စိန်ဖရန်စစ်ဇေးဗီးယဲစစ္စတာရ်အခရၧၫ့ ဂဲၫထဲၩ့အီၪၥုၪ့လၩ့ထၬၥၭ အီၪထၪ့ဘၭနံၪ့၁၂၅ယူၩဘလံၫ

စိန်ဖရန်စစ်ဇေးဗီးယဲစစ္စတာရ်အခရၧၫ့ယီၩ စၭထၪ့လၧ နံၪ့ ၁၈၉၇ လၩအီဂၭ၂၆ၥၫ့အိၩ အီၪဂဲၫကဲၪထၪ့ဝ့ၫဒၪလၧ Bp. Alexa nder Cardot အဆၧလ့ၩခိၪလ့ၩနါအဖၧၩ့ႇ ဒဲ St.Joseph Srလဖၪ အဆၧမၩဆၧၩ့အဖၧၩ့နီၪလီၫႉ လၧနံၪ့၂၀၂၂နံၪ့ လၩအီဂၭ ၂၆ၥၫ့ ယီၩနီၪ ၦၡၩမၩလၩမၩဖၩ့ ၁၂၅နံၪ့ထၪ့ဘၭ ယူၩဘလံၫလၧ ဒိၩ့ပၥံၫ့ St.Peter Cathedrial ၥရိၬလးဝၩ့ႇ SFX Srၥံၪအဝးဖၧၩ့နီၪလီၫႉ
“ ဘဲၫယီၩ စိန်ဖရန်စစ်ဇေးဗီးယဲစစ္စတာရ်အခရၧၫ့ယီၩ ကဲၪထၪ့ၥံၪ့ထံၭလၧ အလၧၫ့ဎွ့ၩ ဆၧၥူၫဆၧၥၪ ဆၧဒိၭဆၧလၪ ကထံၭ ယူၭအဂဲးႇ စိန်ဖရန်စစ်ဇေးဗီးယဲစစ္စတာရ်အခရၧၫ့ဖိၪလဖၪယီၩနီၪ လၧဆၧအလးအၪလးဖၧၩ့ လီၩ့ဖီၪ့ထၪ့ဖံၭထၪ့ကဆါယွၩ အဆၧဖံၭ ဆၧမၩလဖၪအဂဲးႇ အဝ့ၫၥံၪအဆၧထိထီၫနီၪမွဲဝ့ၫဒၪ “အီၪက့ၪကၧၩ့ဖျိၪ့ၥၭလၧ မိဆၧအီၪကီၪ့လဖျိၪ့ဎး” အဂဲးႇ ခရၧၫ့အနးၥၭ ဆၧဆိၪ ဂ့ၩဆိၪဘွၩနီၪဘိၭ မွဲလၧနးဆါၥၧၫ့ဂၩယွၩလဂၩအစီၩ့အမၩ့အကၠီၩ့ လၧဆၧထိးၡၪ့ထိးယၬအဖၧၩ့ ကဘၪဖ့ၪလၫ့လၩ့ၥၭလၧ ၦအဆံၭထုၬ လဖၪအဂးအဂဲးႇ အဝ့ၫၥံၪအဆၧဖံၭဆၧမၩလဖၪနီၪ ၥီၪ့ၥၫ့အ့ၪၦဆူၩနဲၩဖိၪလဖၪ ယွၩလူယွၩထၫႇ ယိထဲၩ့ခွါထဲၩ့ၦမုၪဖိၪလဖၪႇ ၦလၧဘၪ အီၪလၩ့စဲၪလဖၪအဂး ဝဲလၫ့ထၬဆၧဆၫဒုၭလဖၪႇ ယိထဲၩ့ခွါထဲၩ့ဖံၫဖူၫၥၭၡါလဖၪႇ လီၩလၩ့လၬလၩ့ ဆၧၥၭထိၭပရၧၫ့ လၧRVA Media လဖၪႇ ဆၧအီၪကီၪ့ကလ့ၩထၪ့လ့ၩထီၫအဂး မၩဆၧၩ့ဝ့ၫဒၪဘဲၫအဝ့ၫၥံၪအဆၧၥ့ၪဆၧဘၪအီၪအၥိၭႇ လၧဆၧကၪဆၧဂဲၩအဖၧၩ့ လၧဆၧဒုၭ ဆၧခၭလဖၪအဖၧၩ့ ဘၪဂဲၫထဲၩ့ထိးၥံၫၥၭအီၪဝ့ၫဒၪအဂဲးႇ ဖျိၩ့ဒဲပယၩ့ဆၧတုၩ့ထၪ့တုၩ့လၩ့အထီ မၠီၩ့မၠၭဆၧအီၪကီၪ့ဖၧၩ့ စစ္စတာရ်၃ဂၩနီၪ လၧၦဆူၩနဲၩဖိၪလဖၪဒဲၥၫ့မုၥၫ့ခၫလဖၪကၠၧၫ့ကၠၧၫ့ ဘၪထိးမၩၥံၫၥၭဒဲ လၧၥၭဆွံခီၫ့ဆၧအီၪကီၪ့ဖၧၩ့ စစ္စတာရ်၂ဂၩနီၪ ဘၪထိးမၩၥံၫၥၭ အဂဲးႇ လါနၫ့အဝ့ၫၥံၪအခရၧၫ့ဖိၪလဖၪယီၩ လယိလၩ့ဘၪအၥၭဒဲ ၦဆူၩနဲၩဖိၪလဖၪအဂး ဂဲၫထဲၩ့ဖ့ၪလၫ့လၩ့ၥၭ ထီးမုဆၫကနံၩယီၩ အဂဲးႇ မုဆၫကနံၩယီၩ စိန်ဖရန်စစ်ဇေးဗီးယဲစစ္စတာရ်အခရၧၫ့ယီၩ ဂဲၫထဲၩ့အီၪၥုၪ့လၩ့ၥၭ ထၪ့ဘၭ၁၂၅နံၪ့ယီၩနီၪ မွဲလၧကဆါယွၩ အခိး အတၩအဂဲးႇ စံၭခိးစံၭတၩဘၪ ၦလၧအဂဲၫထဲၩ့ၥုၪ့လၩ့ထၬခရၧၫ့ယီၩ Bp. Alexander Cardotဒဲ မုကနံၩယီၩနၪ့ထၪ့ဝ့ၫအၪမၬအဂဲးႇ ၥၫ့ခိၪဒိၪလၧအကိၭဖံၭၥိၭအဝ့ၫၥံၪအခရၧၫ့လၧ ကဖီၪ့ထၪ့ဖံၭထၪ့ကဆါယွၩအဆၧဖံၭဆၧမၩအဂးလဖၪဒဲ ၦလၧအဂဲၫဖ့ၪလၫ့လၩ့ၥၭ ထၧၫ့ ဖုဝဲမုၪ Sr ထီးလူၬနီၪ စံၭခိးစံၭတၩဝ့ၫအဂဲး SFX ခရၧၫ့ခိၪနါလဂၩမွဲဝ့ၫ Sr.Rose Philip Nan Nwe Pyone စံၭဝ့ၫဒၪနီၪလီၫႉ
လကၭဒံၭဘၪ SFX ခရၧၫ့ခိၪနါဒိၪထုၬလဂၩမွဲဝ့ၫ Mother အန်းထရေဇားနီၪ စံၭဝ့ၫဒၪ “မုဆၫကနံၩယီၩဆၧၫ့ထီနီၪ လၩ့ၥၭအုၭ ဝ့ၫဒၪနၬမၬဒ့ၭအဂဲးႇ လါနၪ့ဆၧအယီၩနီၪ လမွဲဘၪဖၧၩ့ၥၭအထုၬအဂဲးႇ ၦအၥ့ၪဆၧထီးလူၬနီၪ မွဲဝ့ၫဒၪကဆါယွၩအဂဲးႇ မုဆၫကနံၩယီၩ SFX Srလနၩ့နၩ့နီၪ ဘၪအီၪလၧဆၧဒုၭဆၧခၭအကျၩအဂဲးႇ လၧထံၪခးဖိၪလဖၪကၠၧၫ့ကၠၧၫ့ ပဘၪၥုၪ့အုၭၥၭအုၭဝ့ၫဒၪကိၭဂၩလါနၫ့ လခဲၫ့ ထုၬနီၪ လၧထံၪခးဖိၪၥံၪကၠၧၫ့ကၠၧၫ့ မွဲပကၥုၪ့ဎွံၪၥၭယီၫထဲၩ့ဘၪအဂဲးႇ ဂံၪ့ဒီၪ့ဖိၪလၧအဘၪလၩ့ပြံၩပြၩလဖၪ ကဒၪထဲၩ့ဘၪလိၬၥၭအဂဲးႇ ကအီၪထဲၩ့ဘၪကၠၧၫ့ကၠၧၫ့အဂဲးႇ လခဲၫ့ထုၬနီၪကဆါယွၩ ကဖ့ၪလၫ့ထဲၩ့ပၧၩ ဆၧအဂ့ၩထုၬအဂဲးႇ Srလဖၪနီၪ ကြၨၭလအီၪက့ၪထၬဘၪ ဆၧအဲၪလၩ့ၥၭႇ ၥၭဘုၭထၬၦၡၩ(ပုဂ္ဂိုလ်စွဲ)ႇ ၥၭဘုၭထၬလးကျဲၩ့(နေရာဒေသစွဲ) ဂီၩ့ ကဘၪဖီၪ့ထၪ့ဖံၭထၪ့ကဆါယွၩအဆၧဖံၭဆၧမၩ အဂဲးႇ ဘဲၫBp.Alexander Cardot ဂဲၫထဲၩ့ခွံၬလၩ့ထၬၥနိၫ့လဖၪအၥိၭ ကဘၪခိၭနၪဝ့ၫဒဲ လီၩ့မၩဖိၬထွ့ၪဝ့ၫအဂဲး” အဝ့ၫယီၩ အၪ့ယၫ ထၪ့ဘၪ အခရၧၫ့ဖိၪလဖၪဘဲၫယီၩအၥိၭနီၪလီၫႉ
နးအဲၪဖီၫဘွၩ