ဆၧမၩဆိၫ့ဂီၩ့ ဆၧခၪ့ထံၭခၪ့ဎၧၩ့လဖၪ - ၂

ဆၧပိၭဆၧလၫ့လနၩ့နၩ့နီၪ ဖိၬလိၬထၬဝ့ၫဒၪ ဆၧပိၭဆၧလၫ့လၧအန့လၧ ဖံၭဖၧၩ့နီၪလီၫႉ စံၭမၬချၭ - ၥၭထူႇ ကျဲၩ့တံၭဒဲ လိးၥွၫထီးနီၪလီၫႉ ဆၧပိၭဆၧလၫ့လဖၪယီၩ အ့ၪပၥိၩ့လူၬနီၪ ပၥိၩ့ထဲၩ့န့အ့ၬႉ ဆၧလၧကျဲၩ့တံၭနီၪ ဆၧဖိၭလိၬထၪ့ ဆၧပိၭဆၧလၫ့အမံၩ့မံၩ့အခၫ ၥိၩ့ဝ့ၫဒၪ ဖနံၬလီးနီၪလီၫႉ စံၭမၬချၭ - ပလၭစတ့ၭလဖၪႇ ဆၧမၩၥံၫၥံၭၥံၪ့ဎွံၪလဖၪ ၥိၩ့ထၪ့ ကျဲၩ့တံၭနီၪလီၫႉ   ကျဲၩ့တံၭလၧအအီၪအဆၧၫ့အထီဘဲၫယီၩ အ့ၪမွဲၦၡၩဆုးၥိၩ့ထၪ့ဘဲၫယီၩၥိၭစွါဘဲၫ ကျဲၩ့တံၭလဖၪ လခဲၫအနံၪ့ (၃၀)  ကလၩ့ၥံၭဝ့ၫဒၪနီၪလီၫႉ အခၪ့ထံၭခၪ့ဎၧၩ့ဂူၫဂၩမွဲဝ့ၫ ထၭဒဲ အလူၫမံၫနံၫယၫ့လဖၪ ကဂဲၫအၪထၪ့အလးအီၪဝ့ၫလီၫႉ လါနၫ့ဂ့ၩ ဆၧအခၪ့ထံၭခၪ့ဎၧၩ့လဖၪယီၩ ဆၧထူၭထၪ့ၥိၩ့အကၠီၩ့ ကဂဲၫလူၬထၪ့ကဆံၭဆံၭနီၪလီၫႉ

            ပၥိၩ့ထၪ့ထဲၩ့လန့ဘၪ ဆၧအခၪ့ထံၭခၪ့ဎၧၩ့လဖၪနးဆ့ ဆၧထူၭထၪ့ဆၧပိၭဆၧလၫ့ စဲၭဒူၭလဖၪအဂး ဖ့ၪလၫ့ဝ့ၫ စီၩ့ဂဲးလၧ အလိၫဝ့ၫဒၪနီၪလီၫႉ အၪဒၪဆၧနီၪ လိးၥွၫထီးႇ စီၩ့အွံၩဒဲ လိးဂၩ့ဒီၩ့လဖၪ မ့ၪဆၫလဖၪနီၪလီၫႉ ဆၧခၪ့ထံၭခၪ့ ဎၧၩ့လဖၪယီၩဆ့ ၦခမျၧးလဖၪ ထူၭထၪ့ၥိၩ့အၪအၪဂီဂီယူၭနီၪလီၫႉ ဆၧလဖၪၥံၪယီၩ  အ့ၪပဆုးၥိၩ့ထၪ့ဘဲၫယီၩၥိၭ စွါဘဲၫ လခဲၫ (၁၀) နံၪ့ လိးၥွၫထီးလဖၪ ကအီၪထးဒၪ ကဆံၭကခ့ၭနီၪလီၫႉ