ကၫဒံၫနဲၫ ဟိၫစ့ၩ F. Advincula ကဲၪထၪ့မနံၫလၫဆၧအီၪကီၪ့အၥၫ့ခိၪဒိၪအၥၫ့

ၥၫ့ဎွၩဒိၪဖရၫ့စ့ၭ အီၪက့ၪထၪ့ ကၫပ့ၩကၭၥလံၬ စအီၪကီၪအခိၪနါကၫဒံၫနဲၫ ဟိၫစ့ၩ F. အၫဗ့ၫကူၫလၫ ဘဲၫမနံၫလၫArchdiocese ဆၧအီၪကီၪ့ခိၪနါအၥၫ့လီၫႉ

လၧပြီပတံၬမုနံၩႇ မၩမၫၡၩထၪ့ ၂၅ၥၫ့ မနံၫလၫအခံၫ့ လမုဂၫခီၫ ၇ နၩရံၩနီၪ ဗၫတံၫကၪ့ ဘိၭဘၪၥ့ၪယၫထၪ့ဆၧအဂဲးနီၪလီၫႉ

လၧဆၧပရၧၫ့နီၪဆၧဘိၭဘၪၥ့ၪယၫလထံၫဎးႇ မနံၫလၫကၫၥံၫဒြဲၫအဒိၩ့လွ့ၫၥံၪအလူၥီၫထၪ့ႇ လၧဆၧမုၬလၩၥၭဎွံၫႇ အ့ၫထရၫမၠူၩရီၭ(ဝံးအလံၩအဖၧၩ့) အဖၧၩ့နီၪလီၫႉ

လၧမၪ့ဂၩနံၪ့အိၩႇ လၩဖ့ၪဘြူအ့ၫရ့ၫအဖၧၩ့ႇ ကၫဒံၫနဲၫလွံၩအၫ့တိၩနံၫယိၫတၩဂလ့ၫ ဘၪဆၧဖ့ၪလၫ့အ့ၪအမူၩဒၩအၥၫ့ လၧဝံးရိမၫႇ ဘဲၫၦလီၩလၩ့လၬလၩ့ဆၧၥၭထိၬပရၧၫ့အခရၧၫ့ခိၪနါအၥိၭအကၠီၩ့ႇ မနံၫလၫဆၧအီၪကီၪ့ယီၩအခိၪနါၥၫ့ခိၪဒိၪလအီၪဘၪလီၫႉ

ကၫဒံၫနဲၫအၫဗ့ၫကူၫလၫယီၩ အီၪဖျဲၪလၧ ၁၉၅၂နံၪ့ႇ လၩမၫၡၭထၪ့ ၃၀ႇ လၧဝံးကၫပ့ၭနီၪတၭႇ ကဲၪထၪ့ဘိၪ့ခိၪၥၫ့ခၫလၧ ၁၉၇၆နံၪ့နီၪလီၫႉ ဘၪဆၧမၩကဲၪစၫ့ကၩလီၭအၥၫ့ခိၪလၧ ၂၀၀၁နံၪ့ႇ ဒဲလၧ ၂၀၁၁နံၪ့နီၪ အဝ့ၫကဲၪထၪ့ ကၫပ့ၭဆၧအီၪကီၪ့ အၥၫ့ခိၪဒိၪလီၫႉ

နံၪ့ ၂၀၂၀ႇ လၩအီၭတိၫဘၧၫအဖၧၩ့နီၪ အဝ့ၫလဂၩယီၩ ဘၪဆၧမၩကဲၪထၪ့ ဘဲၫခးဖံၫလပဲၫ့အကၫဒံၫနဲၫခွံၫဂၩလဂၩအၥိၭလီၫႉ

ကၫဒံၫနဲၫ Advincula ယီၩအမံၩ့ဎိၩဝ့ၫ ဘဲၫၦလၧအခိးဂဲးခိးဘၭလၧၦခမျၧးအခွးအယါကဂၩအၥိၭလီၫႉ အဝ့ၫစံၭဝ့ၫႇ "လၧကၭၥလံၬဆၧအီၪကီၪ့ဖၧၩ့ယီၩႇ ဆၧပဒၩ့ၦၡၩအခွးအယါကမံၩ့ႇ ပလမၩဘၪပအီၪလန့ဘၪလီၫႉ ၦၡၩအဆၧဂ့ၩႇအဆၧလူဒိၪဎွ့ၩဒိၪႇ ဒဲၦခမျၧးအခွးအယါနီၪ ကဘၪဆၧယူၭယၪ့အဂး ဆၧအီၪကီၪ့ယီၩ ကဘၩခိးဂဲးခိးဘၭလီၫႉ"

ကၫဒံၫနဲၫ Advincula စံၭဝ့ၫႇ "ဆၧလၧၫ့ဆၧဎွ့ၩလအီၪဘၪယီၩႇ မွဲဆၧကၪဆၧဂဲၩအခၪ့ထံၭကမံၩ့လီၫႉ ဘဲၫၦၡၩကအီၪၥၭမၧၫ့ဘၪဂ့ၩဂ့ၩဘၪဘၪအဂးႇ  ဆၧမၩလိၪလံၬလဲႇဒဲဆၧၥ့ၪယၫနၪၥ့ၪယီၩ မၩလ့ၩထၪ့လ့ၩထီၫၦၡၩလီၫႉ"

ကၫပ့ၭဆၧအီၪကီၪ့အမံၩ့လဎိၩဘၪအကၠီၩ့ႇ အဝ့ၫကဂၩ ဘၪဆၧမၩကဲၪထၪ့ဘဲၫကၫဒံၫနဲၫကဂၩအၥိၭနီၪႇ လၧအဝ့ၫအဂး မွဲဆၧထီၫမံၫထီၫမၪကမံၩ့လီၫႉ

ကၫဒံၫနဲၫစံၭဝ့ၫႇ "အနီၪကမွဲဝ့ၫၥၫ့ဎွၩဒိၪအဆၧမၩႇ အဆၧထိစိၩႇ မွဲဝ့ၫဆၧအီၪကီၪ့ယီၩကဘၪအီၪလၧၦၡၪ့ဖိၪယၬဖိၪႇ ဒဲၦဘၪဆၧအီၪပဲၩခွံၬလဖၪအကျၩလီၫႉ ဆၧအီၪကီၪ့ယီၩ ကဘၪအီၪလၧၦခမျၧးအနဲၩ့ထံၭႇ ကဘၪအီၪလၧၦဘၪဆၧအီၪပဲၩခွံၬဝ့ၫလဖၪအနဲၩ့ထံၭအကၠီၩ့ႇ ယဆီၫ့မီၪဘၪလထံၫဎးလီၫႉ"

Ref: Joe Torres / LiCAS.news/RVA News