ကဆါယွၩထဲၩ့ကိၭထဲၩ့ ၥၫ့ခိၪဒိၪBp.John မၩ့ဆံၫ့ဎံၪ အီၪထၪ့ဘၭ၂နံၪ့ယူၭလီၫ

ပအဲၪကွံၩယူၭယၪ့ဘၪဒိၩ့ပၥံၫ့ဆၧအီၪကီၪ့ ၥၫ့ခိၪဒိၪလဂၩမွဲဝ့ၫ ၥၫ့ခိၪဒိၪ Bp.John မၩ့ဆံၫ့ဎံၪနီၪ မံၫမၪထဲၩ့လၧကဆါဎြံၬကထၪ့ဘၭဝ့ၫဒၪ ၂နံၪ့နီၪလီၫႉ 

ဆၧနီၪအကၠီၩ့ ၂၀၂၃နံၪ့ လၩယူၫလဲၫ့၂၂ၥၫ့ ၥံၭၥီၫမုနံၩ လဂီၩ၆နၩရံၫအခံၫ့နီၪ ဒိၩ့ပၥံၫ့ဆၧအီၪကီၪ့ မွန်ဆီညော် Fr.Henry အဲၪချံၫ့ဒဲ အီၪလၧဒိၩ့ပၥံၫ့ဆၧအီၪကီၪ့ဖၧၩ့ ၥၫ့မုၥၫ့ခၫထီးလူၬလဖၪ ကလ့ၩခိၪလ့ၩနါလုထၪ့လၩ့ဎိၭမံဆၩဆၧလုထၪ့ဂီၩ့ ကမၩအ့ၪၥၫ့ခိၪဒိၪ ၥံၫဖီၩ့ခွံၬအီၪထၪ့ဘၭ ၂နံၪ့ ဆၧနၪ့ထၪ့နီၪလီၫႉ 

လၧၥၫ့ခိၪဒိၪအဆၧနၪ့ထၪ့မံဆၩဆၧလုထၪ့အဖၧၩ့ ဘဲၫၦဆူနဲၩဖိၪၥံၪ ကၥ့ၪယၫထၪ့အဂးဒဲ ကဂဲၫလုထၪ့လၩ့ဎိၭ မံဆၩဆၧလုထၪ့ႇ ကဂဲၫအၪ့ကံၩ့ဘၩဆိၪဖၪအ့ၪ ၥၫ့ခိၪဒိၪအနးၥၭအဂးနီၪ St. Peter's Cathedral Parish Pathein

Page ယီၩထံၭလၫ့ ဘိၭဘၪၥ့ၪယၫထၬဝ့ၫအကၠီၩ့ ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ  

ၥၫ့ခိၪဒိၪယီၩ လၧမၧၫ့ဒံၭအထီအိၩ မွဲလၧဒိၩ့ပၥံၫ့ဆၧအီၪကီၪ့အဂးလကၭဘၪ အီၪလၧခးပယၩ့ဖၧၩ့ ၦဆူနဲၩဖိၪထီးလူၬ ဘဲၫကန့ဘၪနးၥၭအဂဲးဘၭအဂး အဝ့ၫယီၩဂဲၫထဲၩ့လုထၪ့မံဆၩဆၧလုထၪ့လၧ liveဖၧၩ့ ခီၫလၧကိၫဘံ၁၉ဆၧဆၫကဲၪထၪ့ဒဲ ထီးအဝ့ၫယီၩဘၪၥံၫခွံၬလၧ ဆၧဆၫအၧၩ့နီၪကကၠၪလီၫႉ ကၠၧၫ့ဒၪအနီၪလကၭဘၪ မွဲလၧဆၧဆၫအၧၩ့အကၠီၩ့ ၦလၧအဘၪဒၪဆၧၫ့ယၫလၧဆၧၡၪ့ဆၧယၬလဖၪအဂးဆ့ အဝ့ၫယီၩ ဂဲၫထဲၩ့ထိးဆၧမၩဘိၪ့လၧ ဆၧအီၪကီၪ့ဖိၪၥံၪအအီၪဂီၩ့ ဂဲၫထဲၩ့မၩဆၧၩ့ ၦဘၪကၪဘၪဂဲၩဖိၪၥံၪလဖၪအၪမၬဒံၭဆ့နီၪလီၫႉ လကၭဒံၭဘၪ ဂဲၫထဲၩ့ဖ့ၪနဲၪၥီၪ့ၥၫ့အ့ၪအၥိၪဖိၪၥံၪလဖၪလၧဆၧအဂ့ၩကိၭမံၩ့ဒံၭနီၪလီၫႉ ဒိၩ့ပၥံၫ့ဆၧအီၪကီၪ့အဂးအဝ့ၫယီၩ ဂဲၫထဲၩ့ခိးဂဲးခိးဘၭဝ့ၫဒၪ လူၬဂဲးလူၬဘၭနီၪလီၫႉ ဆၧနီၪအကၠီၩ့ ပဝ့ၫၥံၪအဖၫ့ခိၪ ၥၫ့ခိၪဒိၪယီၩ မွဲအခိးအတၩအီၪဝ့ၫဒၪအၪမၬအကၠီၩ့ ပကအီၪနၪ့ထၪ့အၪ့ကံၩ့ဘၩဆိၪဖၪထဲၩ့အ့ၪအဝ့ၫအဂးဂီၩ့တၭ ပကစံၭခိးစံၭတၩထဲၩ့အဝ့ၫလၧ ပဆၧအၪ့ကံၩ့ဘၩဆိၪဖၪ ကိၭဆၧၫ့ထီနီၪလါဆံၭႉ ၥၫ့ခိၪဒိBp.John မၩ့ဆံၫ့ဎံၪအနးၥၭကဖျိၪ့ယီၩ မွဲထဲၩ့အီၪဘၪလၧ ကဆါယွၩအခၪ့ထံၭ လၧဆၧမုၬဆၧၡူၪအဖၧၩ့လါဆံၭႉ 

နးအဲၪဖီၫဘွၩ