ပဂၪ့ခိၪချိၫ့ကဎံၪလၩထၪ့အဂး ဖီၪ့ဂုးထၬနဲၩ့ဎီၩ့ဆံၭ

ဘဲၫပဂၪ့ခိၪကကဲၪထၪ့ ဂၪ့ခိၪအဆံၫ့အဖျ့ၪအဂးဒဲ ကအီၪဂုးခၧၫ့လဆိၩၡၩအဂး မွဲၦခမျၧးၥံၪလဖၪထီးလူၬ အမူၩဒၩလီၫႉ ၥလိၪၥလံၬထၪ့ဝ့ၫဒၪဂၪ့ခိၪယီၩ ပကဘၪမၩဆံၫ့ဖျ့ၪထၪ့ဂီၩ့ အဂူၫဂၩလအီၪဘၪတၭ ဆၧလၧအမၩဂၭဂီၩ့ဂၭစၪထၪ့ဂၪ့ခိၪလဖၪနီၪ ပကဘၪဂၭဎ့ၭဂီၩ့ ပကဘၪမၩဆၧၩ့နီၪလီၫႉ ဆ့ၭလၩ့ယွၩဝ့ၫဒၪ ထံၫကၠီၪ့လဖၪ ဘဲၫလဖၭဘံၭဘၪအၥၭအဂး လိၫဝ့ၫလီၫႉ

ထံၫဆ့ၭလၩ့ယွၩအခၫ ဘၪထိးထၬဆၧမွဲဝ့ၫ ထံၫကၠီၪ့ႇ ပၫ့လဲၫ့ဖၧၩ့ ဆၧခွံၬၡိၬပလၭစတ့ၭအလုၫအလါ လဖၪနီၪ ပကဘၪမၩလၩ့မါခွံၬနီၪလီၫႉ ဆၧလၧပလၭစတ့ၭနီၪ ကဲၪထၪ့ဂၪ့ခိၪ အဆၧဘၪၥၪကၭနီၪလီၫႉ ၦၥိၩ့ထၪ့ပလၭစတ့ၭအၪထၪ့အကၠီၩ့ ထံၫဖၫ့ခိၪ ဖံၭဖၫ့ခိၪ ကျ့ၭဂၭဂီၩ့ထၪ့အ့ၬႉ အီၪဝ့ၫလၧ ပၫ့လဲၫ့ဖၧၩ့ ဆၧဖိၪဆၧဎါလဖၪ ထီးလၥံၫဘၪအဂး ထီးအဆၨၩလလၩ့မါဘၪအဂး ဆၧခွံၬၡိၬထၪ့ပလၭစတ့ၭနီၪ ပကဘၪဆုးဖီၪ့ဂုးဆၧၫ့ထၬနီၪလီၫႉ

ဂၪ့ခိၪချိၫ့နီၪ ဖ့ၪလၫ့ထးခိၪဖၭ ထံၫႇ ဖံၭႇ လံၩအထုၪ့အလးအကျဲၩ့ႇ ဆၧအၥၭမၧၫ့လဖၪ ထီးအလူၬ အီၪဝ့ၫန့ထီးဆိၩယၫႇ ၦခမျၧးဂဲၫအၪထၪ့လဖၪအဂးဒဲ ဂ့ၩဝ့ၫဒၪ ခိဆၧၩ့ချံၫ့လဖၪ နီၪလီၫႉလၧဂၪ့ခိၪချိၫ့ဖၫ့ခိၪယီၩ ဆၧချံၫ့မုၬၡူၪဘၩႇ အခိအချံၫ့ဎွ့ၪဎီၩ့ႇ ထံၫအဆံၪ့အဖျ့ၪဒဲ နဲၩ့ဎီၩ့အဂ့ၩလဖၪ တဲၩ့လၩ့ထၬဝ့ၫလါနၫ့ဂ့ၩ ၦခမျၧးလဖၪ အီၪအၪ့ဘၪဒၪအၥၭအကၠီၩ့ ဂၪ့ခိၪဖၭဒိၪယီၩ ဆၧဘၪထံၭဘၪနဲၪ့အၪမၬအဖၧၩ့ ဂဲၫအီၪမုၬထၪ့အ့ၬနီၪလီၫႉ  ဂၪ့ခိၪဖၭဒိၪယီၩ ချဲၩ့လၥ့ၪဘၪအၥိၭ ဂဲၫမၩၥ့ၪယၫထၪ့ဆၧလၧ ၦၡၩနၪၥ့ၪယီၫ ခိဆၧၫ့ချံၫ့အဆၧၫ့အထီလဖၪ မီၪ့ဎီၩ့ဘဲၫၥိၭခီၩခီၩအိၩ လၧၩ့အ့ၬနီၪလီၫႉ