ကလ့ၩဂၭကွ့ၩစိၩလၧ ဒံၫမီကြ့ၫစံၫခးကိၫဂိၫ ဒဲခးဆူၫဒၫ့လံၩထံၭအဂး မုနံၩမုၥၫ့နီၪ ၥၫ့ဎွၩဖရၫ့စ့ၭ ဘၪၥုၭခွံၬထဲၩ့အခံၫ့အဂဲး

အဂုအိၩ လၧလၩယူၫလဲၫ့ မုနွ့ၫအဆိၫထုၬအဖၧၩ့နီၪ လၧၥၫ့ဎွၩဒိၪဖရၫ့စ့ၭ ကလ့ၩစိၩလၧ ဒံၫမီကြ့ၫစံၫ ခးကိၫဂိၫ(Congo) ဒဲလၧခးဆူၫဒၫ့(South Sudan)အဂး  ဆၧဎိၭထံၪဎိၭဒီၪ အီၪထၬဝဲၩလါနၫ့ ဘဲၫယီၩနီၪ ဘၪၥုၭစိၩထဲၩ့မုနံၩမုၥၫ့လၧယၫခီၫအဂဲး ဗၫတံၫကၫ့ ဆၧထုၭထၪ့ဆၧအီၪကီၪ့ဆၧပရၧၫ့ရိၩ့လး ဘိၭဘၪၥ့ၪယၫ ထၪ့ဝ့ၫလီၫႉ 

ၥၫ့ဎွၩဖရၫ့စ့ၭကလ့ၩစိၩလၧဒံၫမီကြ့ၫစံၫခးကိၪဂိၫဒဲ ဆူၫဒၫ့လံၩထံၭ အဂး အဂုအိၩအီၪက့ၪထၬဝ့ၫ မုနံၩမုၥၫ့ လၩယူၫလဲၫ့ (၂)ၥၫ့ဒဲထီၩ့စိၩ လၧ(၇)ၥၫ့နီၪ လ့ၩဝ့ၫလကဲၪထၪ့လၧၩ့ဘၪဒဲ  လၧၥုၪ့လမုၬၥၭလမုၬဘၪ အဖၧၩ့ ၥၫ့ဎွၩဘၪၥုၭထဲၩ့အခံၫ့လၧလၧယၫခီၫနီၪလီၫႉ

ဘၪန့လဲၪနီၪဘိၭ ၥၫ့ဎွၩဖရၫ့စ့ၭယီၩ ဘၪထိးဎွ့ၭထၬ အခၪ့လူခိၪအကၠီၩ့ ထၧၩ့အခၪ့အဖၧၩ့လးယီၩလဆၫထၪ့ဘၪအဂးနီၪ ၥံၪ့ဎွံၪဆရၫလဖၪ ဖ့ၪကိၪ့ဖ့ၪတဲၩ့အဝ့ၫ အီၪပထုၬထၬဆၧလ့ၩဆၧထဲၩ့လဖၪအကၠီၩ့နီၪလီၫႉ

ၥၫ့ဎွၩဘၪၥုၭခွံၬထဲၩ့အခံၫ့အကၠီၩ့ အၪ့ယၫထၪ့ဘၪ ကိၫဂိၫဒဲဆူၫဒၫ့ထံၪခးခိၪနါလဖၪဒဲ ၦဆူၩနဲၩဖိၪလဖၪနီၪလီၫႉ

ၥၫ့ဎွၩဒိၪအဆၧလ့ၩအီၪကွ့ၩလၧခးအၫဖရိကၭအထီ အဝ့ၫကလ့ၩအလးလဖၪနီၪႇ မွဲလၧ ကိၫဂိၫခးဝံးဒိၪ က့ၫၡၫဆၫ(Kinshasa) ဒဲ ဝံးဒိၪ ဂိၫမၫ(Goma), ဒဲဆူၫဒၫ့ခးဝံးဒိၪ ဂၠူၫဘၫ(Juba)နီၪလီၫႉ