ခးၥဲၫ့ထၧၫ့ဘံၪ့ယၫအဖၧၩ့ ၦဎြံၬဖိၪလဖၪဘၪထိးမၩၥံၫအၥၭ ကနံၩ ၁၃ ဂၩအဂဲး

အိၩ့ပၩ့ဒီၩခရၧၫ့အဆၧထုၬဖျီၪထၪ့လၧ ၂၀၂၁ န့ၪ့စရၫ့အဖၧၩ့ ၦဎြံၬဖိၪၥံၪလၧအဘၪထိး မၩနၧၩ့မၩစၪၥၭ အဘၪထိးမၩၥံၫၥၭ အအၪထုၬထံၫခး (၅၀)  နီၪ ထုၬဖျီၪထၪ့ထၬဝ့ၫနီၪလီၫႉ

ခးၥဲၫ့ထၧၫ့ဘံၪ့ယၫအဖၧၩ့ ၦဎြံၬဖိၪလဖၪနီွ ဘၪထိးမၩၥံၫအၥၭ ကနံၩနီၪ ကအီၪဖိၭဘိၭ ၁၃ ဂၩ အဂဲး ၦဎြၬဖိၪဖိၭဘိၭ ၁၂ ဂၩနီၪ ဘၪထိးဖီၪ့အၥၭဂိၩ့ ဘၪဆၧခွံၬလၩ့လၩဆၧဒုၭဎၭလးဖၧၩ့ကိၭဒံၩဂီၩ့ ၅ ဂၩနီၪဘၪထိးဖီၪ့အၥၭလၧၦအၧၫ့ၦၥၫ့လဖၪအစူၪဖၧၩ့အဂဲး လၧစရၫ့ဖၧၩ့နီၪထုၬဖျီၪထၪ့ထၬဝ့ၫနီၪလီၫႉ ဘဲၫစရၫ့နီၪအဆၧထုၬဖျီၪထၪ့အၥိၭ ၦဎြံၬဖိၪ (၃၀၉)  ခွးနီၪ ဘၪအီၪလၧ ၦအမၩနၧၩ့မၩစၪအဝ့ၫၥံၪဒိၪဒိၪဒ့ၭအလးလဖၪအဂဲး လၧဎြံၬဖိၪဘၪထိးမၩနၧၩ့မၫစၪအၥၭ အနၬထုၬထံၫခး ၅၀ အဖၧၩ့ လပၫထဲးဘၪထံၫခးဂူၪဂၩ ၂၄ ထံၫခးအဖၧၩ့ ဎြံၬဖိၪလၧ အဘၪထိးမၩနၧၩ့မၩဆၪအၥၭ အီၪဝ့ၫဒံၭ ၃၁ ခွးဒံၭအဂဲး ပၥ့ၪယၫဘၪနီၪလီၫႉ

ပကထိၪတွၭဘဲၫဂၪ့ခိၪထၧၫ့ဖျိၪ့ယၫ အဆၧဝံဆၧနၠၥိၭစွါဘဲၫ ဂၪ့ခိၪချိၫ့အဖၧၩ့အီၪဝ့ၫ ဎြံၬဖိၪ (၈)  ဂၩအဖၧၩ့ (၁)  ဂၩနီၪဘၪထိးမၩနၧၩ့မၩစၪအၥၭ ဘၪထိးမၩၥံၫအၥၭကိၭနံၩအဂဲး ပၥ့ၪယၫဘၪနီၪလီၫႉ ဆၧမၩနၧၩ့မၩစၪဆၧအနၬထုၬထံၫခး ၁၀ ခးနီၪ ကနံၪ့ယီၩဆ့မွဲဆၧအၪ့လဲၩ့ထၪ့ၥၭလအီၪဘၪနီၪလီၫႉ

ထံၫခး ၁၀ ခးနီၪမွဲဝ့ၫဒၪ မၠီၭကိၫရံၩယၩ အၫဖဂၫ့န့စတၫ့ ဆိၫမၫလံၫယၫ လံစပၩ ပၫကံစတၫ့ အဲထရၫ ယံၫမ့ၫ အံၫရၫ့ နဲၫ့ဂၠံၩရံၩယၩဒဲ အံၫ့ဒံယၬထံၫခးလဖၪနီၪလီၫႉ

ဆူၫဒၫ့ထံၫခးနီၪဘိၭ ၥနိၫ့အၥၫ့ဆၧထုၬဖျီၪထၪ့အဖၧၩ့ ဖ့ၪလၫ့ဘၪအခွး လၧဆၧဘိၪ့ဆၧဘၩဆၧပျီၩဖျ့ၭဂိၩ့ ၦလၧအခွံၬၡိၬအဆၧဘိၪ့ဆၧဘၩလဖၪနီၪ ကမၩၥံၫဝ့ၫၥနိၫ့နီၪ ထုၬၥံၫခွံၬဂီၩ့ဝ့ၫကကၠၪဆူၫဒၫ့ထံၫခးယီၩနီၪ မွဲလပၫလၧၩ့ဘၪလၧ ၦမၩနၧၩ့မၩစၪဎြံၬဖိၪအနၬထုၬထံၫခး ၁၀ ခးအဖၧၩ့နီၪလီၫႉ

အံၫ့ဒံယၬထံၫခးနီၪဘိၭ စၭထၪ့လၧအဖီၩ့ခွံၬ ၃ နံၪ့အတီအိၩထီးဘဲၫယီၩကကၠၪ မွဲပၫဒၪဆၧလၧ ၦမၩနၧၩ့မၩစၪဎြံၬဖိၪလဖၪအနၠထုၬထံၫခး ၁၀ ခးဖၧၩ့ဘိၩ့ဒံၭနီၪလီၫႉ ဘၪန့လဲၪနီၪဘိၭ ဘၪထွ့ၪလၧ ဟံၫ့ဒူၫဆၧဆူၩနဲၩဖျီးဆၧဘိၪ့ဆၧဘၩဖိၪလဖၪအကၠီၩ့ လၧထံၫခးအဖၧၩ့ အီၪဝ့ၫဒၪၡၩခိၭ ဆၧဘိၪ့ဆၧဘၩဖိၪ အဂူၪဂၩလဖၪနီၪ မွဲအဝ့ၫၥံၪဆုးထဲၩ့မၩနၧၩ့မၩစၪဝ့ၫဘီၩ့ဎးဒံၭအဂဲးဆၧပရၧၫ့ယီၩ ပန့ဘၪလၧ ပၫတံၫကၫ့ဆၧပရၧၫ့ အဖၧၩ့နီၪလီၫႉ

နးအဲၪဖီၫဘွၩ