ၥၭဆုးလီၩ့ဝ့ၫဒၪ ဖီၫလဖၪ (၂)

ထၧၫ့ဖုဝဲမုၪခွၫၥံၪဧ့ မုကနွ့ၫယီၩ ယမိအဲၪဒိၭဆုးလီၩ့အ့ၪဘၪနၥံၪ ၥၭဆုးလီၩ့ဝ့ၫဒၪ ဖီၫလဖၪအဂဲးနီၪလီၫႉ ထၧၫ့ဖုဝဲမုၪခွၫၥံၪဧ့ ဆၧလၧဖီၫနီၪ ၦၡၩအၪဒၪဆၧ ဒၪဝ့ၫဒၪလၧ ကမၩဂ့ၩထၪ့အၥၭအဂးႇ ကမၩဎံၫလၩထၪ့အဂံၪ့ အဂးႇ ဆၧၥိၩ့ထၪ့ဝ့ၫဒၪ ဆၧမၩဎံၫလၩထၪ့ဆၧကမံၩ့လီၫႉ လါနၫ့ ဖီၫလဖၪနီၪ ၦဎံၫလၩထၪ့ဆၧအဂးလကၭဘၪ အရ့ၩဒိၪဝ့ၫဒၪ အဆၧထိစိၩအီၪဝ့ၫဒၪလီၫႉ 

            ဖီၫလဖၪ အဆၧနဲၪ့အမံၩ့မံၩ့နီၪ ဆၧပိၭဆၧလၫ့အမံၩ့မံၩ့အဂး မၩထၪ့ဖျီၫ့ဝ့ၫ အခီၫပယီၫအမံၩ့မံၩ့လီၫႉ လၧဖီၫအီၪနီၪ ဆၧအၪ့ဆၧအီၩန့ဝ့ၫအမံၩ့မံၩ့ႇ ၥံၪ့ဎွံၫန့ဝ့ၫအမံၩ့မံၩ့ႇ ဆၧဂုၪထၪ့ၥံၪ့ဎွံၫန့ဝ့ၫအမံၩ့မံၩ့ လကၭဒံၭဘၪ ဆၧကီၩ့ဆၧၥိၭႇ ၦဆၧၥၭမၧၫ့ကိၭနံၩအဖၧၩ့လိၫဝ့ၫဒၪ ဆၧၥိၩ့ထၪ့ဆၧကိၭမံၩ့ဒ့ၭနီၪ ထုၭထၪ့ဝ့ၫန့လီၫႉ အရ့ၩဒိၪထုၬကထံၪနီၪ ဖီၫလဖၪနီၪ အထံၭလဖၪအကၧၩ့ဒိၪထုၬ မၩအၪဆၧချံၫ ကကဲၩ့ကခီၫနီၪလီၫႉ

            ထၧၫ့ဖုဝဲမုၪခွၫၥံၪဧ့ ဆၧလၧဖီၫလဖၪနီၪ ဘဲၫဆၧဖိၪဆၧဎါဂူၫဂၩလဖၪ အၪ့ႇ မၩဂၭဂီၩ့အဝ့ၫၥံၪလန့ဘၪအဂး လၧအဝ့ၫၥံၪအဘီၩ့ဎွံၪလီၩ့နီၪ ဆၧပဒၩ့ထၬဆၧ အဆူၪပၫဝ့ၫဒၪလီၫႉ စံၭမၬချၭ-ဖီၫဆၧဆူၪႉ  ဖီၫအဂူၫဂၩလနၩ့နၩ့နီၪ အ့ၪပအၪ့ဘၪစွါဘဲၫ ကဲၪထၪ့အစုၪ့ၥ့ၪဝ့ၫဒၪလီၫႉ ထၧၫ့ဖုဝဲမုၪခွၫၥံၪဧ့ လၩ့ဆၫ့ဝ့ၫဒၪ ၥံၪ့ကျၭလဖၪအၪဒၪဆၧနီၪ မွဲဂဲၫမၧၫ့ထၪ့လၧ ဖံၭဖၫ့ခိၪအ့ၬဂီၩ့ ဂဲၫမၧၫ့ထၪ့ယုၩယါလၧ ၥံၪ့ထံၭထီၫထီၫအလီၩ့လီၫႉ အဝ့ၫၥံၪအဂး လိၫဝ့ၫဒၪ ဆၧအၪ့လဖၪနီၪ န့ဝ့ၫဒၪလၧ လံၩဖၧၩ့လီၫႉ