ၦၡၩဒဲ ၥံၪ့ထံၭၥံၪ့ဘီၩ့ (လမွဲဘၪ) ၦလၥ့ၪယၫဘၪ အခိးအတၩလဖၪ (၁)

“ထံၫအၥၭနီၪ အီၪဒၪကဂီၩလီၫ” မွဲဆၧချဲၩ့ဒီၩ့ယီၩ ၦၡၩဒဲဆၧဖိၪဆၧလံၩၥံၪအီၪၥၭမၧၫ့ကန့အဂး ထံၫအလူဒိၪဎွ့ၩဒိၪအီၪဝ့ၫဘဲၫၥ့ၪလဲနီၪ ထုၬဖျီၪထၪ့ထၬဝ့ၫလီၫႉ လါနၫ့ဂ့ၩႇ လံၩစွါဘိၩႇ အရ့ၩဒိၪအီၪဝ့ၫအၪနဲၫ့န့အနီၪနီၪလီၫတ အ့ၪလၥွ့ၭဘၪလံၩဂီၩ့ ကအီၪဝ့ၫဖိၭဘိၭ ယဲမံၫနံၬနီၪ မပၧၩမၬ ထိးဝ့ၫလန့ဘၪအကၠီၩ့ႇ ယစီၪဝ့ၫဘဲၫနီၪၥိၭလီၫႉ 

ဆၧဆီၪ့ဆၧချဲၫ့အဂးစွါဘိၩႇ ကဘၪၥွံထၪ့ၥၪလၩ့ဝ့ၫဒၪလၧလံၩအဆံၫ့အဎံၪနီၪလီၫႉ အဂဲးယီၩမွဲလံၩအဆံၫ့အဎံၫနီၪ ဆၧၥၭလိၫၥၭလံၭပၫၡၩဝ့ၫဂီၩ့ အီၭစံၫဂၠၫပၫဝ့ၫလၧၫ့လၧၫ့ဎွ့ၩဎွ့ၩနီၪလီၫႉ လၧဆၧဆၧဂံၪ့အလးစွါဘိၩႇ ဆၧဆၧဆါလနၩ့နၩ့ ဘၪဖ့ၪထၬအ့ၪဝ့ၫ အီၭစံၫဂၠၫနီၪလီၫႉ ဆၧမၩအၥၭဘဲၫယီၩၥိၭနီၪ ၦၡၩဒဲ ၥုၪ့ၥၭအီၪဆၧဖိၪဆၧလံၩၥံၪအဂး လိၫဝ့ၫလဆိၩၡၩ လံၫနီၪ အီၭစံၫဂၠၫပၫဝ့ၫအကၠီၩ့နီၪလီၫႉ မွဲဘဲၫနီၪၥိၭတၭ ၦထီးအလူၬအၥၪထၪ့ၥၪလၩ့အဂး လိၫဝ့ၫလဆိၩၡၩအီၭစံၫဂၠၫနီၪ ထုၬထၪ့ဝ့ၫအခိးအတၩဎိၩဒိၪၦလဖၪနီၪ ပကြၨၭယူၭယၪ့ပၭကၩထၪ့ဝ့ၫလီၫႉ မွဲအဝ့ၫၥံၪနီၪ လမွဲဘၪ ၦအဂူၫဂၩတၭမွဲဒၪၥံၪ့ထံၭၥံၪ့ဘီၩ့လဖၪနီၪလီၫႉ လိၫဘီၩ့ထၪ့အထီဘၪဝ့ၫၥံၪ့ထံၭဘီၩ့လဖၪနီၪ ထုၬထၪ့အီၭဆံၫဂၠၫနီၪလီၫႉ ဎိၩထၪ့ဒိၪထၪ့ဝ့ၫၥံၪ့ထံၭလထံၭနီၪ ၦၡၩ (၈) ဂၩအဂး ထုၬထၪ့အ့ၪဝ့ၫအီၭစံၫဂၠၫန့နီၪလီၫႉ ၥံၪ့ထံၭဖၭဒိၪလထံၭစွါဘိၩႇ ထုၬထၪ့ဝ့ၫန့အၪနဲၫ့န့ အနီၪနီၪလီၫႉ ဆၧအယီၩ မွဲဒၪ ၥံၪ့ထံၭၥံၪ့ဘီၩ့ ဖ့ၪခိးဖၧၪတၩထၪ့ဆၧအဆိၪထုၬလထံၪနီၪလီၫႉ