အီၪလၧထံၫထၪကျိၩ့ ၥံၪ့လမူၭလဖၪ

လၧခးပယၩ့အဖၧၩ့ အရ့ၩဒိၪပၪ့လဲၪနဲၩ့လးကျဲၩ့လဖၪမွဲဝ့ၫ ရခဲၫ့ႇ အ့ၫယၫဝတံၫဒဲ တန့ၫလၫရံၫလးကျဲၩ့လဖၪ ၥံၪ့လမူၭၥံၪ ဂဲၫမၧၫ့ထၪ့ဝ့ၫဒၪလီၫႉ လၧခီၩ့ခီၩ့အိၩ ၥံၪ့လမူၭလဖၪ အီၪဝ့ၫအၪမၬအလးအၪဒၪဆၧနီၪ အထီဘဲၫယီၩ အီၪထးဒၪမွဲ ၦၡၩဖ့ၬထၬအလးနီၪလီၫႉ အနီၭအဖၧၩ့ လၧပထံၫထၪကျိၩ့လးကျဲၩ့ဖၧၩ့ ၥံၪ့လမူၭလဖၪ မွဲပၫဆ့နီၪလီၫႉ ဆၧလးကျဲၩ့ယီၩ မွဲခးပယၩ့ဖၧၩ့ ၦခမျၧးၥံၪအီၪအၪဝ့ၫဒၪအလးကပၫဒဲ အထီဘဲၫယီၩ ၥံၪ့လမူၭ ဂၭဂီၩ့ဆိၫ့ဂီၩ့ခွံၬဝ့ၫဒၪ ကအီၪ ၈၀ ယၩဒူၩယူၭနီၪလီၫႉ

            လၧထံၫထၪကျိၩ့ခးဒီၪ့လးဝၩ့ဖၭဒိၪယီၩ မွဲထံၫလမူၭအီၪထၬဝဲၩ့အလး လၩ့ဘူၭ ယၩဒူၩ ၁၀၀ နီၪလီၫႉ နံၪ့ ၁၉၄၇နံၪ့ ဆၧထုၬထၪ့ ၦလၧအဘၪပၧၩ့ၥံၪ့လမူၭလးကျဲၩ့လဖၪ လီၩ့ထၬဝ့ၫ မွဲဘီၪၥံၪလဖၪ အီၪလၧၥံၪ့လမူၭကျၩအကၠီၩ့ နီၪလီၫႉ လါနၫ့အထီဘဲၫယီၩ အလးအကျဲၩ့အၪဒၪဆၧနီၪ ဆၧအထံၭလဖၪ အထီၫ့ကမိအီၪဒၪ ၅ မံၫတၫလအ့ၬဂီၩ့  ပဘၪဆိၫ့ခွံၬ ၥံၪ့လမူၭအခိးအတၭလဖၪ ထီးအလူၬနီၪလီၫႉ အ့ၪမွဲထံၫလမူၭလဖၪၥံၪယီၩ အီၪစွါဘဲၫ ၡါလဲ ထံၫအၪ့လဖၪနီၪ မွဲကပဒၩ့ထၬဝ့ၫ ယၩဒူၩအလၧၫ့အဎွ့ၩလန့ဘၪလါနၫ့ဂ့ၩ အဆၧၫ့အထီကဒုၩ့အဖၫ့ခိၪ အဝ့ၫၥံၪပဒၩ့ထၬအ့ၪပၧၩန့နီၪလီၫႉ

            လၧလးကျဲၩ့ဖၧၩ့ ခီၫ့ၡၩအနိၫ့ဖၧၩ့ ဆၧပဒၩ့ထၪ့ထၬ ၥံၪ့လမူၭ ဘၪဒၪခီၩ့ဆၧၫ့ယၫဆၧကၪဆၧဂဲၩ့လဖၪနီၪ မွဲဝ့ၫ ၦၡၩမၩလဲလၫ့ဆံၭႇ ၦၡၩဖ့ၬၥံၪ့မုႇ ၦၡၩအၪ့ဎိၪၥွၫထီးဒဲ ၦၡၩခုၪ့ၥဒၫ့ကမၫအကၠီၩ့ ပၥ့ၪယၫဘၪနီၪလီၫႉ ၥံၪ့လမူၭလဖၪယီၩ အီၪအကၠီၩ့ ပဒၩ့ထၬအ့ၪပၧၩ လံၩမုလဖုၬန့ဒဲ ဖီၪ့ဂုးခၧၫ့ထၬအ့ၪပၧၩ ပၫ့လဲၫဆၧအၪ့ဆၧအီၩ အခၪ့ထံၭခၪ့ဎၧၩ့လဖၪ န့ဝ့ၫဒၪနီၪလီၫႉ မွဲဆၧဘဲၫနီၪ ကျ့ၭစၨၭၥုၪ့လၩ့ထဲၩ့ၥံၪ့လမူၭလဖၪဒဲ ဆၧပဒၩ့ထၬဆၧထံၫလၩ့ဒီၪလၩ့လဖၪ မၩထၪ့ဖျဲၪဖျဲၪအကၠီၩ့ ပကိၪၥ့ၪလဖၪ ဖ့ၪကိၪ့ဖ့ၪတဲၩ့ထၪ့ထၬနီၪလီၫႉ