ကိၫဘံဆၧဆၫအကၠီၩ့ ခးအံၫ့ဒံယၬ ဘိၪ့ခိၪၥၫ့ခၫလဖၪ ဒဲ စံၫစတၧၫ့လဖၪ ဖိၭဘိၭအဂၩ ၄၀၀ဘျဲၪနီၪ အၥၭဘၪၥံၫခွံၬအဂဲး

မွဲလၧကိၫဘံဆၧဆၫအကၠီၩ့ လၧလၩအ့ၫပြံၫဒဲ လၩမ့ၫအဖၧၩ့ ခးအံၫ့ဒံယၬ ဘိၪ့ခိၪၥၫ့ခၫအဂၩ ၂၀၅ဂၩ ဒဲ စံၫစတၧၫ့အဂၩ ၂၁၀နီၪ အၥၭဘၪၥံၫခွံၬအဂဲး ကၫပူၫခၠ့ၩအဲၩ့ၥဲၭခရၧၫ့ ဘိၪ့ခိၪၥၫ့ခၫ ဆွၩရဲၭ မဲၥယူၩနီၪ လီၩဘၪဝ့ၫလီၫႉ

ထၧၩ့ထီၩ့စိၩလၧ လၩမ့ၫ၂၉ၥၫ့အိၩနီၪ ၥၫ့မုၥၫ့ခၫဒဲ စံၫစတၧၫ့လဖၪ ထီးလူၬၥံၫဝ့ၫဒၪအဂၩ ၄၁၅ဂၩဂီၩ့ လၧနီၪအဖၧၩ့ၥၫ့ခိၪဒိၪဆ့ ပၫထဲးဝ့ၫဒၪ၃ဂၩဒဲ ဆၧရၫ့ဖၧၩ့လပၫဒံၭဘၪဆ့ အီၪကနၩ့ဒံၭ နီၪလီၫႉ အထီဘဲၫယီၩနီၪ ခးအံၫ့ဒံယၭယီၩ ဘၪထိးကိၫဘံဆၧဆၫအဆၧလၩ့အၪ့ယိၫ ဒိၪဒိၪလ့ၬနီၪ လီၫႉ

အၡါမၪနီၪ ထံၪခးအယီၩ ထုၬထၪ့ကိၫဘံဆၧဆၫအဂး ၥံၪ့ဎွံၫန့ဝ့ၫဒၪ အအၪထုၬလါနၫ့ ဆၧ ဆၫဘၪဂါအီၪထၪ့အၪဝ့ၫ ဘဲၫယီၩၥိၭ ဒဲ ၡၩခမျၧးလဖၪ ဒိၭန့ဘၪ ဆၧပဒၩ့ဆိၫထၬ ကိၫဘံဆၧဆၫ အဂး ၥံၪ့ဎွံၪလဖၪၡၩဝ့ၫဒၪအကၠီၩ့ အဝ့ၫၥံၪအထံၪခးခိၪနါနီၪ ဘၪထိးလီၩထိးချဲၩ့ၥၭ နၭမၬဒ့ၭအဂဲး ပၥ့ၪယၫဘၪနီၪလီၫႉ

နးအဲၪဖီၫဘွၩ