အီၪဂုးခၧၫ့ ဘဲၫခးပယၩ့အၥၭၥွံၪဖျီၩ့မွဲဝ့ၫ အ့ၫယၫဝတံၫဘံၩအဂဲး

အီၪဂုးခၧၫ့ ဘဲၫခးပယၩ့အၥၭၥွံၪဖျီၩ့မွဲဝ့ၫ အ့ၫယၫဝတံၫဘံၩနီၪ ခၪ့ဂၬခးပယၩ့အကျၩၥၭဂီၩ့ လၩ့ယွၩဝ့ၫဒၪလၧ လံၩထံၭဒဲ လံၩခံၫနီၪလီၫႉအ့ၫယၫဝတံၫဘံၩ စၭထၪ့ ဂဲၫကဲၪထၪ့ခီၫလၧ ဖီၩ့ခွံၬနံၪ့ ဖိၭဘိၭ ခွး ၄၅ အိၩ ဆၧနီၪ ခးပယၩ့ ဆၧလ့ၩထၪ့လ့ၩထီၫ့ဒဲ ဆုးကျိၭအၥၭ ဘံၭဖၭဒိၪနီၪလီၫႉ 

ဆၧကိၭဝ့ၫအမံၩ့လၧ အ့ၫယၫဝတံၫနီၪ ၦလနၩ့နၩ့ ထယၬန့ထၬ မွဲအီၪဂဲၫလၧ ဟိန္ဒီအဆၧချဲၩ့  ဣရဝတီႇ အခီၫပယီၫနီၪမွဲ ကဆၫ့ဘံၩလါနၫ့ဂ့ၩ သင်္သကရိုက် ဆၧချဲၩ့ ပရုပဏီ (ဧရာဝတီ) အမံၩ့နီၪ မွဲ လၩ့ဘူၭနၭထၪ့အကၠီၩ့ လီၩ့ထၬဝ့ၫဒၪနီၪလီၫႉ အခီၫပယီၫနီၪဘိၭ မၩလၧၫ့ဎွ့ၩထၪ့ဂဲးဘၭ လမွဲဘၪ ဘံၩ နီၪလီၫႉ အီၪလၧ ခးအံၪ့ဒံၩယၬ ပၫဝ့ၫဒၪ ဘံၩယဲဘံၩအဖၧၩ့ ရၫဘံၫ (ယၫဝံ) ဘံၩနီၪ လၧဖျိၩ့ဖျိၩ့အိၩ ကိၭဝ့ၫဒၪမွဲ အ့ၫယၫဝတံၫဆ့နီၪလီၫႉ

အ့ၫယၫဝတံၫဘံၩနီၪ လၧခးအ့ၩၡၩဖၧၩ့ယီၩ မွဲလမီၪ့ဎီၩ့ဘၪလၧ ဘံၩဖၭဒိၪအဂူၫဂၩဒဲ လၩ့ဆၫ့ဝ့ၫဒၪနီၪ အီၪၥုၪ့လၩ့အၥၭလၧ ခးပယၩ့ဖၧၩ့ လၩ့ယွၩလၧ ခးပယၩ့ဖၧၩ့ဒဲ ခးပယၩ့ပၫ့လဲၫ့ထံၫနဲၩ့ကဆၫ့ ထဲၩ့ဆ့ၭလၩ့ယွၩ လၧပၫ့လဲၫ့ဖၧၩ့ မွဲဝ့ၫ ခးပယၩ့ဘံၩတၡါနီၪလီၫႉ ဘံၩယီၩ ထီၪ့ဝ့ၫဒၪ မဲၪ- ၁၃၅၀ဒဲ ထဲၩ့ဆ့ၭလၩ့ယွၩဝ့ၫဒၪလၧ ခးပယၩ့ လံၩခံၫ ခိၪလီၩ့လးကျဲၩ့ႇ ခးပယၩ့ကျၩ ဆၧဆၧၩ့ၡၩထံၫၡၩအလး ဒဲ ခးပယၩ့လၬကကဲၩ့ခီၫ ထမုထၪ့လးလဖၪနီၪလီၫႉ

အ့ၫယၫဝတံၫဘံၩနီၪ စၭထၪ့လၧ မ့ၫခၭဒဲ မလံခၭဘံၩနံၫဘီၩ့ ဘၪဆုးဆ့ၭအလးနီၪလီၫႉ မၠ့ၭကၠံၩနၩဝံး လံၩခံၫကကဲၩ့ခီၫ ယဲၩ့ဝ့ၫဒၪ ၄၆မဲၪ မ့ၫခၭ ဒဲ မလံခၭဘံၩ ဘၪဆုးဆ့ၭအလးနီၪ ဂဲၫကဲၪထၪ့ ဧယၫဝတံၫဘံၩနီၪလီၫႉ မ့ၫခၭဘံၩနီၪ မွဲအ့ၫယၫဝတံၫဘံၩ အခၪ့ထံၭၥၫ့အကၠီၩ့ ဖံၭထံၫဝံပကိၪ့ၥ့ၪလဖၪ ထယၬထၭအၥိၭ ကိၭဒံၭဝ့ၫလၧ မုထၪ့အ့ၫယၫဝတံၫဘံၩဒံၭနီၪလီၫႉ

အ့ၫယၫဝတံၫဘံၩ ထံၫထၪကျိၩ့ကကဲၩ့နီၪ စၭထၪ့လၧ ဝံးပၠ့ၫ အဖၫ့လၬ ယဲၩ့ဝ့ၫဒၪ ၅၃မဲၪ ဝံးမၠၫ့အီၪ့အနဲၩ့နီၪလီၫႉ အ့ၫယၫဝတံၫထံၫထၪကျိၩ့နီၪ လဲးဝ့ၫဒၪ စတုယၩ့မဲၪ ၁၂၀၀၀နီၪလီၫႉ လၧထံၫထၪကျိၩ့နီၪ ထဲၩ့ဆ့ၭလၩ့ယွၩဝ့ၫလၧ ပၫ့လဲၫ့ဖၧၩ့ ဘံၩအီၪဝ့ၫ (၉) ဘီၩ့ လါနၫ့ဂ့ၩ ပၫ့လဲၫ့ကဘၩ့ဖၭဒိၪလဖၪ ဂဲၫထဲၩ့စိၭထၪ့န့မွဲ ပၥံၫ့ဘံၩဒဲ တခိၩ့ဘံၩနီၪလီၫႉ

အ့ၫယၫဝတံၫဘံၩနီၪ ဂၪ့ခိၪယီၩ ထံၫအၪ့လၩ့လဲၬ အဖျဲၪထုၬ ဘံၩကဘံၩနီၪလီၫႉ ထံၫအၪ့လၩ့လဲၬ အဂဲးဆီၪ့န့ နဲၩ့ဘံၩႇ ဂင်္ဂါဘံၩဒဲ  ဒင်းညုဘံၩၥံၪနီၪလီၫႉ