စိန်ဖရန်စစ်ဇေးဗီးယားSrခရၧၫ့ဖၧၩ့ Srအဆံၭလဖၪ ဘၪထိးၥီၪ့လိၪအၥၭ ဆၧဘိၪ့ဆၧဘၩဖၭဒိၪ၄ဖၨၪအဂဲး

လၧနံၪ့၂၀၂၂နံၪ့ လၩစဲၭတံၫ့ဘၧၫ၅ၥၫ့ ဒဲ ထီၩ့စိၩလၧ လၩအိၭတိၫဘၧၫ ၁၄ၥၫ့အထီနီၪ စိန်ဖရန်စစ်ဇေးဗီးယားSrခရၧၫ့ဖၧၩ့ Srအဆံၭလဖၪႇ ၦလၧကမိကဲၪထၪ့Srလဖၪအဂး ထၪ့ဆၧမၩလိၪၦမုၪဖိၪၥံၪလဖၪနီၪ မွဲလၧခရၧၫ့အဆၧဆၫ့ထွ့ၪအဖၧၩ့ ဘၪမၩ လိၪအၥၭ ဆၧဘိၪ့ဆၧဘၩအဒိၪထုၬ ၄ဖၨၪအဂဲးနီၪလီၫႉ

      အဝ့ၫၥံၪယီၩ ဘၪမၩလိၪထၪ့ဆၧအလးနီၪဘိၭ မွဲဝ့ၫဒၪလၧ ဝင်လိုသူလဖၪ အီၪအလးနီၪလီၫႉ ၦလၧထၪ့ၥဖၠးယီၩနီၪ ကအီၪဝ့ၫဒၪဖိၭဘိၭအဂၩ၃၀နီၪလီၫႉ လၩစဲၭတံၫ့ဘၧၫ၅ၥၫ့ဒဲထီၩ့စိၩလၧ၁၉ၥၫ့နီၪ ဘၪမၩလိၪထၪ့ အစ္စလမ်ဆၧဘိၪ့ဆၧဘၩ အဂဲး နီၪလီၫႉ လၩစဲၭတံၫ့ဘၧၫ၂၀ဒဲထီၩ့စိၩလၧ၂၉ၥၫ့နီၪ ဘၪမၩလိၪ ဘူၭဒၭဆၧဘိၪ့ဆၧဘၩ အဂးနီၪလီၫႉ လၩအီၭတိၫဘၧၫ ၆ၥၫ့ထီၩ့စိၩ လၧ ၁၄ၥၫ့အထီနီၪ ဘၪမၩလိၪ ဟံၫ့ဒူၫဆၧဘိၪ့ဆၧဘၩအဂဲးနီၪလီၫႉ

         လၧၥဖၠးလဖၪနီၪအဖၧၩ့ ဆၧဘိၪ့ဆၧဘၩလဖၪအီၪဂဲၫစၭထၪ့ဝ့ၫဒၪအဂဲးႇ ၦအဂဲၫစၭထၪ့ၥုၪ့လၩ့ထၬဆၧဘိၪ့ဆၧဘၩလဖၪ ဂဲၫထဲၩ့ကျ့ၭစၨၭခိးဂဲးထၪ့တရၩဘဲၫၥ့ၪလဲၪအဂဲးႇ ဆၧဘိၪ့ဆၧဘၩအဆၧၥီၪ့ဆၧၥၫ့လဖၪႇ ဆၧဘိၪ့ဆၧဘၩ၄ဖၨၪ စူၭကီၪ့မၩဎိၭ လၩ့ဆၧလဖၪနီၪဘၪထိးၥီၪ့လိၪအၥၭအဂဲးႇ လၧဆၧအဲၪဆၧကွံၩအဖၧၩ့ ၦၡၩလဖၪကဂၩဒဲကဂၩ ကဘၪအဲၪလိၬကွံၩလိၬၥၭ ကဘၪဖ့ၪအ့ၪလိၬၥၭဆၧနၪၥ့ၪ ကဘၪယူၭယၪ့လိၬၥၭ ဆၧလဖၪယီၩအ့ၪအီၪမၬ စၭထၪ့လၧ ခးပယၩ့ ထီၩ့စိၩလၧ ဂၪ့ခိၪထၧၫ့ ဘံၪ့ယၫ ပၥုၪ့ထၪ့ဆၧဎူၫဆၧဎၩ့ကန့ဂီၩ့ လခဲၫ့ထုၬအ့ၪမွဲပၥံၫကကၠၪဆ့ မွဲပကထဲၩ့အီၪဘၪလၧဆၧမုၬဆၧၡူၪဖၧၩ့အဂး ပအီၪ က့ၪထၪ့ဆၧထိစိၩဘဲၫယီၩၥိၭဂီၩ့ ပၥီၪ့အ့ၪဘၪအဝ့ၫၥံၪ ဆၧဘိၪ့ဆၧဘၩ၄ဖၨၪယီၩလီၫအဂဲး Sr.Martha အားပိုင် စံၭဝ့ၫဒၪ နီၪလီၫႉ

        ယထၪ့ဘၪၥဖၠးယီၩအကၠီၩ့ အဆိၪထုၬယၥၭဎွံၫအၪမၬအဂဲးႇ ဘၪနီၪလဲၪနီၪ ဆၧဘိၪ့ဆၧဘၩအဂဲးလၧ ပလၥ့ၪယၫဒံၭ ဘၪလဖၪနီၪ မွဲပၥ့ၪယၫထၪ့ဘၪႇ အကၧၩ့ဒိၪထုၬနီၪ ပဆၧဘိၪ့ဆၧဘၩ ပဆၧဆူနဲၩအစၩ့ထံၫလဖၪနီၪ ပဂဲၫၥ့ၪယၫထၪ့ထဲၩ့ အၪအၪ လကၭဘၪ ဆၧဘိၪ့ဆၧဘၩဂူၫဂၩ အဆၧဆူနဲၩလဖၪႇ အဆၧအီၪမၧၫ့အီၪဒီၩ့လဖၪႇ အၥနိၫ့လဖၪႇ လုၫလါထူၫရူၫလဖၪ နီၪဆ့ မွဲပၥ့ၪယၫအၪထၪ့ဘၪအဂဲး Sr.စီစီလျား မိုရင်းနီၪ စံၭဝ့ၫဒၪလီၫႉ

        ဆၧဘိၪ့ဆၧဘၩကိၭဖၨၪဒ့ၭနီၪ မွဲၥီၪ့ၥၫ့ဘၪဝ့ၫအဆၧဂ့ၩဆၧဘွၩလဖၪ လကၭဘၪ မုလါဝ့ၫဒၪ မွဲဆၧအဂ့ၩ ကကဲၪထၪ့ အဂးလီၫႉ ဂီၩ့နီၪၦလၧအဂဲၫၥီၪ့ၥၫ့အ့ၪပၧၩ ဆၧဘိၪ့ဆၧဘၩအဂဲးလဖၪမွဲဝ့ၫ ဘူၭဒၭၥၫ့ခၫႇ မွတ်ဆလင်ဆၧရၫ ဒဲ ဟိန္ဒူ ဆရၫမုၪ လဖၪနီၪ ပယိထၪ့အခၫ ပဒၪဘၪအဝ့ၫၥံၪ အၥုၪ့ဎွံၪအၥၭယီၫဝ့ၫဒၪနီၪလီၫႉ လၧပမိဆၧအီၪကီၪ့အဖၫ့ခိၪ လၧပခရၧၫ့အဖၫ့ခိၪ အဝ့ၫၥံၪ အီၪက့ၪဖိၪလိၪဝ့ၫအဂဲး Sr.မိုရင်းယီၩ ဆုးထဲၩ့စံၭဘၪဝ့ၫနီၪလီၫႉ

      ၦလၧ လကဲၪထၪ့ဒံၭဘၪ Srလဂၩနီၪ စံၭဘၪဝ့ၫ ဆၧဘိၪ့ဆၧဘၩကိၭဖၨၪဒ့ၭ အဖီၫတၧၩ့နီၪ မွဲဒၪလၧ ဆၧအဲၪဆၧကွံၩလီၫနီၪ ပဒၪထၪ့ဘၪအဂဲးႇ ဖၧၩ့ၥၭလမီၪ့ဎီၩ့ဘၪလါနၫ့ ဖီၫတၧၩ့နီၪ မီၪ့ဎီၩ့ဝ့ၫဒၪလီၫအဂဲးႇ ဆၧဘိၪ့ဆၧဘၩလမီၪ့ဎီၩ့ဘၪအကီၠၩ့ ပအီၪက့ၪ ဖၨၪထီၫလိၬၥၭ ပယူၭယၪ့လိၬၥၭအ့ၬ ဆၧဖံၭဆၧမၩဘဲၫယီၩၥိၭလဖၪနီၪ ပကဘၪ ဂၭဎ့ၭဝ့ၫဒၪအဂဲး ဆၧဘိၪ့ဆၧဘၩကိၭဖၨၪဒ့ၭ အဆၧၥီၪ့ဆၧၥၫ့လဖၪနီၪ ပလကြၨၭအၪ့ကီၪဘၪဒဲ ပကဘၪထိးဆၧၫ့ဝ့ၫဒၪအဂဲး ပကဘၪယူၭယၪ့ဝ့ၫဒၪအဂဲး စံၭဝ့ၫနီၪလီၫႉ

       လၧၥဖၠးအဖၧၩ့Srလဖၪဒဲ ၦလကဲၪထၪ့ဒံၭဘၪSrလဖၪနီၪ ဘၪလ့ၩဂၭကွ့ၩစိၩလၧ ဟိန္ဒူၥရိၬဖၧၩ့ဂီၩ့ ဆၧဘိၪ့ဆၧဘၩ ဂူၫဂၩနီၪ ကိၭဖံၭၥိၭအဝ့ၫၥံၪလါနၫ့ မွဲလၧဆၧအဂဲးအမံၩ့မံၩ့အကၠီၩ့ လ့ၩဝ့ၫလထီၩ့ဒံၭဘၪဒဲလခဲၫ့နီၪ အ့ၪမွဲအခွးအီၪနီၪ ကလ့ၩ ဂၭကွ့ၩလီၩ့အၪ့ဎူၫအၪ့ဎၬစိၩဝ့ၫအဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ