အဲၪဒိၭဝ့ၫၥ့ၪလါဆံၭ (၂)

ဆၫဖၪဆၧလံၩအလိၫအီၪဆၧလဖၪဒဲလၧၫ့ဎွ့ၩဝ့ၫထီးလူၬႇ ချံၪ့မူၬၡူၪဘၩဝ့ၫဂၪ့ခိၪချိၫ့နီၪလၩ့အဲၪလၩ့ကွံၩအီၪဝ့ၫဘဲၫၥ့ၪလဲၪႉႉ ပကြၨၭစံၭခိးစံၭတၩထၪ့ဘဲၫၥ့ၪလဲၪႉႉလါနၫ့ဂ့ၩႇ ဂၪ့ခိၪချိၫ့ယီၩပအဲၪပကွံၩလၥ့ၪဘၪႇ ဆၧယူၭယၪ့ပၭကၩဆၧလအီၪဘၪနီၪ ကလၩ့ဂါဝ့ၫဘဲၫ ခွံၬၡိၬထးဂၪ့ခိၪချိၫ့ဂီၩ့ၦအလ့ၩဆၧလဖၪနီၪလီၫႉ

လဆိလလး ပအဲၪဒိၭဆၧလဖၪနီၪ ထုၬထၪ့ဝ့ၫလၧအမ့ၬယၫဂီၩ့ ဂၪ့ခိၪချိၫ့စခၩကကဲၪဝ့ၫဘဲၫၥ့ၪလဲၪနးမံၩ့ႇ လၥၭအုၭဘၪဆၧဂီၩ့ မၩထၪ့ဒၪလၧအခီၫ့ၡၩအဂးၦလဖၪအီၪဝ့ၫအၪမၬနီၪလီၫႉ ဆၧမၩဂၭဂီၩ့ဂၭစၪထၪ့ဆၧအီၪဝ့ၫအၪမၬနီၪအကၠီၩ့ႇ ဂၪ့ခိၪလုၫလါ အနဲၩ့အဎီၩ့ဂၭဂီၩ့ဂၠစၪထၪ့ဝ့ၫတၭအဆၧၫ့အထီလမွဲလတီၩလၧၩ့ဘၪနီၪအကၠီၩ့ႇ အ့ၪအီၪၥၭမၧၫ့လန့လၧၩ့ဘၪအခၫ ကလ့အီၪၥၭမၧၫ့ၥုၭကျဲၩ့ၥၭလၧဂုခိၪချိၫ့အအလးတခီၫလဲၪႉႉ

ၦခိၭနၪဆၧဖိၪၥံၪဧ့ႇ “မီၪယဒဲၭ ထံၫးနီၪ ထီၫဝ့ၫဒၪလၧ ပၫလဲၪမၫဆမံၭထံၫအမ့ၬပၫ ဖိၭဘိၭနံၫမံၫတၫလီၫအကၠီၩ့ႇ ပနါဂၧၫ့ယုၩယါဘၪဝ့ၧလီၫႉ ထ့ၫယဲၩ့ခးယဲၩ့ လံၬဆၧပရၧၩ့ဖၧၩ့ ပဒၪဘၪလ့ၫ ထံၫခးနီၪဘၪဎၭလၧဂၪ့ခိၪလုၫယါအနဲၩ့အီၩ့အဂး ဆၧအီၪကိၩ့ အီၪကီၪ့ထၪ့ဆၧနီၪ ဘၪအီၪကီၪ့ထၪ့ဝ့ၫဒၪလၧ ထံၫအဖၫ့လၬအဆၧဂဲၩဆၧဝၬဆၧနီၪ လၧလူၥီၫဂၩ့ဖျီၪ အဖၧၩ့ဒၪဘၪဝ့ၫလီၫႉ မုဆၫလနံၩယီၩ အဆၧၫ့အတီကဲၪထၪ့ဝ့ၫလမွဲလတီၩလၧၩ့ဘၪနီၪအကၠီၩ့ႇ ဂၪ့ခိၪထၨၩဘံၪ့ယၫဘၪဒဆၧၫ့ယၫဝ့ၫဂၪ့ခိၪလုၫလါအဆၧနိၫ့ဆၧနါနီၪဘဲၫအဂုခိၪထုၬအီၩ ယစံၭထၪ့ထၬဝ့ၫအၥိၭ လံၩ ထံၫဒဲ ၥံၪ့မံၩ့လၬကျၩ ၥၧၫ့မံၩ့ယီၩ အလးကိၭဆီၪ့ဒ့ၭဆုၬဆုၬအဖၧၩ့ၦခမျၧးဟံၪအဆၧဂဲၩဆၧဝၬလဖၪနီၪအကၠီၩ့ႇ ဆၧဂၭဂီၩ့ဂၭစၪ ကဲၪထၪ့ဝ့ၫနီၪလီၫႉ မွဲယၩနံၪ့ ၂၀ ယၩနံၪ့ ၂၁ အထီနီၪ မွဲဝ့ၫဆၧကိၪ့ဘၪကိၪ့ၥ့ၪအဆၧၫ့အထီလီၫႉ မွဲဝ့ၫစဲၩ့ယၫ့အထီနီၪအကၠီၩ့ ၦၡၩၥံၪဂၧၫ့ထုၥၩလၩ့ကိၭၡါထၪ့အလူလါနၫ့ဂ့ၩ  အဂူၪဂၩအလကဲၩ့ခီၫ ဆၧဂၭဂီၩ့ဂၭစၪထၪ့ဆၧ လတီၩလလီၩ့ထၪ့ဘၪဆၧၥၭမဲၪၥၭဖၬဲၩ့ဆၧလဖၪနီၪ ဖျီၪထၪ့ဝ့ၫလီၫႉ ဂၪ့ခိၪချိၫ့အၪဒၪဆၧအလး ဆၧဆၧၩ့ထၪ့ဝ့ၫအနၭထုၬနီၪ အကၠီၩ့ ထံၫဎိၩနိၫ့ဎိၩ့လဖၪ ဂံၪ့ဎၫ့ဒဲ လဲၪ့ၥိၪၥံၪလၩ့ယွၩဝ့ၫ ဖံၬဎုထၪ့ဝ့ဆၧ ၦၡၩဘၪၥံၪဘၪဆၫဆၧလဖၪ ကဲၪထၪ့ဝ့ၫလီၫႉ