ကဘၪထိးဆၧၫ့ တရူၭကွန်မြူနစ်ပၩတံၫအဂး တရူၭကဲၭၥလံၬလဖၪဘၪထိးအၪ့မၧၫ့ၥၭအဂဲး

         လၧအဖီၩ့ခွံၬ လၩအီဂၭ၁၈ၥၫ့ဒၪအိၩ ၦၡၩမၩထၪ့ဆၧ ၁၀ဘျၩ့လဘျၩ့ ကဲၭၥလံၬဆၧအီၪကီၪ့ဎိၭလၩ့ကွန်ကရက် လၧ တရူၭထံၪခး Hubeiခးရ့ၫ Wuhan ဝံးဖၧၩ့နီၪလီၫႉ လၧဆၧအီၪကီၪ့ဎိၭလၩ့နီၪအဖၧၩ့ တရူၭအဆၧပၧၩ့န့ထၬဝ့ၫအလးနံၫလး အဖၧၩ့အီၪဝ့ၫဒၪ ကဲၭၥလံၬဆၧဘိၪ့ဆၧဘၩလဖၪ ဘဲၫကထိးဆၧၫ့ တရူၭကွန်မြူနစ်ပၩတံၫအဂး ဘၪဆၧအၪ့မၧၫ့ဝ့ၫနီၪလီၫႉ ဆၧဒၪဎိၭလၩ့နီၪယံၭဝ့ၫဒၪ ၃ၥၫ့ဂီၩ့ ၥၫ့ခိၪဒိၪလဖၪႇ ဘိၪ့ခိၪၥၫ့ခၫလဖၪ ထီးလူၬလ့ၩထၪ့ဝ့ၫအဂၩ ၃၄၅ဂၩနီၪလီၫႉ

       တရူၭထံၪခးအဂးနီၪ တရူၭထံၪခးကဲၭၥလံၬၥၫ့ခိၪဒိၪလဖၪအခရၧၫ့လးမိထုၪ့(BCCCC)ဒဲ တရူၭအဲၪဆၨၩကဲၬၥလံၬခရၧၫ့ (CCPA)လဖၪအဆၧဂဲၩဝၭနီၪ အီၪက့ၪထၬၥီၪကၠဲၪလၧခိၪနါအဖၫ့ခိၪဒဲ လၧထံၪခးအဖၫ့ခိၪအၪမၬအကၠီၩ့ ခီၫလၧအဖီၩ့ခွံၬ၆နံၪ့ အထီအိၩ ဂဲၫထဲၩ့ထိးဆၧၫ့ထၬဝ့ၫအဂဲး ဆၨၩခးဒီၪ့ဆၧအီၪကီၪ့ခၩ့ဒိၪမွဲဝ့ၫဒၪ Cui Maohu နီၪစံၭဘၪဝ့ၫလီၫႉ

        ကဲၭၥလံၬလဖၪနီၪဒၪလၩ့ဎိၭလိၬၥၭလၧ ကွန်မြူနစ်ခိၪနါလဖၪဂီၩ့ဝ့ၫဒၪ၉ဘျၩ့အထီစၭထၪ့လၧ၂၀၁၆နံၪ့ဒၪအိၩ ဂဲၫထဲၩ့မၩ ဒိၪထၪ့ထီၫထၪ့ တရူၭခးဒိၪအဆၧထိၪတွၭလဖၪအဂဲးႇ တရူၭကဲၬၥလံၬလဖၪဘဲၫအဆၧဆူၩဆၧနဲၩကဒိၪထၪ့အဂး ထံၭလၩ့ထဲး အ့ၪဝ့ၫၥၭအဲၪဆၨၩဆၬအဂဲးႇ ကဲၬၥလံၬဖိၪလဖၪနီၪ လၧဆၧအီၪကီၪ့အဆၧၥီၪ့ဆၧၥၫ့ဒဲဆၧဖံၭဆၧမၩလဖၪအဖၫ့ခိၪ မွဲအၥၭဆီၪ့ ဝ့ၫနၬလ့ၬအဂဲးႇ အကၧၩ့ဒိၪထုၬမၩဒိၪထၪ့ၡၩခံးဂးလဖၪဒဲ ကျ့ၭစၨၭထၪ့ကၠၭဝ့ၫဘဲၫအဝ့ၫၥံၪအဆၧနဲၪ့ကဖျီၪထၪ့အဂးအဂဲး ဆုးထဲၩ့စံၭဘၪဝ့ၫနီၪလီၫႉ

          ဘၪထွ့ၪလၧ CCPA ခရၧၫ့အဆၧထိစိၩလၧအမွဲဝ့ၫ ခီၩ့စၧၫ့ကမံၩ့ ဆၧအီၪကီၪ့ဆၧမၩကမံၩ့ (One Council, One Mission) အဂဲးနီၪဘိၭ တရူၭဆၧးဎံၪဆၧးလၩႇ ဆၧဘိၪ့ဆၧဘၩလဖၪနီၪ ဆၧဘၪလၩ့ဎိၭအီၪလၧ Lausanne Academic အဆၧဂဲၩဝၭအဂဲး Huang Bingzhang Huang နီၪ ဒုၭဖျီၪ့ထၪ့ဝ့ၫနီၪလီၫႉ

        တရူၭကဲၭၥလံၬဆၧအီၪကီၪ့နီၪ လီၩ့ဖိၬထွ့ၪထံၪဂဲးခးဂဲးလၧဖၧၩ့ၥၭအတီၩကကဲၩ့အဂဲး ၥၫ့ခိၪဒိၪ Shen Bin နီၪစံၭဘၪဝ့ၫ လီၫႉ အဝ့ၫယီၩနီၪ လၧၥၫ့မုၥၫ့ခၫလဖၪႇ လၧၦၥၭၡါလဖၪဒဲ လၧဆၧဘိၪ့ဆၧဘၩဖိၪၥံၪကၠၧၫ့ကၠၧၫ့ ကျ့ၭစၨၭထၪ့ဝ့ၫ ဘဲၫမိကဲၬၥ လံၬ ဆၧအီၪကီၪ့ယီၩ ကအီၪၥုၪ့လၩ့ၥၭကန့လၧ လးဝၩ့နီၪဖၧၩ့ ဂုးဂုးခၧၫ့ခၧၫ့အဂး နီၪလီၫႉ

        လၧတရူၭထံၪခးဖၧၩ့ကဲၭၥလံၬဆၧဘိၪ့ဆၧဘၩအီၪဝ့ၫဒၪအကၠီၩ့ ဘၪထွ့ၪလၧဆၧအီၪကီၪ့အဆၧၥီၪ့ဆၧၥၫ့လဖၪနီၪ ကဖ့ၪ မၩဝ့ၫႇ ဘၪထွ့ၪလၧ ကရုနၫအဆၧဖံၭဆၧမၩလဖၪနီၪကဖ့ၪမၩအ့ၪဝ့ၫထံလၩ့ထီၩ့လၩ့အဂဲး စံၭဘၪဝ့ၫနီၪလီၫႉ လၧဆၧအီၪကီၪ့ ဎိၭလၩ့နီၪအဖၧၩ့ ကခွံၬလၩ့မာ့ခ်စ်ထီၩ့ဖျီၩ့အဂး တရူၭခးဒိၪ ဂျင်းရှင်ပင်နီၪ စံၭဝ့ၫဒၪလီၫႉ တရူၭထံၪခးနီၪမွဲလၧ ကွန်မြူနစ် တၡါၡါလဖၪတၭ လၧထံၪခးဖၧၩ့အီၪဝ့ၫဒၪ ဘူၭဒၭႇ Taoist, အစ္စလာမ်, ကက်သလစ် ဒဲ ပရိုတက်စတန် လဖၪနီၪ ထံၪခးထိးဆၧၫ့ထၬလၧနုၬတရၩအဖၧၩ့ ဆၧဘိၪ့ဆၧဘၩလဖၪလီၫႉ လၧတရူၭထံၪခးဖၧၩ့ ကဲၭၥလံၬဆၧဘိၪ့ဆၧဘၩဖိၪထီးလူၬ အီၪဝ့ၫဒၪ ၁၂ခွးနီၪလီၫႉ လၧတရူၭထံၪခးဖၧၩ့ ဘၪထွ့ၪလၧ ကရွံထၪ့ၥၫ့ခိၪဒိၪလဖၪအဂဲးနီၪ တရူၭခးဒိၪဒဲ ဘၫတံၫကၫ့ဆၧကၪ ဆၧဂဲၩအီၪထၪ့ယံၩယါလီၫႉ ဘၪနီၪလဲၪနီၪ မိဆၧအီၪကီၪ့အဆၧၥီၪ့ဆၧၥၫ့အဖၧၩ့ ပရွံထၪ့ၥၫ့ခိၪဒိၪအခၫနီၪ ဘၫတံၫကၫ့အိၩဘၪ ရွံထၪ့ဝ့ၫဒၪနီၪလီၫႉ ဘဲၫကမၩပျၩ့ခွံၬ ခးဒိၪဒဲဘၫတံၫကၫ့အကျၩ ဆၧကၪဆၧဂဲၩလဖၪကန့အဂးနီၪ ဘၪဆ့ၭလၩ့ကၠၭ ၥၭလၩ့ဎိၭစူၪမု ၂နံၪ့ကဘျၩ့အဂဲး ပၥ့ၪယၫဘၪနီၪလီၫႉ

နးအဲၪဖီၫဘွၩ