ကၭၥလံၬၡၩအဆၧဆုးကျိၭဆၧအီၪကီၪ့လၩ့ဎိၭ ကအီၪဝၫ့ဒၪလၧခးဖံလံပဲၫ့အဂဲး

နံၪ့၂၀၂၂နံၪ့ လၩနိၫဝံၩ့ဘၧၫ၂၆-၂၇ၥၫ့ကိ ခးဖံလံပဲၫ့ကၭၥလံၬၥၫ့ခိၪဒိၪခရၧၫ့နီၪ ကအီၪကီၪ့ဎိၭလၩ့ ၡၩအဆၧဆုး ကျိၭဆၧအီၪကီၪ့နီၪလီၫႉ
ဆၧအီၪကီၪ့ဎိၭလၩ့အဆၧထိစိၩနီၪ ဘဲၫၦၡၩကၥ့ၪယၫထၪ့ ဆၧၥိၩ့ထၪ့ Social Media နီၪ မွဲကၠီၪ့ဖျီၩ့လၧ အမၩဂၧၫ့ ထၪ့ၥၩလၩ့ဆၧၥၭထိၬပရၧၫ့န့ဂ့ၩဘၪစဲၪအဂဲးနီၪလီၫႉ ၦလၧကဂဲၫထၪ့ဆၧအီၪကီၪ့လဖၪနီၪ ကဘၪအၪ့နၩ့ဖ့ၪၥ့ၪယၫ Social Mediaဖၧၩ့ဒုၭဖျီၪ့ထၪ့ထၬဝ့ၫ လခဲၫ့ထုၬဆၧပရၧၫ့အဂဲးလဖၪႇ ကၠီၩ့ဖျီၩ့လၧမိဆၧအီၪကီၪ့ဖၧၩ့ဆၧဖံၭဆၧမၩလဖၪနီၪဆ့ ကအၪ့ လဲၩ့ၥၫ့ထၪ့ထဲၩ့ဝ့ၫအဂဲးႇ ပၥိၩ့Social Mediaအခၫ ဘဲၫကၭၥလံၬမံၫဒံၫယၫအၥနိၫ့အၥိၭ ကဘၪဂၭဎ့ၭဝ့ၫလဖၪဒဲ ကဘၪမၩ ထၪ့ဝ့ၫဆၧအဂဲးလဖၪနီၪ ကလီၩပျၩ့ဖ့ၪနဲၪဝ့ၫနီၪလီၫႉ
ဆၧအီၪကီၪ့ယီၩအဖၧၩ့ ၦလၧကဂဲၫဖ့ၪလၫ့ၥဖၠးလဖၪနီၪ အီၪလၧထံၪခးဖၧၩ့ ၥၭဘၪ့ဆၧကိၪ့ဘၪကိၪ့ၥ့ၪဖိၪလဖၪ ဒဲ ၦလၧအနၪSocial Mediaအဂဲး ၥ့ၪဝ့ၫဒၪလဖၪနီၪလီၫႉ လၧဆၧအီၪကီၪ့လၩ့ဎိၭဖၧၩ့ယီၩ ပဖီၪ့ထၪ့ဖံၭထၪ့ဆၧအီၪကီၪ့ ဆၧဖံၭ ဆၧမၩအထီ ပမၩန့ဝ့ၫဒၪလဖၪႇ ပၥိၩ့Social Mediaအကၠီၩ့ ပကပဒၩ့ထၬ ဆၧအီၪကီၪ့ဒဲ ဆၧတီၩဆၧလီၩ့ႇ လကၭဘၪ ဆၧပရၧၫ့အဘၪမၪလဖၪဘဲၫၥ့ၪလဲၪအဂဲးႇ ဆၧပရၧၫ့အတီၩအလီၩ့လဖၪနီၪဆ့ ဘဲၫအခံၫ့ဒၪဝ့ၫအၥိၭ ပကဘၪဘိၭဘၪ ၥ့ၪယၫထၪ့ ဘဲၫၥ့ၪလဲၪအဂဲး ကထံၭလၩ့ၥီၪ့ၥၫ့ထဲးဝ့ၫနီၪလီၫႉ
လကၭဒံၭဘၪ ဘဲၫၥိၭကကၧၩ့ထၪ့ ကၭၥလံၬမံၫဒံၫယၫခရၧၫ့လဖၪကန့အဂးႇ ဘဲၫကၭၥလံၬမံၫဒံၫယၫအၥနိၫ့အ ၥိၭ ပကၥိၩ့ထၪ့Facebookနီၪလၧ အခိးအတၩအီၪအီၪအဖၧၩ့ကန့အဂး ဒဲ ဘၪထွ့ၪလၧ(အဆၧ မူပိုင်)အဂဲးအဖး လဖၪ နီၪ မွဲကထံၭလၩ့ ကၩ့ကၩဎိၭလၩ့ဝ့ၫနီၪလီၫႉ