ဂၪ့ခိၪထၧၫ့ဘံၪ့ယၫ ဖံၫဖူၫၥံၪ ဒဲ ၦၥုၪ့က့ၭၥၭၡါၥံၪအမုနံၩအခၪ့ထံၭလဘျၩ့

ဂၪ့ခိၪထၧၫ့ဘံၪ့ယၫ ဖံၫဖူၫၥံၪ ဒဲ ၦၥုၪ့က့ၭၥၭၡါၥံၪအမုနံၩအခၪ့ထံၭလဘျၩ့ယီၩ ကဘၪဆၧမၩလၩမၩဖၩ့ဝ့ၫ လၧလၩယူၫလဲၫ့ ၂၅ ႇ ၂၀၂၁နံၪ့ နီၪလီၫႉ

  ၦဆူနဲၩဖိၪႇ ဂံၪ့ဒီၪ့ ဒဲဆၧၥၭမၧၫ့ အဂး ဗၫတံၫကၫ့ ဆၧမၩလး ဘိၭဘၪၥ့ၪယၫထၪ့လၧဆၧပရၧၫ့ဖၧၩ့ လၧအနၠါမုနံၩ လၩအ့ၩဖြံၫထၪ့ ၂၀ နီၪလီၫႉ

လၧဆၧမၩလၩမၩဖၩ့    မုနံၩယီၩအဂးႇ ၥၫဎွၩဒိၪ ဖရၫ့စ့ၭ ရွံန့အမံၩ့ႇ “ယအီၪလၧနၥံၪအၥိၭ ကိၪမုနံၩမုနၩဒ့ၭ ထီးဂၪ့ခိၪယီၩအထုၬလီၫႉ(စမၭၥုၫ ၂၈:၂၀)

ကဆါယွၩ ဒဲဆၧအီၪကီၪ့ယီၩ အီၪကၠၧၫ့ကၠၧၫ့ႇ အီၪဘူၭခိၪလၧ ၦၥုၪ့က့ၭၥၭၡါၥံၪႇ လၩ့ဆၫ့ဒၪဆၧ လၧကိၫဗံၭဆၧဆၫ ဆၧကၪဆၧဂဲၩ အဆၧၫ့အထီအဖၧၩ့ယီၩလီၫႉ

“ယအီၪလၧနၥံၪအၥိၭ ကိၪမုနံၩမုနၩဒ့ၭ ထီးဂၪ့ခိၪယီၩအထုၬလီၫ” ဆၧချဲၩ့ယီၩ မွဲဝ့ၫဆၧယိလါဒဲဆၧအီၪဘူၭခိၭ ဆၧအုၩ့လၩ့ဆၧချဲၩ့ လၧၦၥုၪ့က့ၭၥၭၡါၥံၪဒဲ ၥၭဘၪ့ၥံၪအဂးလီၫႉ

ဖိၪၥံၪလံၩၥံၪဒဲ ၥၭဘၪ့ၥံၪလဖၪ ကအီၪလၧၦၥုၪ့က့ၭၥၭၡါၥံၪအဂး ဘၪဆၧဖံၭၥိၭဝ့ၫလီၫႉ ဖံၫၥံၪဖူၫၥံၪဒဲ ၦၥုၪ့က့ၭၥၭၡါၥံၪလဖၪဆ့ ကလီၫလၩ့လၬလၩ့ဆၧၥၭထိၬပရၧၫ့အဂးႇ ဆၧဘၩဆိၪဖၪဆၧအဂးႇ  ဒဲကဖ့ၪဂဲးဖ့ၪဘၭၦၥၭ ဘၪ့ဖိၪၥံၪ လၧဆၧဆူနဲၩဖၧၩ့အဂး အမူၩဒၩအီၪဝ့ၫလီၫႉ

ဘဲၫၥိၭ ကဖ့ၪဂဲးဖ့ၪဘၭ ဆၧမၩလၩမၩဖၩ့ ဖံၫဖူၫၥံၪအမုနံၩယီၩ လၧဆၧအီၪကီၪ့ဖၧၩ့ႇ ခရၧၫ့ဖၧၩ့အဂးႇ  ၦဆူနဲၩဖိၪႇ ဂံၪ့ဒီၪ့ ဒဲဆၧၥၭမၧၫ့အဂး ဗၫတံၫကၫ့ ဆၧမၩလး ကဖ့ၪလၫ့အၪ့နၩ့ဆၧဎိၪထံၫဎိၭဒီၫ့လဖၪ စၭထၪ့လၧ လၩယူၫ ၁၅ ၥၫ့နီၪလီၫႉ ဆၧဎိၭထံၫဎိၪဒီၪလဖၪယီၩ ကဖျီၪ့ထၪ့လၧဝဲၭဆဲၬ www.amorislaetitia.va အဖၪ့ခိၪလီၫႉ