ခးပယၩ့ ထၧၫ့ဘံၪ့ယၫ ကၭၥလံၬဆၧအီၪကီၪ့ဆရၫႇ မုၪ ၂၀၂၄နံၪ့ ဆၧမၩလိၪ စၭထၪ့ထဲၩ့ အဂဲး

ဝံးမၠီၩ့မၠၭ ကၭၥလံၬဆၧအီၪကီၪ့ဆရၫ ဆရၫမုၪ အဆၧမၩလိၪလး မွဲဝ့ၫဒၪ စံၫ့မၫတ့ၩကၠီးနီၪ ဝဲထၪ့ထဲၩ့ ၂၀၂၄နံၪ့ ဆၧ မၩလိၪအနံၪ့လၧလၩယူၫ၁၅ၥၫ့ဒၪအိၩနီၪလီၫႉ ဆၧမၩလိၪလးယီၩနီၪ အီၪဝ့ၫဒၪလၧ ဝံးမၠီၩ့မၠၭ ဆၧဝံ(၃) ယ့ၫၡူၬအၥၭဆံၫ့ဎံၪၥရိၬ လးဝၩ့ဖၧၩ့နီၪလီၫႉ

ဆၧမၩလိၪနံၪ့ယီၩ ဝဲထၪ့ဝ့ၫဒၪလၧ လၩယူၫ၁၅ၥၫ့ လဂီၩ၆နၩရံၫခီၫအခံၫ့ လၧဒိၩ့ပၥံၫ့ဆၧအီၪကီၪ့ ၥၫ့ခိၪဒိၪ Henry မၩ့အဲၪချံၫ့ အစူၪဖၧၩ့ လၧမံဆၩဆၧလုထၪ့နီၪလီၫႉ ကၭၥလံၬဆၧအီၪကီၪ့ဆရၫႇမုၪလဖၪ အဆၧမၩလိၪလး စံၫ့မၫတ့ၩကၠီးယီၩနီၪ လၧခးပယၩ့အဖၧၩ့ အီၪဝ့ၫဒၪကဖျိၪ့ဎးနီၪလီၫႉ ၦလၧ အဂဲၫထၪ့ဆၧမၩလိၪ ဆရၫႇ မုၪလဖၪနီၪ အီၪဂဲၫဝ့ၫလၧ ဆၨၩဆၬအၪမံၩ့ အၪမၠိၩနီၪလီၫႉ အဝ့ၫၥံၪယီၩ ကလီၩ့မၩဂၧၫ့ထၪ့ၥၩလၩ့ ယွၩလူယွၩထၫအဂး ဂဲၫထၪ့ ကၠၭဆၧမၩလိၪယီၩနီၪလီၫႉ ဆၧမၩလိၪယီၩနီၪ ဘၪထၪ့ကၠၭဝ့ၫ ၂နံၪ့နီၪလီၫႉ

ကနံၪ့ယီၩ ဆၧမၩလိၪနံၪ့ဖၧၩ့ နံၪ့အခၪ့ထံၭ ဆၧမၩလိၪဖိၪအီၪဝ့ၫဒၪ အဂၩ၂၀ဒဲ၂နံၪ့လနံၪ့ဆၧမၩလိၪဖိၪ အီၪဝ့ၫဒၪ၄၁ ဂၩတၭ ဆၧမၩလိၪဖိၪထီးလူၬအီၪဝ့ၫဒၪ ၆၁ဂၩနီၪလီၫႉ

စံၫ့မၫတ့ၩကၭၥလံၬဆၧအီၪကီၪ့ ဆရၫႇ မုၪ အဆၧမၩလိၪလးယီၩနီၪ လၧအဖီၩ့ခွံၬ၁၉၅၆နံၪ့ အထီအိၩ Fr.Martin နာဘိုက် ဂဲၫထဲၩ့ၥုၪ့လၩ့ထၬနီၪလီၫႉ မုကနံၩယီၩ ဆၧမၩလိၪလးယီၩဂဲၫထဲၩ့အီၪၥုၪ့လၩ့ထၬအၥၭထၪ့ဘၭ ၆၈နံၪ့ယူၭတၭ ကၭၥလံၬ ဆၧအီၪကီၪ့ ဆရၫႇမုၪလဖၪ စဲၪ့ထၪ့ဝ့ၫဒၪ အဂၩထီးလူၬအီၪဝ့ၫဒၪ (၁၈၃၉)ဂၩယူၭအဂဲး ပန့ဘၪဆၧပရၧၫ့ ဘဲၫယီၩ အၥိၭနီၪလီၫႉ

နးအဲၪဖီၫဘွၩ