဒိၪအီၪနးမံၩ့အ့ၬႉ တခၩကမွဲဆၧနးမံၩ့နီၪ မွဲ လၧကဆါယွၩအခိးအတၩအကၠီၩ့ ယကဘၪဖ့ၪဆၧၫ့ထဲၩ့နီၪ အီၪဝ့ၫဒၪအၪမၬဒဲ ဆၧကိၭမံၩ့အဂး ယစံၭခိးစၭတၩ ကဆါ ယွၩ ဒိၪမၬနီၪလီၫႉ‘’
မံဆၩဆၧလုထၪ့စၭထၪ့ဝ့ၫဒၪလၧလဂီၩ၇နၩရံၫနီၪ ဂီၩ့ခွံၬဝ့ၫဒၪလၧ လဂီၩ ၁၁ခီၫအခံၫ့အဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ
နးအဲၪဖီၫဘွၩ
25.5.2022