ဆၧမၩဆိၫ့ဂီၩ့ ဆၧခၪ့ထံၭခၪ့ဎၧၩ့လဖၪ - ၁

ၦၡၩဎွ့ၩအၪနၭ ဆၧပိၭဆၧလၫ့အၪဒၪဆၧနီၪ ဖိၬလိၬထၬဝ့ၫဒၪ န့ဝ့ၫဒၪလၧ ဂၪ့ခိၪချိၫ့ ဖနံၬလီးလဖၪ န့ဝ့ၫဆၧပိၭဆၧလၫ့လဖၪနီၪလီၫႉ
စံၭမၬချၭ- လံၬဘျံၭလဖၪဒဲ ဆၧပိၭဆၧလၫ့အၪဒၪဆၧနီၪ ထူၭထၪ့ဝ့ၫဒၪလၧ ၥံၪ့အယၪနီၪလီၫႉမွဲန့ဝ့ၫ လၧၥံၪ့အယၪ ဆၧခၪ့ထံၭခၪ့ဎၧၩ့နီၪလီၫႉ လၧပဖ့ၬခူၥံၪ့ထံၭလဖၪအလး ပၥုၪ့လၩ့ထဲၩ့ အၥၫ့န့ဝ့ၫဒၪလီၫႉ
လါနၫ့ဂ့ၩ ကၫ့မနံၫလၧ ဖ့ၬခွံၬၥံၪ့ထံၭလဖၪ ဖ့ၬဝ့ၫဒၪအၪနၭမၬလ့ၬအကၠီၩ့ ဆၧလီၩ့ၥ့ၪလၩ့ထဲၩ့ လၧအလးခဲၫ့ မွဲလနၧၩ့လၧဘၪဝ့ၫတၭ ၥံၪ့လဖၪ ကဲၪထၪ့ ဆၧလၩ့ၡၩအခၪ့ထံၭခၪ့ဎၧၩ့နီၪလီၫႉ
လၧဆၧခိအလး စဲၪ့ထၪ့ဝ့ၫဒၪ ၥံၪ့လဖၪ အစၩ့ထံၫဂ့ၩဝ့ၫဒၪလီၫႉ ၥံၪ့လဖၪၥံၪနီၪ ၥိၩ့ထၪ့ဝ့ၫဒၪလၧ ဖိၬလိၬထၪ့ ဆၧၥုၪ့ဆၧဒီၩ့လဖၪႇ ဆၧပိၭဆၧလၫ့လဖၪနီၪလီၫႉ ဆၧပိၭဆၧလၫ့အဂူၫဂၩနးဆ့ မွဲၥိၩ့ထၪ့ဝ့ၫဆ့နီၪလီၫႉ လၧခးအ့ၩၡၩမုထၪ့ ဆၧဆၧၩ့ၥံၪ့ကျိၭလဖၪနီၪ အလူအဎွ့ၩဎိၩဒိၪဝ့ၫၥံၪ့လဖၪ န့ဝ့ၫဒၪအလးနီၪလီၫႉ
ၥံၪ့မုဖၭဒိၪလဖၪ ကဎိၩထၪ့အဂး ကဘၪခိၭ နံၪ့အယၩဘျဲၪနီၪလီၫႉ လါနၫ့ဂ့ၩ ဆၧဖ့ၬၥံၪ့ ကၫ့မနံၫလဖၪ ဖ့ၬခုဝ့ၫဒၪ အၪလၨၪဖျဲၪနၭလ့ၬအကၠီၩ့ ၥံၪ့အဆၨၩလနၩ့နၩ့ လၩ့ဘူၭကလၩ့မၬယူၭနီၪလီၫႉ ဆၧၥုၪ့လၩ့ထဲၩ့ၥံၪ့ အၪအၪဂီဂီႇ လမွဲဘၪ ဆၧပိၭဆၧလၫ့ဖိၭလိၬထၬဝ့ၫလၧၥံၪ့လဖၪ လၧပၥိၩ့ထၪ့ထဲၩ့ဘၪစွါဘဲၫ ၥံၪ့မုဖၭဒိၪလဖၪ မွဲဆုးအီၪကန့လၧၩ့အ့ၬ နီၪလီၫႉ