ကၭၥလံၬဆရၫလဂၩ ဘၪထိးမၩၥံၫၥၭအဂဲး

အီၪလၧ အ့ၫယၫဝတံၫခးဒီၪ့ႇ ဇလွန်ဝံးႇ ဇော်ဂျီကွင်းလးဝၩ့ ကြံတောစုတဝၫ့ ၦၥီၪ့လံၬဆရၫစောရဲသီဟနီၪ အီၪလၧ အဂံၪ့အထီ လၧလၩအီၭတီၫဘၧၫ၁၇ၥၫ့အဂၫလၩ့ ၇နၩရံၫအခံၫ့အိၩ ဘၪထိးမၩၥံၫအၥၭနီၪလီၫႉ

        “အဝ့ၫနီၪ မွဲၦဖျဲၡါက့ၭလဂၩ အထံၩအၥိၭအီၪဝ့ၫဒၪအၪမၬဒဲ ၦအအဲၪအဝ့ၫလဖၪအီၪဝ့ၫဒၪအၪမၬနီၪလီၫႉ အၥၭအီၪ ၃၃နံၪ့ ဒံၭလီၫ အဝ့ၫယီၩနုၬထၬ CDMဆရၫလဂၩဂီၩ့ အဝ့ၫအီၪလၧအဂံၪ့အထီ ၦၡၩဂဲၫထၪ့ဆ့ၬၥံၫလီၫ” အဂဲး ၦနုၬထၬCDM ဆရၫမုၪလဂၩနီၪ စံၭဝ့ၫဒၪလီၫႉ

        ၦၡၩဘၧၩ့လၩ့အဝ့ၫအစွၫနီၪ လၧလၩအီၭတိၫဘၧၫ၂၀ၥၫ့အိၩဒဲ ၦၡၩလ့ၩဘၧၩ့လၩ့ဝ့ၫဒၪအလးနီၪ မွဲလၧမေရီလန်းတဝၫ့ ယ့ၫၡုၬအၥၭဆံၫ့ဎံၫၥရိၬ လးဝၩ့ဖၧၩ့နီၪလီၫႉ ဆရၫစောရဲသီဟယီၩ အမိအဖါၥံၪနီၪ လၩ့ဖၭလိၬၥၭအကၠီၩ့ စၭထၪ့လၧအဝ့ၫ အဆံၭဆံၭအထီအိၩ ဘၪဂဲၫထဲၩ့အီၪလၧ ဖံၫဖူၫဒဲမိဂါဖၪထံ အစူၪဖၧၩ့နီၪလီၫႉ အဝ့ၫယီၩ ဘၪလီၩ့အီၪလၧ ကၭၥလံၬဆၧအီၪ ကီၪ့ကၠီးလဖၪဂီၩ့ ဘၪဂဲၫထဲၩ့မၩလိၪထၪ့ ဆၧအကိၪ့ဘၪကိၪ့ၥ့ၪလဖၪနီၪလီၫႉ

       ဆရၫယီၩ လၧဆၧအီၪကီၪ့ဖၧၩ့ဆ့ မွဲနုၬလၩ့ဂဲၩဝၭဝ့ၫ ဂ့ၩဘၪစဲၪ့ဆ့ဂီၩ့ ဖ့ၪၦၡၩဆၧမၩဆၧၩ့န့ဝ့ၫဒၪအၪမၬနီၪလီၫႉ လၧအ ဂံၪ့နီၪ ၦဂူၫဂၩလအီၪဘၪနးဂၩဒဲ ဆရၫယီၩအီၪဒၪမွဲန့ၫအဝ့ၫလဂၩဎးလီၫအကၠီၩ့ အဂံၪ့ယီၩအဝ့ၫအဲၪဒိၭမၩဘိၪ့လၩ့ ဆၧအီၪကီၪ့ အဂဲး ဆရၫအထံၩၥိၭဘူၭထံးလဂၩနီၪ စံၭဝ့ၫလီၫႉ

        မွဲလၧအဝ့ၫ ဘၪထိးမၩၥံၫအၥၭအကၠီၩ့ ကၭၥလံၬဆၧအီၪကီၪ့အဂးဆ့ မွဲဆၧဂၭဂီၩ့ဆိၫ့ခွံၬဎိၩဒိၪဆ့အဂဲး ကၭၥလံၬ ဘိၪ့ခိၪ ၥၫ့ခၫလဂၩနီၪ စံၭဝ့ၫဒၪနီၪလီၫႉ ဆရၫယီၩနီၪ ဂဲၫထဲၩ့ခိးဂဲးခိးဘၭဒၪဆၧဖံၭဆၧမၩကဂၩဂီၩ့ ၥုၪ့ထၪ့ထၬအဂံၪ့လၧတၨၭနီၪလီၫႉ အဝ့ၫယီၩ နုၬလၩ့လၧCDMဂီၩ့ စဲၪ့ထၪ့ခွံၬလၧကၠီးဆရၫအဆၧမၩဂီၩ့အခၫ အၪ့ဆၫအၪ့ထဲၩ့ဆၧအဂဲး ပၥ့ၪယၫဘၪနီၪလီၫႉ

       မွဲလၧအဘူၭအထံးလဖၪ အဆၧလီၩဖၧၩ့ ဆရၫယီၩဂဲၫထဲၩ့ၥီၪ့ယံၩယါအ့ၪလံၬ ၥၭဘၪ့ဖိၪကဂၩဒဲ အထံၩၥိၭကဂၩနီၪ ဂဲၫအီၪ ကွ့ၩအဝ့ၫဂီၩ့ အၪ့ကံၩ့အဝ့ၫထီးနီၪ အၪဝ့ၫဒၪအကၠီၩ့ အဝ့ၫမွဲလဖ့ၪလၫ့ဘၪနီၪလီၫႉ အနီၪအခၫ ၥၭဘၪ့နံၫဂၩနီၪ အၪ့န့လၫ့ ထၭ ထံၭဂီၩ့ ဆ့ၭဆရၫနီၪအၪထံၪဒ့ၭနီၪလီၫႉ ဆရၫနီၪ ထီးလၧဆၧဆၫဂံၪ့ဂီၩ့မၬ အၥၭစဲၪ့ထၪ့ဝ့ၫဒၪ ဒဲ ၦလၧအဆ့ၭၥံၫအဝ့ၫ နံၫဂၩနီၪ ဆ့ မွဲၦၡၩဖီၪ့ထၬချုၭအဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ