ကိၫပံဆၧၫ့ထီဖျီးခွံၬအခံၫ့ ၥၫ့ဎွၩကစၭထၪ့လ့ၩထဲၩ့အဂဲး

ဘၪထွ့ၪလၧကိၫပံ ဆၧဆၫအကၠီၩ့ ၥၫ့ဎွၩဖရၫ့စံဘၪအီၪပထုၬထၬ ဆၧဒၪလၩ့ဎီၭလၧ အၥိၪဖိၪလဖၪယံၭကဆိယူၭနီၪလီၫႉ

လါနၫ့ နံၪ့ ၂၀၂၁ နံၪ့ လၩမၫၡါ ၅ ၥၫ့ကိနီၪ အဝ့ၫယီၩကစၭထၪ့ထဲၩ့အဆၧလ့ၩဆၧထဲၩ့လဖၪအဂဲး ပၥ့ၪယၫဘၪနီၪလီၫႉအဆိၪထုၬအဝ့ၫကစၭထၪ့လ့ၩဝ့ၫနီၪ မွဲလၧအံၪရါထံၫခးနီၪလီၫႉ အဝ့ၫယီၩ ကအီၪစဲၪ့ထၪ့လၧဝံးရီၩမၬလၧ လၩမၫၡါ ၅ ၥၫ့လဂီၩ့ခီၫနီၪဂီၩ့ မုဎဲးလၩ့အခၫနီၪမွဲကထီၩ့စိၩလၧ ခးအံၪရါလီၫႉ

ဂီၩ့နီၪခးအံၪရါဒိၪနီၪ ကအီၪခိၭထိးဆၧၫ့အဝ့ၫလၧ ဆအဎိၭထံၪဎိၭဒီၪလဖၪဂီၩ့ ၥၫ့ဎွၩယီၩကဒၪလၩ့ဎိၭလီၬၥၭလၧခးဒိၪ ဂီၩ့နီၪကဆုးထဲၩ့ဒၪလၩ့ဎိၭလိၬၥၭလၧ ၦဒိၪၦမုလဖၪ ဘိၪ့ခိၪၥၫ့ခၫလဖၪ မံၭထၭမုၪ့မံၭထၭခွၫလဖၪ ၥၪ့ခိၪဒိၪလဖၪ ၦမၩယၪၩအဆၧဖံၭဆၧမၩလဖၪ ဆ့ၫမ့ၫနရံၫဆၧမၩလိၪဖိၪလဖၪဒဲဆၧအီၪကီၪ့ဆရၫဆရၫမုၪလဖၪနီၪလီၫႉ ကဒၪလၩ့ဎိၭလိၬၥၭအလးနီၪ အီၪလၧဝံးဘဒဲဆံၩရံၩယၩကဲၬၥလံၬၥရိၬအမံၩ့မွဝ့ၫ ဆၧထိးထဲၩ့တၩ့ထဲၩ့မိမၫရံၫၥရိၬဖၧၩ့နီၪလီၫႉ

အဝ့ၫၥံၪဒၪလၩ့ဎိၭလိၬၥၭဂီၩ့ဝံၫကကၠၪ မွဲကလုထၪ့လၩ့ဎိၭမံဆၩဆၧလုထၪ့ ကၠၧၫ့ကၠၧၫ့လၧၥရိၬနီၪအဖၧၩ့လီၫႉလၩမၫၡါ ၆ ၥၫ့နီၪ ၥၫ့ဎွၩကလ့ၩဂၭကွ့ၭစိၩလၧ နၫဂၠၭဒဲ ကဒၪလၩ့ဎိၭလိၬၥၭလၧ ထၧၫ့ဖုဝဲဆၧဘိၪ့ဆၧဘၩခိၪနါလဖၪ လၧ အုၩလးပျၩ့တုၩ့ဖၧၩ့နီၪလီၫႉ ဂီၩ့နီၪ မွဲကဆုးထဲၩ့လုထၪ့လၩ့ဎိၭ မံၩဆၧလုထၪ့လၧစံၩ့ဂၠိၩဇဲၭၥရိၬဖၧၩ့နီၪလီၫႉ

လၩမၫၡါ ၇ ၥၫ့နီၪ ဘိၭၥၫ့ဎွၩယီၩကဆုးထဲၩ့လ့ၩစိၩလၧ အၫဘံၫဝံးဂီၩ့ ကဒၪလၩ့ဎိၭလိၬၥၭလၧ ထံၫခးခိၪနါလဖၪဒဲ ဆၧဘိၪ့ဆၧဘၩခိၪနါလဖၪနီၪလီၫႉ ဂီၩ့နီၪၥၫ့ဎွၩယီၩကဆုးထဲၩ့လ့ၩစိၩလၧ မိဆူၩ ဂီၩ့ ကအၪ့ကံၩ့ဘၪဆိၪဖၪအ့ၪၦလၧအၥံၫဖီၩ့ခွံၬလၧ ဆၧဒုၭဆၧခၭဖၧၩ့လဖၪအဂးနီၪလီၫႉ ဂီၩ့နီၪ ကဆုးထဲၩ့လ့ၩစိၩလၧ ကွၫရၫကွၭဝံးဂီၩ့ကဒၪလၩ့ဎိၭလိၬၥၭလၧ ၦဆူၩနဲၩဖိၪလဖၪ လၧဆၧဒၧၩ့ထၪ့လၧ ၥၭမု ဆံၫ့ဎံၪမိမၫရံၫၥရိၬဖၧၩ့နီၪလီၫႉ

ဂီၩ့နီၪၥၫ့ဎွၩကထဲၩ့ထဲၩ့လၧ အၫဘံၫဝံးဂီၩ့ ကလးကထၪ့မံဆၩဆၧလုထၪ့လၧ ဖရၫ့ဆိၫဟၫရံၫရံၫဆၧကွ့ၩၥဲၪလးဝၩ့ဖၧၩ့နီၪလီၫႉ မံဆၩဆၧလုထၪ့ဂီၩ့ဝ့ၫကကၠၪ ၥၫ့ဎွၩကထဲၩ့စိၩထဲၩ့လၧအံၪရါဝံးဂီၩ့ လၩမၫၡါ ၈ ၥၫ့လဂီၩနီၪ မွဲၦၡၩကနူၬဆဲၥၫ့ဎွၩဒဲ ၥၫ့ဎွၩယီၩကအီၪပထုၬခွံၬ အဆၧလ့ၩဆၧထဲၩ့အဆိၪထုၬလဘျၩ့ယီၩအဂဲးပန့ဘၪဆၧပရၧၫ့ဘဲၫယီၩအၥိၭနီၪလီၫႉ

နးအဲၪဖီၫဘွၩ