ပကဘၪ ယိထွ့ၫပဒၩ့ ဂၪ့ခိၪချိၫ့ ဂဲၫလိၫထၪ့ဝ့ၫဒၪ

ပအီၪၥၭမၧၫ့ ဂၪ့ခိၪချိၫ့ယီၩ အီၪဝ့ၫအပိၫ့နီၪ အဖျိၫ့ဂီၩ့ ဝၩ့ဒၩ့လီး အီၪဝ့ၫ ၁၂၈၀၀ကံၫလိၫမံၫတၫနီၪလီၫႉ လၧဂၪ့ခိၪအဖၫ့ခိၪ ဖိၭဘံၭထၬအၥၭလၧ လံၩအထုၪ့ ကံၫလိၫမံၫတၫ ၁၀၀၀နီၪလီၫႉ လါနၫ့ဂ့ၩ လၧဂၪ့ခိၪအမ့ၬပၫ အဖၫ့ခိၪ အီၪဝ့ၫဒၪ ဖိၬဘိၬ ကံၫလိၫမံၫတၫ ၃၀ အဖၧၩ့ဖၧၩ့နီၪ လံၩအထုၪ့ ၉၉ယၩဒူၩ စီၩ့ဂဲးလဖၪ လဲၩမွံၩပၫဝ့ၫဒၪနီၪလီၫႉ စီၩ့ဂဲးလဖၪၥံၪနီၪ အီၭဆံၫဂၠ့ၫ ၂၁ယၩဒူၩႇ နဲၭထရိၫဂၠ့ၫ ၇၈ယၩဒူၩႇ အာဂွန် ၀ႉ၉ ယၩဒူၩႇ ကၫဘိၫ့ဒဲၫ့အီၭဆဲၭ ၀ႉ၀၃ယၩဒူၩ ဒဲ စီၩ့ဂဲးအဂူၫဂၩလဖၪ ၀ႉ၀၇ယၩဒူၩၥံၪ ပၫဝ့ၫဒၪဆုးဆုးနီၪလီၫႉ

လံၩအထုၪ့ယီၩ အ့ၪပထိၪထၧၫ့ဎီၩ့လၧ ဂၪ့ခိၪဖံၭစွါဘဲၫ ကဘၧၩ့ဝ့ၫဒၪအၪမၬနီၪလီၫႉ စံၭမၬချၭ ဂၪ့ခိၪနီၪကအီၪဖိၭဘိၭ ဖီၫၥၪကဖျိၪ့စွါဘဲၫ လံၩအထုၪ့နီၪ ကဒၧၩ့န့ ဖီၫၥၪအဖံၭဒံၭနီၪလီၫႉ လံၩအထုၪ့လၧအခၪ့ထံၭ ဘၪထဲၭဂၪ့ခိၪနီၪ ၦၡၩ ဆၧဖိၪဆၧဎါဒဲ ၥံၪ့ၥံၪလဖၪ အီၪၥၭမၧၫ့နီၪလီၫႉ

လၧလံၩအထုၪ့ဖၧၩ့ ဆၫလဖၫဒဲၫ့အီၭဆဲၭဒဲ နဲၭထရိၫဂၠ့ၫအီၭဆဲၭ ဒရၭအခူၪလဖၪဒဲ ဆၩ့ခူၪႇ ဒရၭအမူၭၥံၪ ပၫဝ့ၫဂဲၫထီၫ့ထၪ့အကၠီၩ့ လ့ၩအထုၪ့ၥလိၪၥလံၬ ဆုးကဲၪထၪ့စွါဘဲၫ လၧဂၪ့ခိၪချိၫ့ အီၪၥၭမၧၫ့ ဝ့ၫဒၪ ၦခမျၧးလဖၪ အီၪလၧခီၫၥွံၪခိၪ ထံၫကျၩ ဆၧဖိၪဆၧဎၬလဖၪႇ ၥံၪ့အထံၭလဖၪဒဲ နဲၩ့ဎီၩ့ကဂၭဂီၩ့ဂၭစၪထၪ့အကၠီၩ့ ဂၪ့ခိၪထံၫခးကိၭခး စဲၩ့ယၫ့ပကိၪ့ၥ့ၪလဖၪ ဖ့ၪလၫ့ထၬဆၧထုၪ့ၥုၪ့ထုၪ့ၥၭနီၪလီၫႉ လါနၫ့ဂ့ၩ ပဂၪ့ခိၪချိၫ့ယီၩ ကဆုးအီၪဂုးခၧၫ့အဆိၩဆိၩအဂး ပကဘၪယိထွ့ၫပဒၩ့တၭ ဆၧယိထွ့ၫဂၪ့ခိၪနဲၩ့ဎီၩ့ ဆၧမၩလဖၪ အရ့ၩဒိၪဝ့ၫတၡါဒဲ  လံၩအထုၪ့ၥလိၪၥလံၬကဲၪထၪ့ ၥၭမၧၫ့ဂၩ့ဎွံၫလးမ့ၪဆၫလဖၪ ဆၧၥိၩ့ထၪ့ဆၧနီၪ ပကဘၪမၩလၩ့ၡၩဂီၩ့ ဂၪ့ခိၪနဲၩ့ဎီၩ့ဘၪ ထံၭဆၫၡၩဝ့ၫ မုမ့ၬဒဲ လံၩအဂဲးဖၧၩ့ လျၭစ့ၭစီၩ့ဂဲးဆၧထုၭထၪ့ဆၧနီၪ ကဒိၪထၪ့ထီၫ့ထၪ့အဂး လိၫဝ့ၫဒၪနီၪလီၫႉ

စၭထၪ့လၧ လံၩၥလိၪၥလံၬထၪ့ဂီၩ့ ဆုးကဲၪ့ထၪ့ဝ့ၫဒၪ အဲၭစ့ၭ အၪ့ဎၬယိဆၧမၩလဖၪနီၪ ဂၪ့ခိၪ ထံၫခးလဖၪ ဖီၪ့ထၪ့ဖံၭထၪ့နီၪလီၫႉ