ၥံၪ့ကျိၭလူၬပျီၩခွံၬ (၁)

ပယၩ့အဆၧချဲၩ့ဒီၩ့အီၪဝဲၩ မွဲဝ့ၫ ဥတုရာသီတောကိုမှီ ဆၧချဲၩ့ယီၩမွဲဝ့ၫတၡါလီၫႉ ၥံၪ့ကျိၭၥံၪ့ထံၭ အီၪဝ့ၫအလးအကျဲၩ့ဒဲ လအီၪဘၪအလးအကျဲၩ့လဖၪ လၩ့ဆၫ့ဝ့ၫဒၪအၪမၬလီၫႉ ဆၧၫ့ထီဘဲၫယီၩ ပကဒၪဘၪ ၥံၪ့ကျိၭလူၬပျီၩခွံၬအကၠီၩ့ ကဲၪထၪ့ဝ့ၫဒၪ ဆၧအၧၩ့လဖၪ အလးအကျဲၩ့ထီးအဎံၩ့လီၫႉ

ဆၧလၧၥံၪ့ထံၭၥံၪနီၪ စွံၭထၪ့ ကၫဘိၫဒဲၫ့အီၭစဲၭဂီၩ့ ၦခမျၧးၥံၪအဂး ထူၭထၪ့ထဲၩ့ အီၭဆံၫဂၠ့ၫနီၪလီၫႉ ဘဲၫဆၧၫ့ထီလဖၪ လ့ၩထၪ့လ့ၩထီၪ့အၥိၭ လဲၪၥိၪလဖၪ စဲၭလဲၪယဲးခၪ့လဖၪဒဲ စဲၭဒူၭၥံၪ စဲၪ့ထၪ့စီၩ့ဂဲးလဖၪနီၪ ကစွံၭထၪ့ဝ့ၫအဂး ၥံၪ့ထံၭၥံၪ့ကျိၭၥံၪလဖၪ လအီၪဘၪအလၧၫ့အဎွ့ၩအကၠီၩ့တၭ ၦဂၪ့ခိၪချိၫ့ယီၩ ဂဲၫခိထၪ့နီၪလီၫႉ ဆၧအခိလဖၪ ကနံၪ့ဒဲကနံၪ့ ဂဲၫအၪထၪ့အကၠီၩ့ ထံၫလိးခိၪလီၩ့လဖၪ အထံၫဖံထၪ့ ႇ ထံၫလဖၪ ဂဲၫလၩ့ၡၩထၪ့ ႇ ၥံၪ့ကျိၭလဖၪမ့ၪအၪ ႇ ဆၧအၥၭမၧၫ့အၪဒၪဆၧ အၥၭမၧၫ့အဆၧၫ့အထီဂဲၫလၩ့ဖုၪလၪ့နီၪလီၫႉ

ၥံၪ့ထံၭလဖၪ အဝံၥံၪနီၪ စွံၭထၭဖံၭန့ဂ့ၩဘၪစဲၪ့ လကၭဒံၭဘၪ မၩဆၧၩ့ဒံၭဝ့ၫလၧ ဆၧဆၧၩ့ထံၫလဖၪ ထဲၩ့နုၬလၩ့လၧ ဖံၭဖၫ့လၬအၥိၭဒံၭနီၪလီၫႉ ဘဲၫယီၩအလးခဲၫ ဆၧဆၧၩ့လဖၪ ကထံၪလီၫ ဆၧဆၧၩ့ဎိၩလၨၪအကၠီၩ့ ကဘၪနုၬလၩ့လၧဖံၭဖၫ့လၬအခံၫ့လအီၪဘၪဒဲ ကဲၪထၪ့ ထံၫဎိၩလၩ့နီၪလီၫႉလါနၫ့ဂ့ၩ လးကျဲၩ့လနၩ့နၩ့နီၪ ဘၪဒၪဎီၩ့ဆၧၫ့ယၫ ထံၫၡၩဝ့ၫဒၪ ဆၧကၪဆၧဂဲၩနီၪလီၫႉ ထံၫၡၩဝ့ၫဒၪ လးကျဲၩ့လဖၪနီၪ ပကဒၪဘၪ ၥံၪ့ကျိၭၥံၪထံၭလဖၪ အီၪဝ့ၫၡၩခိၭဖိၪလီၫဒဲ ကအီၪဎဲၪ့ထၬနီၪလီၫႉ မွဲဆၧဘဲၫနီၪ ဖံၬအၪ့လၩ့လဲၬလဖၪ ႇ ၡၬလဲလဖၪႇ ထံၫဎိၩလၩ့ ႇ ဆၧဖိၪဆၧဎါလၧအအီၪၡိၬကျၩလဖၪ အဆၨၩလၩ့မၬ ႇ ထံၫလၩ့ၡၩ မွဲဝ့ၫဆၧလဖၪၥံၪယီၩ ကဂဲၫကဲၪ ထၪ့နီၪလီၫႉ

ဖံၬအၪ့လၩ့လဲၬကဲၪထၪ့အခၫ အဝ့ၫအၪ့လၩ့လဲၬထၬဖံၭလဖၪအဖၫ့ခိၪနီၪ ဆၧဆၧၩ့လၩ့အကၠီၩ့ ထဲၩ့ပၫထဲးဎုၬ လၧဆၧဆၧၩ့ထံၫကၠၧၫ့ကၠၧၫ့အကၠီၩ့တၭ ဘံၩလဖၪဂဲၫထၪ့ဘွ့ၪလၫ့ ပကဒၪဘၪထံၫဎိၩလၩ့ကိၭနံၪ့ဒ့ၭလီၫႉ မွဲဆၧဘဲၫနီၪ ဘံၩနဲၩ့ထံၭလဖၪ ၡါလၩ့ဂီၩ့ ဂံၪ့ၥံၪဎၫ့ၥံၪလဖၪ ဘၪဂၭဂီၩ့ဂၭစၪနးဆ့ ပကနါဂၧၫ့ဘၪကိၭနံၪ့ဒ့ၭလီၫႉ