ပဂၪ့ခိၪချိၫ့ကဎံၪလၩထၪ့အဂး ဖီၪ့ဂုးထၬနဲၩ့ဎီၩ့ဆံၭ (၂)

ဖံၭအမ့ၬပၫဒဲ လံၩအထုၪ့အဖၧၩ့ ဆၧခိဂဲၫဆီၪ့ထၪ့နီၪ နဲၪထၪ့ဝ့ၫလၧ ဂၪ့ခိၪဖၭဒိၪယီၩ ဂဲၫခိထၪ့နီၪလီၫႉ ဖံၭအမ့ၬပၫလီၩ စွံၭထၬ ဆၧအခိလပီၩလဖၪဒဲ လၧလံၩအထုၪ့ဖၧၩ့ စီၩ့ဂဲးအၪမၬနီၪ ဂၪ့ခိၪဂဲၫခိနၭထၪ့နီၪလီၫႉ စဲၭဒူၭ ဆၧမၩဒူၭဒဲ လဲၫ့ၥိၪလဖၪ ဂဲၫအၪထၪ့နီၪ လံၩအထုၪ့ဖၧၩ့ ကဲၪထၪ့ မၫ့လိၫ့အံၪ့စီၩ့ဂဲးနီၪလီၫႉ ပဒၪဘၪ လံၩအထုၪ့ အခံအလဲၫ့လၩ့ဖုၪ့ႇ စွံၭထၪ့ဆၧအခိ မၩစဲၪ့ထၪ့ထဲၩ့ဝ့ၫ အဂဲးဆီၪ့ထၪ့နီၪလီၫႉ ခိဆၧၩ့ချံၪ့ အၪ့လဲၩ့ထၪ့အၥၭလဖၪနီၪ မွဲနဲၪဖျီၪ့ ဂဲၫခိဂဲၫခိထၪ့အကၠီၩ့နီၪလီၫႉ ဆၧအဂဲးလဖၪၥံၪယီၩကဆၫ့ ကဆုးကဲၪထၪ့ ဆၧအအၧၩ့လဖၪနီၪ ပၫ့လဲၫ့ထံၫ အမ့ၬပၫ ကဂဲၫထီၪ့ထၪ့ႇ ကဲၪထၪ့လံၩမုလဖုၬႇ ထံၫဎိၩလၩ့ႇ ဆၧဆၧၩ့လိၫဒဲ ဖူၫဆံၫဂုၥံၪနီၪလီၫႉ ခိဆၧၩ့ချံၪ့အၪ့လဲၩ့ထၪ့ အၥၭနီၪ ၦၡၩဒဲ ဆၧဖိၪဆၧဎါလဖၪထီးအလူၬအဂး ကဲၪထၪ့ဆၧအၪ့ထၩအဎိၩထုၬဂီၩ့ မီၪ့ဎီၩ့ပကိၭဖံၭၥိၭ နဲၩ့ဎီၩ့ ဆၧလၩ့အၪ့ယိၫအမံၩ့မံၩ့နီၪလီၫႉ

          ဘဲၫနီၪအၥိၭ ဆၧထူၭထၪ့ ဒဲၥိၩ့စီၩ့ဂဲးအၪအၪဂီဂီနီၪနးဆ့ ဆၧအခိယီၩအကၠီၩ့ အၪ့ခွံၬဂၪ့ခိၪၥ့ၪနီၪလီၫႉ လ့ၩထၪ့လ့ၩထီၫဝ့ၫဒၪထံၫခးလဖၪ ထူၭထၪ့ၥိၩ့ ဖံၭဖၫ့ခိၪႇ ထံၫဖၫ့ခၪ လျၭစ့ၭစီၩ့ဂဲးအမံၩ့မံၩ့ နီၪလီၫႉ လျၭစ့ၭစီၩ့ဂဲးန့ဝ့ၫ ဖၧၩ့ၥၭလဖၪနီၪ မၩဝ့ၫကိၭမံၩ့ဂီၩ့ လိးၥွၫထီးႇကျဲၩ့တံၭဒဲ စီၩ့ဂဲးလဖၪ ၥိၩ့ထၪ့ဝ့ၫ ထူၭထၪ့ကၠၭစီၩ့ဂဲးနီၪလီၫႉ စဲၭအနိၫ့အဒိၪထၪ့ထီၫ့ထၪ့အဂး လျၭစ့ၭနီၪ မွဲအရ့ၩဒိၪဝ့ၫ စီၩ့ဂဲးကမံၩ့နီၪလီၫႉ လါနၫ့ဂ့ၩ စဲၭအနိၫ့ ဒိၪထၪ့ထီၫ့ထၪ့အလးခဲၫ့နီၪ ဘၪထံၭဆၫ လံၩအထုၪ့ႇ ဒဲ ဘၪအၪ့န့အဂဲးလၧ ထံၫအထုၪ့အကျၩနဲၩ့ဎီၩ့နီၪလီၫႉ ဆၧခွံၬၡိၬစီၩ့ဒိၪဆၧပိၭဆၧလၫ့လဖၪ  ထဲၩ့ဖံလၫ့လၧ ထံၫအထုၪ့ဖၧၩ့တၭ ထံၫနီၪကဲၪထၪ့ အစုၪ့အီၪတၭ ဆၧဖိၪ ဆၧဎါလၧ အီၪလၧထံၫကျၩလဖၪ ကၥံၫဝ့ၫအၪမၬအၥိၭ ထံၫပအီၩ့အဂးနးဆ့ ကၥလိၪၥလံၬထၪ့နီၪလီၫႉ ထီးက ကဲၪထၪ့ ဂၪ့ခိၪယ့ၪယ့ၪအဒုၩ့အဂး ဆၧထုၭထၪ့အယ့ၪစီၩ့ဂဲးဖၧၩ့ၥၭလဖၪ ကဘၪၥိၩ့ထၪ့ဝ့ၫ ပျၩ့ပျၩ့ လဲးလဲးနီၪလီၫႉ လၧမုမ့ၬစီၩ့ဂဲးကဆၫ့ ဆၧထူၭထၪ့ လျၭစ့ၭစီၩ့ဂဲး အခိးအတၩလဖၪ ကန့ဝ့ၫလကၭဘၪ လံၩအထုၪ့ဆ့ ကဆံၪ့ဖျ့ၪ ထၪ့ဆ့နီၪလီၫႉ