ခရိုအေးရှားဆၨၩဖိၪ ထၧၫ့ဖုဝဲခွၫ၃ဂၩနီၪ ကဲၪထၪ့ဘၪဘိၪ့ခိၪၥၫ့ခၫကနံၩဎးအဂဲး

ခရိုအေးရှားဆၨၩဖိၪ ထၧၫ့ဖုဝဲခွၫ၃ဂၩ မွဲဝ့ၫဒၪ Renato Pudar၊ Marko Pudar ဒဲ Robert Pudar လဖၪနီၪ ကဲၪထၪ့ဘၪ ကၭၥလံၬဘိၪ့ခိၪၥၫ့ခၫကနံၩဎးနီၪလီၫႉ

အဝ့ၫၥံၪ အၥၫ့ခၫခရၧၫ့အမံၩ့နီၪ မွဲလၧ ဖရန်စစ္စကင်ခရၧၫ့ဂီၩ့ လၧလၩယူၫ၂၄ၥၫ့ဒၪအိၩ ဘၪဆၧမၩလၩမၩဖၧၩ့ ဆၧကဲၪ ထၪ့ဘိၪ့ခိၪၥၫ့ခၫဘိၪ့မုနံၩနီၪလၧ Solinလး ဂံၪ့ဒီၪ့ဆံၫ့ဎံၫၥရိၬဖၧၩ့နီၪလီၫႉ ၦလၧအလ့ၩခိၪလ့ၩနါ မံဆၩဆၧလုထၪ့နီၪ မွဲဝ့ၫဒၪလၧ မွန်ဆီညှော် Želimir Puljić နီၪလီၫႉ လၧအဝ့ၫၥံၪ အထၧၫ့ဖုဝဲခွၫ ၃ဂၩယီၩကၠၧၫ့ကၠၧၫ့ လခဲၫ့ၦခွၫ၄ဂၩနီၪဆ့ မွဲဒိၭန့ဘၪ ဘိၪ့ခိၪၥၫ့ခၫအဆၧကဲၪဆ့နီၪလီၫႉ လၧၥရိၬအဖၧၩ့ ဎွ့ၩလၩ့ဝ့ၫဒၪလၧ ဘိၪ့ခိၪၥၫ့ခၫလဖၪ မိဖါဘူၭထံးၥံၪနီၪလီၫႉ

လၧဆၧၥၭထိၬပရၧၫ့ဖၧၩ့ မွန်ဆီညှော် Želimir Puljić စံၭဝ့ၫဒၪ “ကဆါယွၩကိၭနၥံၪအခၫ မွဲလၧနၥံၪအဆၧဂဲး ဆါဘၭဆါအကၠီၩ့ ထီးမၩယံၭနးနၥံၪအၥၭလဂ့ၩႉ လုထၪ့ထၬနၥံၪအၥၭလၧ ယွၩအဆၧယိလါဖၧၩ့နီၪဆံၭႉ ကဆါယွၩနီၪ မွဲက ဖ့ၪလၫ့အ့ၪနၥံၪဂဲးဘၭဒဲ ဆၧၥုၪ့ဒူၩၥၭဒူၩလီၫႉ မွဲလၧယွၩအကၠီၩ့ ကယဲနၥံၪဘၪမၩဆၧလဖၪနီၪ နၥံၪမၩကန့ထၪ့ဝ့ၫလီၫႉ ခၫ့ဖျီၫ့ လၧနၥံၪနီၪ ကဆါယွၩယီၩ ကမၩထၪ့ဆၧဎိၩဎိၩဒိၪဒိၪအဂး အဆၧယိလါအီၪဝ့ၫဒၪလီၫႉ” အဂဲး မွန်ဆီညော်ယီၩ စံၭဝ့ၫဘဲၫနီၪ အၥိၭလီၫႉ

လကၭဒံၭဘၪ မွဲလၧၥၫ့ခၫအၥၫ့၇ဂၩယီၩအဂး အဝ့ၫယီၩဆုးထဲၩ့အၪ့ကံၩ့ဘၩဆိၪအ့ၪဝ့ၫလၧ မိမၫရံၫအအီၪဒံၭနီၪလီၫႉ ဆၧအီၪကီၪ့အယီၩနီၪ အီၪၥုၪ့လၩ့ထၬအၥၭလၧ၃ယၩနံၪ့အထီအိၩဂီၩ့တၭ ကၭၥလံၬအဆၧဝံဆၧနၬအီၪဝ့ၫဒၪ ဖိၭဘိၭအဂၩ ၄၄၀၀၀၀နီၪလီၫႉ လၧခရိုအေးရှားထံၪခးဖၧၩ့ ၦၡၩဖိၭဘိၭ(၇၈)ယၩဒုၩနီၪ မွဲဝ့ၫဒၪကၭၥလံၬၦဆူနဲၩဖိၪၥံၪအဂဲး ပန့ဘၪဆၧပ ရၧၫ့ဘဲၫယီၩအၥိၭနီၪလီၫႉ  

နးအဲၪဖီၫဘွၩ