ခးအမ့ၫရံကၫ့ခးဒိၪ ကထိးဆၧၫ့ဘၪ ၦဘၪကၪဘၪဂဲၩလဖၪနီၪ ၥၫ့ခိၪဒိၪလဖၪ အၪ့ဂၬထိးဆၧၫ့

ခးအမ့ၫရံကၫ့ခးဒိၪဂၠိၩဘဲၫ့ဒၫ့ ကထိးဆၧၫ့ဘၪ ၦဘၪကၪဘၪဂဲၩဖိၪလဖၪနီၪ ခးအမ့ၫရံကၫ့ ၥၫ့ခိၪဒိၪလဖၪ အၪ့ဂၬထိးဆၧၫ့ဝ့ၫနီၪလီၫႉ နံၪ့၂၀၂၂နံၪ့ကိနီၪ ကထိးဆၧၫ့ဘၪ ၦဘၪကၪဘၪဂဲၩဖိၪ လဖၪအဂၩ (၁၂၅၀၀၀) အဂဲး လၧအဖီၩ့ခွံၬမုနွ့ၫဒၪအိၩ အီၪက့ၪခွံၬလၩ့ၥၭနီၪလီၫႉ  

 ဆၧဝံဆၧနၬအယီၩနီၪ စၭထၪ့လၧ၁၉၉၃နံၪ့ဒဲ ထီၩ့စိၩလၧမုကနံၩယီၩနီၪ မွဲဆၧဝံဆၧနၬအ အၪထုၬနီၪလီၫႉ လၧကနံၪ့ဒၪအိၩနီၪ ဂဲၫထဲၩ့ထိးဆၧၫ့ဘၪ ၦဘၪကၪဘၪဂဲၩဖိၪလဖၪအဂၩ(၁၁၄၁၁) နီၪလီၫႉ ဆၧဝံဆၧနၬအယီၩနီၪ လၧအမ့ၫရံကၫ့ဖးဖီၩ့ဖၧၩ့ မွဲအၡၩထုၬနီၪလီၫႉ ကထိးဆၧၫ့ ၦဘၪကၪ ဘၪဂဲၩအဂးၥနိၫ့နီၪ ခွံၬလၩ့ထၬဝ့ၫလၧ ၁၉၈၀နံၪ့နီၪလီၫႉ

ကထိးဆၧၫ့ဘၪ ၦဘၪကၪဘၪဂဲၩဖိၪလဖၪအဂး အီၪလၧခးအမ့ၫရံကၫ့ ၥၫ့ခိၪဒိၪလဖၪဆ့ ခိးဂဲးခိးဘၭဝ့ၫဒိၪဒိၪဒ့ၭနီၪလီၫႉ ဘၪထွ့ၪလၧကခွံၬလၩ့အ့ၪ ၦဘၪကၪဘၪဂဲၩဖိၪလဖၪအလးအကျဲၩ့ အဂးမူၩဒၩအီၪၦလဖၪ ကဆုးထဲၩ့မၩဝ့ၫနီၪ ယိလါဝ့ၫအဂဲးႇ ဘဲၫနီၪအၥိၭ ဘျၪ့ဒိၪလဖၪဆ့ ထီးကၠူၭ ဘၪဆၧဎိၭထံၪဎိၭဒီၪလၧ ကထိးဆၧၫ့ၦဘၪကၪဘၪဂဲၩဖိၪလီၫလဂ့ၩဂီၩ့ ဆၧမၩဆၧၩ့လၧအလိၫလဖၪ အဂးဆ့ ကြၨၭကၠူၬထၬဘၪဆၧဎိၭထံၪဎိၭဒီၪလဖၪ ဒဲ ၦဘၪကၪဘၪဂဲၩဖိၪလဖၪအဂး လခဲၫ့ ဆံၫ ယၩနံၪ့(၄)ယၩနံၪ့အဂး ၦမူၩဒၩအီၪလဖၪ ထိၪတွၭအၪ့ဎၬထၬဘၪအဂဲး ခအမ့ၫရံကၫ့ ကဲၭၥလံၬ ၥၫ့ခိၪဒိၪခရၧၫ့ ၦပၧၩ့လးဆၧၫ့နၩ့ခိၪနါဒိၪ Mario E.DorSonville နီၪ စံၭဘၪဝ့ၫလီၫႉ

ၦဘၪကၪဘၪဂဲၩဖိၪလဖၪနီၪ ဆၧဒုၭဆၧခၭအကၠီၩ့မွဲဂ့ၩႇ ဆၧမၩၥံၫမၩဆၫလိၬၥၭအဂဲးမွဲဂ့ၩႇ ဂၪ့ခိၪအဆၧလၩ့အၪ့ယိၫအဂးမွဲဂ့ၩႇ ဘၪခွံၬၡိၭထးအလးအကျဲၩ့ဂီၩ့ ဘၪစဲၪ့မံၩ့ဂၭဖျိၭဝ့ၫနီၪလီၫႉ ထိး ဆၧၫ့ထၬၦဘၪကၪဘၪဂဲၩဖိၪလဖၪနီၪ မွဲလၧဆၧမၩဆၧၩ့ကမံၩ့ဂီၩ့ ၦဘၪကၪဘၪဂဲၩဖိၪလဖၪဆ့ ကနံၩ ကကၠၪကိ ထံၪခးအထိးဆၧၫ့ထၬအဝ့ၫၥံၪအဖၫ့ခိၪနီၪ မွဲအဝ့ၫၥံၪကဖ့ၪဆၧၫ့ထဲၩ့ဆၧမၩဆၧၩ့အဂဲးႇ ဆၧဖံၭဆၧမၩအယီၩအဖၫ့ခိၪၦလၧအဖ့ၪလၫ့လၩ့ၥၭ ကဲၭၥလံၬဆၧအီၪကီၪ့ခရၧၫ့လဖၪႇ ခရၧၫ့ဂူၪဂၩ လဖၪနီၪ  မၩဆၧအီၪကီၪ့အဆၧဖံၭဆၧမၩလၧ လးကျဲၩ့အၥၫ့ဖၧၩ့န့အဂဲး ၦပၧၩ့လးဆၧၫ့နၩ့ခိၪနါဒိၪနီၪ ဆုးထဲၩ့စံၭဘၪဝ့ၫလီၫႉ

ခးဒိၪဂၠိၩဘဲၫ့ဒၫ့အဆၧအီၪက့ၪခွံၬလၩ့ၥၭအယီၩနီၪ မွဲမၩဆၧၩ့ထၪ့ ဆၧမၩဆၧၩ့လိၫဘၪ အၫဖ ဂၫ့န့ၫစတၫ့ၦဘၪထိးဖီၪ့ထၬၥၭလဖၪနီၪလီၫႉ လါနၫ့ ၥုၪ့အီၪကၠၩ့လၧ မဲၭကစံၫကိၫ ဒဲ ခးအမ့ၫရံကၫ့ ထံၪခးအကျၩ ဟ့ၫတံၫထံၪခးဖိၪလဖၪနီၪဘိၭ မွဲထိးဆၧၫ့ဝ့ၫဘဲၫ ၦဘၪကၪဘၪဂဲၩဖိၪလဖၪ လန့ဒံၭ ဘၪအဂဲး စံၭဝ့ၫဒၪနီၪလီၫႉ

နးအဲၪဖီၫဘွၩ

၁၅ႉ၁၀ႉ၂၀၂၁