လၧခးပယၩ့ဖၧၩ့ ကဲၪ့ထၪ့ ခိဆၧၩ့ချံၫ့အဆၧၫ့အထီ

လၧခးပယၩ့ဖၧၩ့ယီၩ ခိဆၧၩ့ချံၫ့လၨၪခၫ့ဖၬၥနိၫနီၪ လၩ့ၡၩအ့ၬႉ ဆုးအၪ့လဲၩ့ထၪ့ၥၭ ဘဲၫဒံၭနီၪလီၫႉ ၦခမျၧးၥံၪနးဆ့ ခိဆၧၩ့ချံၫ့အၪ့လဲၩထၪ့အၥၭနီၪ မွဲပဒၩ့ထၬဝ့ၫလန့ဒံၭဘၪတၭ အဆၧၫ့အထီနီၪ အၧၩ့ဘဲၫဒံၭလီၫႉ ဆၧစူၭကီၪ့ထၪ့ ကၫဘိၫ့ဒဲၪ့အီၭစဲၭ စီၩ့ဂဲးနးဆ့ ဖးဖီၩ့ဖၧၩ့မွဲဝ့ၫ အထီၫ့ထုၬလီၫႉ ပကယိထဲၩ့ဂၪ့ခိၪထၧၫ့ဘံၪ့ယၫစွါဘဲၫ ဆၧခိအၪ့လၨၪ အလးအီၪႇ ဆၧချံၫ့အၪလၨၪအလးႇ ထံၫဎိၩလၩ့အလး ဒဲ ဘၪထိးလံၩမုလဖုၬအလးအီၪဝ့ၫဒၪလီၫႉ လကၭဒံၭဘၪ မ့ၪခိၪလီၩ့ဖီးဖၭအီၪအၥိၭ ဖူၫဆံၫဂုဆ့မွဲအီၪလီၫႉ

ဘၪန့လဲၪ ခိဆၧၩ့ချံၫ့ယီၩ ဘၪကဲၪထၪ့ဘဲၫယီၩၥိၭနီၪ မွဲဝ့ၫဒၪ ၦၡၩၥံၪအကၠီၩ့လီၫႉ ပကယိထဲၩ့လၧ ခးအ့ၩၡၩအဖၧၩ့ယီၩစွါဘဲၫ ခးဖလပ့ၩနီၪ ဘၪထိးလံၩမုလဖုၬအဆၧလၩ့အၪ့ယိၫအၪမၬလီၫႉ ဂီၩ့နီၪ ခးအံၪ့ဒံၫယၩနးဆ့ မွဲဘၪထိး လံၩမုလဖုၬအဆၧလၩ့ယိၫနၭနၭဒ့ၭလီၫႉ မခးပယၩ့နီၪ ပဘၪလီၩအလးအီၪလၧၩ့အ့ၬႉ ခိဆၧၩ့ချံၫ့အဆၧအၪ့လဲၩ့ ထၪ့အၥၭနီၪ ဆုးကဲၪ့ထၪ့ဒၪဝ့ၫလီၫႉ

လံၩလၩ့ထီ ဂဲၫဆွံဂီၩ့ စဲၪ့လၪ့ထဲၩ့ဂီၩႉ ဆၧဆၧၩ့ခၫအထီ လံၩမုလဖုၬဂဲၫအ့ၬ ဆၧဂဲၫယီၩလၫ့မၬ လံၩမုလဖုၬကဲၪထၪ့ႉ ဆၧလဖၪယီၩ မွဲဘၪထံၭ ဆၧၥုၪ့ဆၧဖျါဆၧအနိၪ့ အနၭထုၬလီၫႉ ဆၧဂဲၫဆၧၩ့ လၩ့ဆွံအကၠီၩ့ ဘုၪ့လဖၪမၧၫ့အ့ၬ ဆၧဆၧၩ့ခၫအထီ လံၩမုလဖုၬကဲၪအ့ၬအကၠီၩ့ လၧအကျၩနီၪ ဆၧဆၧၩ့အ့ၬ ဆၧဂဲၫယီၩလၫ့မၬ လံၩမုလဖုၬဂဲၫဂီၩ့ ဆၧဆၧၩ့တၭ ဘုၪ့ၥံၪလဖၪ ဂၭဂီၩ့ဂၭစၪထၪ့ ထီးအလူၬနီၪ ဘၪထံၭဆၫမွဲ ၦမၩဆံၬဖိၪၥံၪနီၪလီၫႉ ပကအၪ့ဎၬယိထဲၩ့ထီးအလူၬနီၪ ခိဆၧၩ့ချံၫ့အၪ့လဲၩထၪ့အၥၭယီၩ အၧၩ့ဝ့ၫနၭမၬလီၫ ဘၪန့လဲၪစွါဘဲၫ မိခိအခံၫ့ခိအၪမၬဒဲ မိချံၫ့အခံၫ့ ချံၫ့ဝ့ၫဒၪအၪမၬအကၠီၩ့နီၪလီၫႉ