ဘၪနီၫလဲၪ ဘၪၥုၪ့လၩ့ၥံၪ့ထံၭ (၂)

ဆၧလၧၥံၪ့ထံၭၥံၪလဖၪနီၪ ထံၫအထုၪ့ဘၪၥလိၪၥလံၬထၪ့နီၪ ပဒၩ့ထၬဝ့ၫကန့အဂး မၩဆၧၩ့ဝ့ၫန့နီၪလီၫႉ လၧၥံၪ့အထံၭလီၩထံၫလဖၪနီၪ ထီၩ့လၧ ၥံၪ့ထံၭအခၪ့ထံၭ ဖံၭဖၧၩ့အိၩနီၪလီၫႉ အနီၭ ပဒၩ့ထၬ ဆၧၥလိၪၥလံၭလဖၪ ဘဲၫလကဲၪဘၪ ကထဲၩ့လၩ့ယွၩလၧပၫ့လဲၪဖၧၩ့ဆီၫ့ဆီၫ့အဂးနီၪလီၫႉ ဂီၩ့နီၪ ၥုၪ့ဖျါလၩ့ထၬ ဆၧအထံၭလဖၪ ဆၧခွံၬလၩ့ယံၩယါထၬ မွဲဝ့ၫ ၥံၪ့လၪအအူၪလဖၪ လီးခၪ့အအူၪလဖၪနီၪဆ့ မၩဂ့ၩထၪ့ ဆၧအထံၭလဖၪအဝံအစၧၩ့နီၪလီၫႉ လကၭဒံၭဘၪ လၧဖံၭဖၫ့လၬ ထံၫကန့ထၪ့အဂး မၩဆၧၩ့ထၪ့ထဲၩ့ဝ့ၫန့ဒံၭနီၪလီၫႉ ထီးနီၪ မၩဆၧၩ့ပဒၩ့ထၬပၧၩန့ဒံၭလၧ ဖံၭကခုလၩ့အဂးဒံၭနီၪလီၫႉ စံၭမၬချၭ ခိၭခိၪလီၩ့ဂုၬဖၩအလးၥံၪႇ ထံၫဖိၪချိၬထံၫလၩ့ဝ့ၫဒၪ ဆၧဒၩ့ခိၪအလးလဖၪၥံၪနီၪ ဆၧအထံၭလဖၪ ထီးဖံၭလခုလၩ့ဘၪအဂး ခွၬထၬဝ့ၫဒၪလၧ အဝ့ၫၥံၪအဝံနီၪလီၫႉ အနီၭတၭ ဖံၬခုၪ့လၩ့န့လၧၩ့အ့ၬနီၪလီၫႉ

ဆၧလၧၥံၪ့ထံၭနီၪ ပဒၩ့ထၬအ့ၪ ဖိၪၥၪၥံၪထီးလဘၪဘၪ ယၩ့လွ့ဖျီးမွဲန့ဆ့နီၪလီၫႉ  ဖ့ၪလၫ့ ဆၧအၪ့ဆၧအီၩန့ ဆၧလၧၥံၪ့ထံၭၥံၪလဖၪ ၦၡၩၥံၪအဂး လကၭဘၪ ထိၪၥံၪလံၩၥံၪဒဲ ဆၧဖိၪဆၧဎါလဖၪၥံၪအဂး မွဲဖ့ၪလၫ့ဝ့ၫဆၧအၪ့ဆၧအီၩန့ဆ့နီၪလီၫႉ ၥံၪ့ထံၭအခိးအတၩလဖၪနီၪ အနီၪလီၫဧၪ ကၭဒံၭအ့ၬ ဘျၩ့ထၪ့ဆၧစူၭဆၧဆၫ မွဲန့ဆ့လီၫႉ လၧဆၧအၪ့ဎၬထၪ့အဖၧၩ့ ဆၧဆၫဆါလၧ အဒၪဘၪၥံၪ့ထံၭလဖၪ ယံၫစီၪ့လၧ ပဲၩ့တရၫ့ဖၧၩ့ကိၭနံၩဒ့ၭလဖၪနီၪ ဆၧဆၫဘျၪထဲၩ့ဖျဲၪအကၠီၩ့ ဒၪထၪ့ဝ့ၫဒၪလီၫႉ လခဲၫထုၬကထုၪနီၪဘိၭ မၩလၩ့ၡၩ ယၩ့လွ့ဖျီး (-) န့နီၪလီၫႉ

ထၧၫ့ဖုဝဲမုၪခွၫၥံၪဧ့ ပနဲၩ့ဎီၩ့ ကဎံၫလၩယံၫစီၪ့ထၪ့အဂး ကြၨၭပၥုၪ့လၩ့ၥံၪ့ထံၭလဖၪနီၪလီၫႉ ဆၧၫ့ထီလ့ၩထၪ့ထီၫဝ့ၫဒၪအထီဘဲၫယီၩ နဲၩ့ဎီၩ့ဘၪထံၭဆၫ ဘၪၥလိၪၥလ့ၬထၪ့ ဒံၩ့ဂဲၫအၪထၪ့ဒီၭလီၫႉ မွဲဆၧဘဲၫ ကြၨၭပၥုၪ့လၩ့ထဲၩ့ၥံၪ့ထံၭလဖၪ နဲၩ့ဎီၩ့ဆၧလၩ့အၪ့ယိၫဂဲၫကဲၪထၪ့အမံၩ့မံၩ့နီၪနးဆ့ မွဲဒၪလၧ ၥံၪထံၭၥံၪၡၩဝ့ၫဒၪအကၠီၩ့လီၫႉ လၧပနဲၩပဎီၩ့ ပၥုၪ့လၩ့ထၬ ၥံၪ့ထံၭလဖၪအကၠီၩ့ မွဲဒၪပဂးလကၭဘၪ လၧပနဲၩ့ပဎီၩ့အဂး အခိးတၩကန့ထၪ့ လခဲၫ နံၪ့ဆံၫလၩယံၬနီၪလီၫႉ