ဘဲၫဖံၭအၥိၪအဆီ လဂၭဂီၩ့ဘၪအဂး ယိထွ့ၫယိခွါထၪ့နဲၩ့ဎီၩ့ဆံၭ

ဂၪ့ခိၪချိၪ့ယီၩ ၥုၭအၥၭလီၫႉ ပအီၪအလးဂၪ့ခိၪချိၪ့ယီၩ ၥုၭထၪ့အၥၭဎ့ၬဎ့ၬဖိၪလီၫႉ ခ့ၬဝ့ၫဒၪဘဲၫၥိၭ ဘဲၪ့ဖၭလဲ ကဘံၪ့လီၫႉ ခ့ၬဝ့ၫအထီ ဘၪစုၭလိၬၥၭအခၫ ကဲၪ့ထၪ့ ဖူၫဆံၫဂု မ့ၪခိၪလီၩ့ဖီဖၭ ခိၪလီၩ့ၥံၪဆံၪ့ထူၭလၪ့ လဖၪနီၪလီၫႉ ဖံၬအပိၪ့အပၩ့ ဂဲၫကဲၪထၪ့ဝ့ၫၥ့ၪအမံၩ့မံၩ့လီၫႉ

အဘျံၭအနီၭနီၪ ပကိၭဝ့ၫလၧ မၪ့တၧၫ့ လ့ၩဝ့ၫဒၪလၧ အဖၫ့ခိၪကထုၪ့လီၫႉ လၧ မၪ့တၧၫ့ဖၧၩ့ ပၫဝ့ၫဒၪ လိးလဖၪနီၪ မၩဆၧမၩဘဲၫၥိၭ ပလၭစတ့ၭ နီၪလီၫႉ ဆၧခိဆီၪ့အခံၫ့ဒဲ ဂဲးဆၪ့လၩ့ဆီၪ့အခံၫ့ ကဘျၪဒဲကဘျၪစုးဘၪလိၬၥၭအခံၫ့နီၪ စွါဘဲၫ ထိၩ့ချိၬလိးလဖၪ ဂဲၫထၪ့ထဲၩ့ၥ့ၪလၧ အဖၫ့ခိၪလီၫႉ

လၧထိၩ့ချိၬဖၧၩ့နီၪ မ့ၪခိၪလီၩ့အထံၫခိလဖၪ ဂဲၫစဲၪ့လၪ့ဝ့ၫဒၪလီၫႉ ဆၧအထံၫခိလဖၪယီၩ လချံၪ့လၩ့ဒံၭဘၪအထီ နုၬလၩ့လၧ နဲၩ့ဎီၩ့လိးလဖၪအဆုၬနီၪလီၫႉ နုၬလၩ့ဝ့ၫဘဲၫယီၩၥိၭဂီၩ့ ချံၪ့ခိလီၪ့ထၪ့အၥၭနီၪလီၫႉ လိးလဖၪၥံၪနီၪ ကဲၪထၪ့အဘျၪတၭ ထၪ့ထဲၩ့လၧအဖၫ့ခိၪ ကိၪထၪ့ခိၪလီၩ့လဖၪ ၥ့ၪနီၪလီၫႉ

ဖံၬအၥိၪအဆီဂဲၩ့ဝၬအကၠီၩ့ဒဲ ထံၫ လံၩအၪ့လၩ့လဲၬအကၠီၩ့ လၧဂၪ့ခိၪနီၪ အပိၪ့အပၩ့ကဲၪထၪ့ၥ့ၪဝ့ၫ အမံၩ့မံၩ့လီၫႉ  ထံၫအၪ့လၩ့လဲၬအကၠီၩ့ လိးလဖၪ လၩ့ထ့ၬလၬဂၭဂီၩ့ဝ့ၫနီၪလီၫႉ ထံၫလိးလဖၪ လၩ့ထ့ၬလၧ လိးအဘျၪဖၫ့ခိၪ  လံၩဂဲၫအကၠီၩ့ ဖံၬအမ့ၬပၪ လဎၩ့လၧၩ့ဘၪဒဲ ကဲၪထၪ့ဝ့ၫအမံၩ့မံၩ့နီၪလီၫႉ