ပဂၪ့ခိၪချိၫ့ကဎံၪလၩထၪ့အဂး ဖီၪ့ဂုးထၬနဲၩ့ဎီၩ့ဆံၭ (၃)

ဂၪ့ခိၪၡၩအဆၧဝံဆၧနၬနီၪ ကနံၩဒဲကနံၩ ဂဲၫအၪထၪ့နီၪလီၫႉ ကၠၧၫ့ကၠၧၫ့လၧ ၡၩအဆၧဝံ ဆၧနၬ လိၫဝ့ၫဒၪ ဆၧအၪ့ဆၧအီၩ့အခၪ့ထံၭခၪ့ဎၧၩ့ ၦခမျၧးလဖၪ ကၥိၩ့ထၪ့အဂး ဆၧပိၭဆၧလၫ့ အမံၩ့မံၩ့ မ့ၪဆၫႇ နဲၩ့ဎီၩ့စီၩ့ဂဲးႇ လိးၥွၫထီးၥံၪလဖၪယီၩ ထူၭထၪ့ဝ့ၫဒၪအလၧၫ့အဎွ့ၩလီၫႉ ထံၫခး ခီၫ့ၡၩအနိၪ့နးဆ့ ကျ့ၭစၨၭထၪ့ကၠၭဝ့ၫဒၪ ထီးထီၩ့ဂၪ့ခိၪခီၫ့ၡၩအဆၧနၧၩ့ကန့အဂးနီၪလီၫႉ ကကဲၩ့ခီၫ ကၫဘိၫဒဲၫ့အီၭဆဲၭစီၩ့ဂဲးဆၧထူၭထၪ့အကဲၩ့နီၪ ဂဲၫထီၪ့ ထၪ့ဂ့ၩဘၪစဲၪ့လီၫႉ အၧၩ့ဝ့ၫဒၪ ဆၧခိဆီၪ့ လၨၪဆၧကၪဆၧဂဲၩ ဆၧချံၫ့ဆီၪ့လၨၪဆၧကၪဆၧဂဲၩလဖၪနီၪ ပဂၭဎ့ၭထၪ့ ကန့နီၪလီၫႉ

          ၦခမျၧးၥိၩ့ဆၧပိၭဆၧလၫ့အမံၩ့မံၩ့အအီၪ ဆၧခွံၬၡိၬထၪ့ဆၧပိၭဆၧလၫ့လဖၪဒဲ စဲၪ့ထၪ့လၧ စဲၭဒူၭ ဆၧခွံၬၡိၬဆၧၥလိၪၥလံၬလဖၪ လၧၥနိၫ့လအီၪဘၪအဖၧၩ့ လီၩ့ခွံၬၡိၬဝ့ၫဎံၩ့ဎီၩ့နီၪ ပကဘၪထုၪ့ပၥၭနီၪလီၫႉ ဂၪ့ခိၪထၧၫ့ဖျိၫ့ယၫ ၥံၪ့မုအလး ၥိၩ့ထၪ့ မ့ၪဆၫနီၪ ဖ့ၪဂဲးဖ့ၪဘၭဝ့ၫလါနၫ့ဂ့ၩ မ့ၪဆၫအဂး ၥံၪ့မုလဖၪ ဖ့ၬခုဝ့ၫအၪလၨၪ ဆၧပိၭဆၧလၫ့ဒဲ ဆၧၥုၪ့ထၪ့ဂံၪ့ဆၧပိၭဆၧလၫ့လဖၪအဂး ဖ့ၬခုၥံၪ့ထံၭလဖၪအၪလၨၪအၪလဲၩ့နီၪ ကြၨၭမၩအ့ၬနီၪလီၫႉ ၥံၪ့ကထံၭအၥၭမၧၫ့အဆၧၫ့အထီ အၥိၭ ပကဘၪၥုၪ့လၩ့ထဲၩ့အလးနီၪ ပကဘၪဖ့ၪဂဲးဖ့ၪဘၭ မၩထၪ့ကၠၭနီၪလီၫႉ ခွံၬၡိၬထၪ့ဆၧဘံၫၥိၭလဖၪ ဎံၩ့ဎီၩ့ႇ ဎုထၪ့ဆၧဘံၪၥိၭဘံၪမၠၭႇ ဆၧဎုထၪ့ၡိၬ ဆၧလဖၪၥံၪယီၩ ပကဘၪထုၪ့ပၥၭ ကိၭဂၩဒ့ၭနီၪလီၫႉ ဘဲၫနီၪအၥိၭ ပကဘၪၥိၩ့လၩ့ၡၩထၪ့ လျၭစ့ၭမ့ၪႇ ပကဘၪၥိၩ့လၩ့ၡၩထၪ့ အလူ့အဎွ့ၩအီၪဝ့ၫဒၪ ထံၫႇ ပကဘၪခွံၬၡိၬဆၧဘံၪၥိၭအလးကပၫဒဲကပၫႇ ပကဘၪၥိၩ့လၩ့ၡၩထၪ့ ပလၭစတ့ၭႇ ပကဘၪဎဲၪ့ ဆၧဎုထၪ့ၡိၬကျၩဒဲ ဘဲၫၥိၭ ဆၧၥုၪ့လၩ့ထဲၩ့ၥံၪ့ထံၭအလုၫအလါအဂ့ၩလဖၪနီၪ ပကဘၪအၪ့လုလၪ့ထဲၩ့နီၪလီၫႉ