ၦၡၩဒဲ ၥံၪ့ထံၭၥံၪ့ဘီၩ့ (လမွဲဘၪ) ၦလၥ့ၪယၫဘၪ အခိးအတၩလဖၪ (၂)

ၦကွ့ၭလံၬဆၧဖိၪလဂၩ စံၭထၪ့ဝ့ၫဘဲၫၥ့ၪလဲစွါဘိၩႇ အဝ့ၫလ့ၩဝ့ၫလၧ န့ၫပၠံၪတီၫ အနီဒံၭၥၪအိၩႇ ဖၧၩ့ၥၭလဖၪနီၪ ၥုၪ့ထၪ့ဝ့ၫဒံၭၥၪအဆၧၫ့အထီနီၪလီၫႉ ရၫဇၥၭကဟဖၧၩ့ၥၭဖၭဒိၪနီၪ လဲၪ့ၥိၪ့လ့ၩန့ဒံၭၥၪကဖျိၪ့နီၪလီၫႉ မွဲဖၧၩ့ၥၭဖၭဒိၪအဖၫ့နီၪလဲၪ့ၥိၪ တီၫဝ့ၫ့လဲၫၥိၪ့ စဲၪ့ဝ့ၫဒၪလဒီၪ့လီၫဂီၩ့ ကနၫရံၩခီၫမၬဂဲၫထီၩ့ကဝ့ၫကဖျိၪ့နီၪလီၫႉ မွဲၦကွ့ၭလံၬဆၧဖိၪနီၪ ထၪ့ထုၬလဲၪ့ၥိၪဘၪမၪအကၠီၩ့ႇ ဘၪစဲၪ့လၩဝ့ၫလၧအဝ့ၫကလ့ၩအလးအဘုၭထုၬလဒီၪ့နီၪနီၪလီၫႉ မွဲဝ့ၫလၧဂီၩ ၁၁ နၩရံၫအထီနီၪအကၠီၩ့ႇ မုအဆၧခိဆီၪ့ဝ့ၫယူၬအၪမၬလီၫႉ ဆၧခိဝ့ၫအၪမၬအကၠီၩ့ႇ ဆၧပွံၭဆၧထၧၩ့ၥၭဒဲၥၭဝံထံၫနီၪအကၠီၩ့ႇ မုအဆၧခိဆီၪ့ဝ့ၫယူၭအၪမၬလီၫႉ ဆၧခိဝ့ၫအၪမၬအကၠီၩ့ႇ ဆၧပွံၭဆၧထၧၩ့ၥၭဒဲ ၥၭဝံထံၫနီၪအကၠီၩ့ႇ အဲၪဒိၭအီၪပွံၭလၫဖၧၫ့ၥၭအနဲၩ့လဆိလလးနီၪတၭ လီၩဎွါထၪ့ၥံၪ့အလၩယူၩအခၫလဒၪဘၪၥံၪ့နးထံၭနီၪလီၫႉ

လၧအဝ့ၫအၥၭခံဖၧၩ့ ဆီၫ့မီၪ့ဘၪဝ့ၫႉႉအီၩႉႉမွဲယလထီၩ့ဘၪလၧပွ့ၫခိၪပွ့ၫနၭလါနၫ့ႇ ၥံၪ့ထံၭၥံၪ့ဘီၩ့ လအီၪဘၪနးထံၭနီၪ လၩ့ဆၫ့လၩ့မဲၩအီၩဒဲမၬလဲၪႉႉလၧၡါဒီၩ့ဖၧၩ့ပဖီယုၩယါဘၪ ပၠံၩ့မနၩ ၥံၪ့မံၩ့လၬကျၩ ၡိယိၬဝ့ၫဘဲၫၥ့ၪလဲၪႉႉလၩ့ၥၭမဲၪအီၪဝ့ၫဘဲၫၥ့ၪလဲၪနီၪပဖီဘၪလ့ၫတၭၥံၪ့ထံၭၥံၩ့ဘီၩ့အီၪ အီၪဝ့ၫအၪမၬအလးယီၩ ဘဲၫၥံၪ့လအီၪလၧၩ့ဘၪ နးဘီၩ့အဂးဖ့ၬပျၩ့ထၪ့ခွံၬဝ့ၫဘဲၫၥ့ၪလဲၪႉႉအ့ၩႉႉဘၪလဘၪ ဖၧၩ့ၥၭအဲၩ့လဒီၪ့ဒီၪ့ႇ ပအီမွံၭန့အလး ၥံၪ့အီၪလထံၭထံၭစွါဘိၩႇ ကမဂါဝ့ၫအၪမၬနဲၪႉႉၦကိၭနၪဆၧဖိၪၥံၪဧ့ႇ ဆၧအယီၩလၧၥံၪ့ထံၭၥံၪ့ဘီၩ့အီၪပန့ထၪ့ဝ့ၫန့ နံၫမံၩ့လမံၩ့အခိးအတၩနီၪလီၫႉ