ယၪလဖၪအဂဲး

ၦဖျိၩ့လဖၪအၪ့ယၪအၪဒၪအဆၧလီၫႉယၪလဖၪအီၪဝ့ၫအၪဆၨၩတၭႇ ဘဲၫအဆၨၩဒၪဝ့ၫအၥိၭအခံးအဂၩ့လၩ့ဆၫ့ဒဲ အမိၡါဆ့ဎိၩဆံၭလၩ့မဲၩဝ့ၫလီၫႉ ယၪလဖၪအီၪဝ့ၫလၧထံၫကျၩတၭႇ လၧထံၫကျၩနီၪ ဆၧအီၪဝ့ၫအၪမံၩ့လီၫႉ ဆၧလၧအၥၭမၧၫ့အီၪလဖၪမွဲဂ့ၩႇ ဆၧအထံၭအဘီၩ့လဖၪမွဲဂ့ၩ လိးၥံၪမ့ၬၥံၪဒဲ ဆၧလူဒိၪဎွ့ၩဒိၪမွဲဂ့ၩအီၪဝ့ၫလၧထံၫဖၫ့လၬအၪမံၩ့လီၫႉ ယၪလဖၪအီၪလၧဆၧလဖၪနီၪ လၧထံၫဖၫ့လၬကၠၧၫ့ကၠၧၫ့နီၪလီၫႉ ယၪၥံၪအၪဒၪအဆၧအၪထၪ့ဂီထၪ့လၧအဒံၪနီၪလီၫႉ

ယၪလဖၪ ယါထံၫၥ့ၪအ ဘျ့ၭအ ဘျိၭဒဲ ဖျဲၪဝ့ၫဂ့ၩ ဘၪစဲၪလီၫႉ ယၪလနၩ့နၩ့အ ဘံၪ့အီၪဒဲ လနၩ့နၩ့အ ဘံၪ့အီၪအၪအ့ၬႉ ယၪလနၩ့နၩ့အၪ့ဆၧဖံၭဆၧယၪတၭႉ လနၩ့နၩ့ အၪ့ဒၪထံၫအကံၪ့ဒဲ ဆၧထံၭဆၧ ဘီၩ့လၧထံၫဖၫ့လၬလဖၪနီၪလီၫႉ ယၪလနၩ့နၩ့အီၪၥ့ၪလၧ ထံၫယိၬယိၬအဖၧၩ့ဒဲ လနၩ့နၩ့လၧထံၫဆွံအဖၧၩ့နီၪလီၫႉ ယၪလနၩ့နၩ့အီၪၥ့ၪန့ၫလၧထံၫဂၪ့အဖၧၩ့တၭ လနၩ့နၩ့အီၪဝ့ၫၥ့ၪန့ၫထံၫအအွံၪအဖၧၩ့နီၪလီၫႉ

လၧထံၫအကျၩနီၪ ဆၧအီၪဒံၭဝ့ၫအၪမံၩ့တၭႇ ဂူလၧအစုၪဆီၪ့ဒဲ အစုၪလဆီၪ့ ဘၪမွဲဂ့ၩႇ ဆၧလၧအစွၩၥ့ၪလဖၪႇ ဆၧလဖၪလၧအမွဲချံၭႇ အၩ့လါႇ မိရၫႇ ၥဒၪႇ ချိၪႇ ဒဲဆွ့ၪလဖၪအီၪဝ့ၫလီၫႉ ယၪလဖၪ ဘၪအီၪမၧၫ့ဎိၭလၩ့ဝ့ၫလၧအဒုၪအဒၩလဖၪအၪမံၩ့အကၠီၩ့ ဘၪဎိၭဒီၪဎဲၫလၩ့အၥၭၥ့ၪၥ့ၪ ဘၪ ဘၪနီၪလီၫႉ ယၪလဖၪအီၪဒဲ အလွ့အၪမံၩ့လၧကကြၨၭ ဘၪလၧအလးအီၪၥူၪဝ့ၫနီၪလီၫႉ ယၪၥံၪအီၪဒဲ အမ့ၬချံၫလၩ့ဆၫ့လၧကဒၪဆၧလၧထံၫအကျၩကၥ့ၪဝ့ၫအဂးနီၪလီၫႉ

ယၪလဖၪၥ့ၪယၫဆၧမၩအၥၭလမံၩ့မံၩ့လၧကစဲၪ့ဖီၪ့ဖျ့ၭအၥၭမၧၫ့အဂးဆ့လီၫႉ ယၪၥံၪအီၪလၧအပိၭၥိၭလၩ့ဆၫ့လၧ ကအီၪမၧၫ့လၧထံၫကျၩဝ့ၫအဂးနီၪလီၫႉ ယၪလနၩ့နၩ့ ၦၡၩအၪ့လုမၩနဲၩဝ့ၫၥ့ၪတၭႇ အ့ၪမွဲလနၩ့နၩ့ မၩဒုၪ့ထဲၩ့ၦၡၩဒဲဖ့ၪလၫ့ဆၧကၪဆၧဂဲၩလၧၦၡၩၥ့ၪဝ့ၫလီၫႉ

ၦဖျိၩ့ဖိၪၥံၪအၪ့ယၪတၭႇ မၩကဲၪထၪ့ယၪလၧဆၧအၪ့ဆၧအီၩၥ့ၪဝ့အၪမံၩ့လီၫႉ ဘျၩ့ ဘျၩ့ ၦဖျိၩ့ၥံၪမၩကဲၪထၪ့ဆၧအၪ့လၧယၫလၧကအီၪက့ၪထိးယံၬဝ့ၫအဂးနီၪလီၫႉ ၦဖျိၩ့ဖိၪၥံၪ ဘဲၫအဆၧဂဲၫထဲၩ့ဒၪခီၩ့ ခၫ့ဖျီၫ့ဝ့ၫအၥိၭ ၥ့ၪယၫလဖၪအၪမံၩ့လီၫႉ ယၪအဒုၪအဒၩလၧအဖ့ၪလၫ့ၦၡၩဆၧကၪဆၧဂဲၩနီၪ ၦဖျိၩ့ၥံၪၥ့ၪယၫထၬဝဲၩအၪမံၩ့လီၫႉ ၦဖျိၩ့ဖိၪၥံၪအီၪဒဲ အစူၪဝဲၩစူၪဖီၪ့ လၧကမၩန့ယၪလဖၪအဂးအီၪဝ့ၫလီၫႉ ယၪထၪ့လပၩအထီနီၪ ကြၨၭၦၡၩၥံၪမၩၥံၫအ့ၬႉ

Add new comment

10 + 0 =