အလၩဒူၩဒဲအစုၪအဖျါ အဆၧတုၩ့ထၪ့ဆၧ (၁)

ၥံၪ့ထံၭလထံၭနီၪ နဖ့ၬထ့ၭခွံၬစွါဘဲၫ အဆၧၫ့အထီလဆိအဖၧၩ့ ကလၩဒူၩကလၩ့မၬခွံၬဝ့ၫ လါနၫ့ဂ့ၩ ကချံၪ့ရူၪဘၩ အလၩဒူၩကအီၪထၪ့ထဲၩ့အဂး ကဘၪခိၭဝ့ၫ အၪနံၪ့အၪလၩနီၪလီၫႉ

        ၦဂၪ့ခိၪချိၫ့ယီၩ မွဲအစုၪ့အဖျါဒဲ အလၩဒူၩ တုၩ့ထၪ့လိၬၥၭ ဂၪ့ခိၪချိၫ့လဖျိၪ့လီၫႉ ဂဲၫပၫထံးဎုၬဝ့ၫလၧ မုအခိနီၪ မွဲဝ့ၫအစုၪ့အဖျါနီၪတၭ အီၪပဒၩ့ထၬအစုၪ့အဖျါအလၩဒူၩနီၪ မွဲဝ့ၫၥံၪ့အထံၭလီၫႉ လၧလံၩအထုၪ့ဖၧၩ့ ဂုထၪ့အၪထၪ့ဝ့ၫ ဖၫ့လိၫ့အံၪ့စီၩ့အခူၪလဖၪနီၪ မွဲဝ့ၫအဆုၫအဖျါတၭ စွံထၪ့အစုၪ့အဖျါဂီၩ့ မၩဆံၫ့ဖျ့ၪထၪ့ဆၧ ၥံၪ့အထံၭနီၪ မွဲဝ့ၫအလၩဒူၩလီၫႉ

        မွဲအဆၧၫ့အထီနီၪ ၥံၪ့မံၩ့လၬကျၩမုၥံၪ့ဘီၩ့နီၪ အလၩဒူၩလၩ့မၬဝ့ၫ လလးဒဲလလးဂီၩ့ ဆူၪယိၬဝ့ၫထုၬအလၩဒူၩဖၭဒိၪ ၡါမုနၫ့ဖၫနီၪဆ့ ကနံၩဒဲကနံၩထၪ့ဘွၩဝ့ၫနီၪလီၫႉ အလၩဒူၩ လၩ့မၬခွံၬအဂဲးအဖးယီၩ ဘၪချဲၩ့ခွးထၪ့စွါဘဲၫ ဎ့ၭဒဲလွၭနီၪ အကၧၩ့ဒိၪထုၬပခွးဖိၪနီၪတၭ ဂၪ့ခိၪ လုၫလါဖၧၩ့ မ့ၪအၪ့ဆၧနီၪဆ့ ကကဲၪထၪ့ဝ့ၫပအၧၩ့ဖိၪနီၪလီၫႉ