မ့ၪ

လၫ့ဝဲဒံၭအခၫ မ့ၪစဲၪ့လၪ့ဝ့ၫဒၪလီၫႉ အနီၭဘိၭ ဖံၫဖူၫၥံၪလၧအၥၫ့ခၪ့ထံၭအိၩ ဒၪမ့ၪအခၫ ၡုးဖျးဝ့ၫဒၪလီၫႉ ဆၧဖိၪဆၧဎါလဖၪနးဆ့ ၥၭမဲၪဆၧ စဲၪ့ဖျးကၠၭဝ့ၫလီၫႉ

လါနၫ့ ကနံၩနီၪတၭ ၦၡၩလဖၪ မွဲလစဲၪ့လၧၩ့ဘၪဒဲ ဆၧချံၪ့မုနံၩလဖၪ ဂဲၫၥ့ၪယၪလၪ့ဝ့ၫ ဆၧခိအဂဲးနီၪလီၫႉ အခံၫ့အထီနီၪ မ့ၪကိၪ့ဂဲၫကဲၪ့လၪ့ပၥံၪလဲၪ မွဲလၥ့ၪယၪဘၪဝ့ၫလီၫႉ

အနီၭတၭ ပဒူၩဖိၪလဂၩ မ့ၪအၪ့ထၬၥံၪ့မုကုၭ ကကုၭနီၪ ဂဲၫထဲၩ့န့ဝ့ၫဂီၩ့ ဘဲၫမ့ၪလလၩ့ဖံၭဘၪအဂး လၧမ့ၪဖၧၩ့နီၪ ဆုးခွံၬလၩ့ၥံၪ့ကုၭလဖၪနီၪလီၫႉ မ့ၪနီၪ လၧအဝ့ၫၥံၪအဂး လၧၩ့ဝ့ၫဒၪဒဲ ဆၧဖၩ့ဆ့ န့ဝ့ၫဒၪလီၫႉ 

ဆၧလၩ့အၪ့ယိၪအီၪဝ့ၫဒၪ ဆၧဖိၪဆၧဎါလဖၪနးဆ့ စဲၪ့ဖျိၬဝ့ၫဒၪလီၫႉ စၭထၪ့လၧ အထီနီၪ ၦၡၩၥံၪလဖၪ အီၪအလး အဂံၪ့အီၪဝ့ၫဒၪလီၫႉ လၧမုဆၫခီၫအခၫ လ့ၩလီၩ့ဂဎွါအၪ့ဆၧအၪ့ဆၧအီၩ့ လ့ၩထဲၩ့ကၠၭလါနၫ့ဂ့ၩ လၧမုနၩခီၫအခၫ ဂဲၫထဲၩ့ကၠၭထီးထီၩ့ဂံၪ့နီၪလီၫႉ ဖိၪၥၪဒဲ ၥၭၡါလဖၪအီၪထးလၧဂံၪ့ မၩယိထွ့ၫထးမ့ၪ ထီးလလၩ့ဖံၭဘၪအဂးနီၪလီၫႉ

ၦၡၩၥံၪလဖၪယီၩ ထီးမ့ၪကခဲးထၪ့ ကဘၪမၩဝ့ၫပၥ့ၪလဲၪ မွဲလၥ့ၪယၪဘၪဝ့ၫဒဲ ခိၭဝ့ၫထီး လၫ့ဝဲဒံၩ့ဂီၩ့ မ့ၪကဲၪထၪ့အထီနီၪလီၫႉ ဆၧနီၪအကၠီၩ့ ထီးမ့ၪလၥ့ၪဘၪအဂး ကဘၪယိထွ့ၫထၬဝ့ၫနီၪ အရ့ၩဒိၪထုၬဆၧမၩကမံၩ့လီၫႉ မ့ၪအနီၭ အဝ့ၫၥံၪ ယိထွ့ၫန့ အဆိၪထုၬ စီၩ့ဂဲးအခၪ့ထံၭခၪ့ဎၧၩ့ ဂဲၫန့ထၪ့ဝ့ၫလီၫႉ

လခဲၫ့ လိးလဖၪဘၪထဲးလိၬၥၭအခၫ ဒၪဝ့ၫ မ့ၪခဲးထၪ့တဘၭ မၩခဲးထၪ့ထဲၩ့မ့ၪ ဘဲၫယီၩၥိၭလီၫႉ ကနံၩနီၪတၭ ၦလၧဖီၪ့ထၬဆၧအယၪလဂၩ ခွံၬလၩ့စိၩဝ့ၫလၧမ့ၪဖၧၩ့အခၫ နၧၩ့ဘၪဝ့ၫအစီၩ့မုၬတၭ ၥ့ၪယၫလၪ့ဝ့ၫ မ့ၪနီၪ မၩမံၫ့ဆၧအယၪန့နီၪလီၫႉ ဆၧယၪလၧ အမံၫ့လဖၪနီၪ အရါၥၪအွံၪလကၭဒံၭဘၪ ဘၪအဲၪ့ဝ့ၫမွဲယီၫဆ့နီၪလီၫႉ

လၧအနီၭကဆၫ့ ၦခမျၧးလဖၪ ဂဲၫၥိၩ့ထၪ့မ့ၪနီၪလီၫႉ ဖံၫဖူၫလၧအၥၫ့ခၪ့ထံၭအိၩ အဝ့ၫၥံၪအဂး မၩဝ့ၫန့အၪမၬ စီၩ့ဂဲးအခၪ့ထံၭခၪ့ဎၧၩ့ ဂဲၫအီၪလၪ့ဝ့ၫဒၪလီၫႉ ဆၧနီၪအကၠီၩ့ အဝ့ၫၥံၪအဆၧၥၭမၧၫ့ ဂဲၫယီၫထၪ့ဝ့ၫဒၪနီၪလီၫႉ