ခၩ့ခိၪဒိၪရှင်ဇိုအာဘေးအဂး ၥၫ့ဎွၩဖရၫ့စံၭ အၥၭလမုၬဘၪအဂဲး

ဂၠပၫ့ခၩ့ခိၪဒိၪအလံၩလဂၩမွဲဝ့ၫ ရှင်ဇိုအာ‌ဘေးဘၪထိးခၭၥံၫအၥၭလၧကျီၩ့အကၠီၩ့ ၥၫ့ဎွၩဖရၫ့စံၭအၥၭလမုၬဘၪအဂဲး စံၭဝ့ၫဒၪနီၪလီၫႉ လၧအဖီၩ့ခွံၬလၩယူၩလဲၫ၈ၥၫ့ အၥၧၭမုနံၩအိၩ ခၩ့ခိၪဒိၪယီၩ ဘၪထိးခၭၥံၫအၥၭဂီၩ့ ၥၫ့ဎွၩၥိၫ့စိၩလံၬပရၧၫ့လၧ အဝ့ၫအဂံၪ့ဒီၪ့ဖိၪၥံၪအအီၪနီၪလီၫႉ

လၧလံၬပရၧၫ့အဖၧၩ့နီၪ ၥၫ့ဎွၩကွ့ၭထၬဝ့ၫ “ခၩ့ခိၪဒိၪအလံၩရှင်ဇိုအာ‌ဘေးဘၪထိးမၩၥံၫၥၭအဂဲး အဝ့ၫနါဂၧၫ့ဝ့ၫအခၫ အၥၭလမုၬဘၪဒဲ အၥၭဘၪထံၭဝ့ၫနၭမၬနီၪလီၫႉ မွဲလၧဆၧအဂဲးယီၩအကၠီၩ့ ဂၠပၫ့ထံၪခးဖိၪၥံၪအကျၩ ဆၧဎူၫဆၧဎၩ့ ကအီၪထၪ့ အဂးဒဲ ဆၧမၩဆီၪ့မၩနီၩ့လိၬၥၭလအီၪဘၪအဂးဆ့ ၥၫ့ဎွၩအၪ့ကံၩ့ဘၩဆိၪဖၪအ့ၪအဂဲး”  ကွ့ၭလၩ့ထၬဝ့ၫနီၪလီၫႉ

ခၩ့ခိၪဒိၪအလံၩရှင်ဇိုအာ‌ဘေးနီၪလၧအဖီၩ့ခွံၬလၩယူၩလဲၫ့၈ၥၫ့ဒၪအိၩ ဘၪထွ့ၪလၧၦၡၩကဘၪခွံၬဆၧဖၭဘိၪ့အဂး လီၩလၩ့လၬလၩ့ဆၧအထီ ဘၪထိးခၭၥံၫအၥၭနီၪလီၫႉ အဝ့ၫယီၩလၧဂၠပၫ့ထံၪခးဖၧၩ့ ခၩ့ခိၪဒိၪလဖၪအကျၩ မွဲၦအဂဲၫထဲၩ့ ဖီၪ့ ထၪ့ဖံၭထၪ့ ခၩ့ခိၪဒိၪကဂၩအဆၧဖံၭဆၧမၩအယံၭထုၬ ခၩ့ခိၪဒိၪကဂၩနီၪလီၫႉ

ဘၫတံၫကၫ့ နဲၩရွဲၩလဂၩမွဲဝ့ၫ ၥၫ့ခိၪဒိၪ Paul Richard Gallagher နီၪစံၭဝ့ၫဒၪ “ခၩ့ခိၪဒိၪယီၩအဂး အဝ့ၫအၥၭလမုၬ ဘၪအဂဲးႇ အဝ့ၫလ့ၩထီၩ့စိၩလၧ ဂၠပၫ့ထံၪခးအထီအိၩ ဒၪလၩ့ဎိၭဘၪလိၬၥၭအဂဲးႇ ခၩ့ခိၪဒိၪယီၩ မွဲလၧဂၠပၫ့ထံၪခးဖၧၩ့ ၦအစီၩ့ အမၩ့ဎိၩဒိၪဝ့ၫဒၪကဂၩအဂဲးႇ အဝ့ၫအထံၪခးဖိၪလဖၪ ကဒိၭန့ဘၪအခိးအတၩ ဂ့ၩဂ့ၩဘၪဘၪအဂး ဂဲၫထဲၩ့ခိးဂဲးခိးဘၭထၬ ဝ့ၫဂ့ၩဘၪစဲၪအဂဲး”စံၭဝ့ၫဒၪနီၪလီၫႉ

နးအဲၪဖီၫဘွၩ

၁၂ႉ၇ႉ၂၀၂၂