အဲၪဒိၭဝ့ၫၥ့ၪလါဆံၭ (၁)

ဆၧဆၧၩ့ခၫအထီအိၩ အီၪထးဝ့ၫကမၫလဘံၪ့နီၪ ယၪဖိၪယၪလံၩၥံၪ မုၬလၩယါထံၫဝ့ၫလၧအဖၧၩ့နီၪ အၪမၬလီၫႉ မွဲကမၫနီၪ ယၫဖိၪယၫလံၩၥံၪ အဂၪ့ခိွချိၫ့နီၪလီၫႉ ဆၧယီၩခၫၥၫ့လထီၩ့ဒံၭဘၪအထီ ထံၫနီၪ လၩ့ၡၩဝ့ၫယူၭလီၫႉ လယံၬလမီးဘၪအထီ ယၪဖိၪယၪလံၩၥံၪနီၪ ဆၧဂၭဂီၩ့ဂၭစၪထၪ့ဆၧကအီၪထၪ့ဝ့ၫနီၪလီၫႉ

လၧကမၫနီၪနီၪအနဲၩ့ ဆၧယူၩကခွံၬန့အလးနီၪ ထံၫအီၪဝ့ၫလၧၫ့လၧၫ့ဎွ့ၩဎွ့ၩကမၫဖၭဒိၪအီၪလဖျိၪ့နီၪလီၫႉ လါနၫ့ဂ့ၩ ယၪဖိၪလံၩလဖၪနီၪ ကဘၪခၪ့ဂၬခီၪ့ၥူၪအဂးနီၪ အဆီၩ့ဂဲးလအီၪဘၪအကၠီၩ့ ကဘၪဂၭဂီၩ့ဂၭစၪခွံၬဝ့ၫလီၫႉ လါနၫ့ဂ့ၩ အ့ၪအဆၧဘိၪ့ဂ့ၩတၭဘၪလဂၩဂၩအ့ၪဂဲၫခွံၬလၩ့လၧကမၫဖၭဒိၪဖၧၩ့နီၪစွါဘိၩ အၥၭကဆုးမၧၫ့ဝ့ၫကန့နီၪလီၫႉ

အဲၪကွံၩဘၪၦခိၭနၪဆၧဖိၪၥံၪဧ့ႇ မွဲဘဲၫနီၪၥိၭ ၦဂၪ့ခိၪချိၫ့ယီၩ ကဂၭဂီၩ့ဂၭစၪထၪ့အဂးဘၪဒၪဆၧၫ့ယၫထၪ့စွါဘိၩ ၦဂၪ့ခိၪဖိွၥံၪယီၩ ကဂၭဎ့ၭထၪ့ခွံၬဆၧဘဲၫၥ့ၪလဲၪႉႉ

ဆံၫ့ဎံၪဝ့ၫလံၩ ထံၫဒဲၥံၪ့ထံၭမံၩ့လၬကျၩလဖၪနီၪ ဆၧဖိၪဆၧလံၩၥံၪ ကအီၪၥၭမၧၫ့ကန့အဂး လိၫဝ့ၫဆၧၥၧၫ့မံၩ့နီၪလီၫႉ မွဲဘဲၫၥိၭလိၫဝ့ၫဆၧၥၧၫ့မံၩ့နီၪအကၠီၩ့ ဆၧဖိၪဆၧလံၩလအီၪဒံၭဘၪအထီ ဆၧလဖၪၥံၪနီၪအီၪထၬဝ့ၫယူၭလီၫႉ ဆၧနီၪအကၠီၩ့ ဆၧၥၧၫ့မံၩ့ယီၩ အ့ၪလမံၩ့မံၩ့ဂၭဂီၩ့ဂၭစၪဝ့ၫစွါဘိၩ ဆၧဖိၪဆၧလံၩလဖၪဆ့ ကအီၪဆုးၥၭမၧၫ့လန့လၧၩ့ဘၪနီၪလီၫႉ

နေစင်္ကြာဝဌာ အဖၧၩ့စၭထၪ့လၧ ဗုဒ္ဓဟူး ဒဲ ထၧၩထီၩ့စနေဂြိုလ် အလးနးဆီၪ့မၬ မွဲဘဲၫဂၫ့ခိၪချိၪ့အၥိၭၥံၪ့မံၩ့လၬကျၩလဖၪ ချံၪ့ချံၪ့ယံၫယံၫဒဲ ထံၫဆၧၫ့ ထံၫဂၫ့လဖအီၪနီၪ ပလနါဂၧၫ့ယုၩယါဘၪနီၪလီၫႉ မွဲဂြိုလ်လဖၪနီၪ လိးၥံၪ တီၫ့ၥံၪစ့ၩၥံၪ မနံၬထမျါၥံၪကအီၪဝ့ၫၥ့ၪနီၪလီၫႉ လါနၫ့ဂ့ၩ ကအီၪၥၭမၧၫ့ဝ့ၫကန့ဘဲၫၥ့ၪလဲၪနီၪ ဖၧၩ့ၥၭလအီၪဘၪလီၫႉ