ဖၫ့လိၪ့ဂံၪ့ စီၩ့အခူၫအရ့ၩဒိၪအီၪဝ့ၫအဂဲး (၂)

ကၫပိၫဒဲၫ့အီၭစဲၭစီၩ့အခူၫမီၫ့လံၫကၠူၩလဖျိၪ့လီၫအဖၧၩ့ ဘဲၫအဂူၫအဂၩ ဖၫ့လိၪ့ဂံၪ့စီၩ့အခူၫ မီၫ့လံၫကၠူၩအၥိၭမၩလၧၩ့ထၪ့ဂၪ့ကိၪလံၩအထုၪ့နီၪ အစီၩ့ဂဲးလအီၪဘၪနီၪလီၫႉ စီၩ့အခူၫထုၬထၪ့ဆၧထုၬစဲၪ့ထၪ့ဝ့ၫန့အစီၩ့ဂဲးနီၪအီၪဒၪလၧ စီၩ့အခူၫအီၪဝ့ၫအၪမၬအဖၧၩ့ဒဲ အဆၧၫ့အထီယံၬထၪ့ဝ့ၫအၪမၬအဖၧၩ့မၬ န့နီၪလီၫႉ လၧလံၩအထုၪ့နီၪအဖၧၩ့ အီၪၥၭမၧၫ့ဝ့ၫန့စီၩ့ဂဲးနီၪ နံၪ့ ၅၀ ဒဲ ထၧၩတီၩ့ ၂၀၀ ၧထးပၧၩ့အီၪလီၫႉ

ကၫပိၫဒဲၫ့အီၭစဲၭအီၪကကၠၪ မံၥံၩ့နီၪ ဂၪ့ခိၪချိၫ့ကခိထၪ့အဂး ဂဲၩဝၬထၪ့ဝၫန့ထုၬလခဲၫ့ကမံၩ့နီၪလီၫႉ မံၫၥံၩ့စီၩ့အခူၫနီၪ လၧဂၪ့ခိၪလံၩအထုၪ့ဖၧၩ့ အီၪဝ့ၫန့ ၁၂ နံၪ့ၥ့ၪလါနၫ့ဂ့ၩ ဂၪ့ခိၪချိၫ့ကခိထၪ့ဆၧအဂး မၩထၪ့ဝ့ၫန့အစီၩ့ဂဲးနီၪဒိၪဝ့ၫအၪနဲၫ့န့ ကၫပိၫဒဲၫ့အီၭစဲၭယၩဒူၩ ၂၀ နီၪလီၫႉ မံၫၥံၩ့စီၩ့အခူၫနီၪအခၪ့ထံၭအခၪ့ဎၧၩ့လဖၪအဖၧၩ့ ထုၬထၪ့ဝ့ၫဒၪဘဲၫဂၪ့ခိၪလုၫလါအီၪဝ့ၫအၥိၭလါနၫ့ႇ ၦခမျၧးၥံၪဂဲၩဝၬထၪ့ဆၧလဖၪအဖၧၩ့နးဆ့ႇ စဲၪ့ထၪ့ဝ့ၫဒံၭနီၪလီၫႉ ဆၧလဖၪနီၪ မွဲဝ့ၫဂၪ့ခိၪအလုၫအလါစီၩ့အခူၫအဆၧၥိၩ့ဆၪ့ဆၧလဖၪနီၪ အကၠီၩ့မွဲဂ့ၩႇ ဆၧခွံၬၡိၬထၪ့ဆၧဆၧဘ့ၪၥိၭဘ့ၪမၠါအပိၫ့လဖၪနီၪမွဲဂ့ၩႇ ဆံၬလးဎုၬလးအဆၧၥုၪ့ဆၧဖျါဆၧဒဲ ဆၧဖိၪဆၧဎၭအဆၧအၪ့လူဆၧဎူၭလဖၪနီၪ အကၠီၩ့နီၪလီၫႉ

မံၫၥံၩ့စီၩ့အခူၫဎိၩဒိၪဝ့ၫအယၩဒူၩနီၪ လၧမၫဆမံၭဖၧၩ့ လိးလဲၫ့အအိၩအယူၭဖၧၩ့ အီၪယ့ၩထၬဝ့ၫၥ့ၪနီၪလီၫႉ ဘဲၫ ဝင်ရိုးစွန်း အလးအၥိၭ အချံၪ့စီၩ့ဒိၪဝ့ၫအၪမၬ “ပါးမားဖရေ့စ်” အလးအကျဲၩ့လဖၪနီၪ မံၫၥံၩ့အစီၩ့အခူၫအီၪက့ၪထၬၥၭအနၭထုၬနီၪလီၫႉ ဆၧလဖၪနီၪ ကဲၪဝ့ၫဘဲၫအီၪက့ၪထၬကၫပိၫဒဲၫ့အီၭစဲၭ ကမၫဖၭဒိၪအၥိၭလီၫႉ မၫဆမံၭလဖၪ ခိထၪ့ဝ့ၫဒဲ  “ပါးမားဖရေ့စ်” ဝင်ရိုးစွန်း ထံၫချံၪ့ခိလီၫ့အလးနီၪထံၫအခိလီၫ့အထံၫဖံထၪ့ဝ့ၫစွါဘိၩ ဆၧအီၪက့ၪထၬ မံၫၥံၩ့စီၩ့အခူၫအထုၪ့ဖၭဒိၪနီၪ ကစဲၪ့ထၪ့ဝ့ၫအနၭထုၬနီၪအကၠီၩ့ ဆၧအၪ့ယိၫခဲၫ့ခံၭဆၧအီၪထၪ့ဝ့ၫနီၪလီၫႉ

“ဖၫ့လိၪ့ဂံၪ့ စီၩ့အခူၫအခိစီၩ့နီၪ မၩဆီၪ့မၩဆါထၪ့ဖီၪ့ဂုးထၪ့ဆၧအနိၫ့အလးလအီၪဘၪစွါဘိၩ မွဲၦဂၪ့ခိၪချိၫ့ယီၩ ဆၧဖိၪဆၧလံၩလဖၪ ကအီၪၥၭမၧၫ့အဂး လယီၫလၧၫ့ဘၪနီၪလီၫႉ”