ဂၫ့လၪ - ၁

ဆၧလၧဂၫ့လၫနီၪ ဂဲၫမၧၫ့ထၪ့ဝ့ၫဒၪလၧ ပၫ့လဲၫထံၫထီၩ့ဝ့ၫဒၪအလးအကျဲၩ့လဖၪနီၪလီၫႉ လၧပထံၫထၪကျိၩ့ဖၧၩ့ယီၩ ပကဒၪဘၪ ဎံၫလၩဝ့ၫဒၪ ဂၫ့လၫအၪမၬဒဲ မွဲဘုၪ့အၥိၭ ဂၪ့လၫစဲၪ့ထၪ့ဝ့ၫဒၪအလးနီၪလီၫႉ အဝ့ၫၥံၪနီၪ အၪဒၪဆၧ မၧၫ့ထၪ့ဝ့ၫဒၪလၧ ဘံၩနဲၩ့ထံၭ ထံၫဖိၪနဲၩ့ထံၭၥံၪနီၪလီၫႉ

            ဆၧလၧဂၫ့လၫနီၪ အၪဒၪဆၧ ၦၡၩၥ့ၪယၫထၬလၧ ပဒၩ့ထၬ ဆၧခိ ဆၧဆၧၩ့အဂး ကၥိၭဂံၪ့အခိၪအဂးနီၪလီၫႉ  ဂၫ့လၫနီၪ ဂံၪ့အခိၪအဒီၪ့အဂး ဖံၫဖူၫၥံၪဂဲၫထဲၩ့ၥိၩ့ထၪ့ခီၫလၧ ဖျိၩ့ဖျိၩ့အိၩလါနၫ့ဂ့ၩ ၦၡၩၥိၩ့ထၪ့ဒၪဆၧဒံၭ ထီးမုဆၫကနံၩယီၩဒံၭနီၪလီၫႉ ဂၫ့လၧအအဲၪဒိၭထံၫဂၫ့လနၩ့နၩ့နီၪ ထိးဝ့ၫဒၪ ၥၧၫ့နံၪ့ လံနံၪ့ ၥံၭလအၪ့ လၧဂၭဂီၩ့ဘၪဒဲ လနၩ့နၩ့နီၪ ပကဒၪဘၪ ကနံၪ့အဖၧၩ့ ၥံၭအၪ့ အိၪလၩ့ကျၪလၩ့နီၪလီၫႉ ကဲၪထၪ့ဘဲၫယီၩၥိၭနီၪ မွဲလဘၪဎၬဘၪလၧ ဂၫ့လၫအခံအလဲၫ့ဒဲ ဘၪဎၬဒၪလၧ ၦၡၩဖ့ၬအခံၫ့မွဲဝ့ၫ ထံၫလီးလၫ့အထီဒဲ ထံၫၥံၫအထီအကၠီၩ့ ပၥ့ၪယၫဘၪလီၫႉ ၥံၭအၪ့ယီၫဝ့ၫဒၪဂၫ့လၪလဖၪနီၪ မွဲဖ့ၬဝ့ၫဒၪလၧ ထံၫလီးလၪ့အထီဒဲ ထိးဝ့ၫဒၪဂၫ့လၫလဖၪနီၪ မွဲၦၡၩဖ့ၬလၧ ထံၫၥံၫအထီအကၠီၩ့ လီၩဝ့ၫဒၪလီၫႉ

လၧတဝၫ့ၥံၪလဖၪ ဂၫ့ဘီၪ့ ဂၪ့အထဲၩ့လဖၪနီၪ မၩဎဲၪ့ထၬဝ့ၫဒၪဂီၩ့ အဝ့ၫၥံၪမၩၥံၪ့မုနီၪလီၫႉ လနၩ့နၩ့ ဂၪ့ထဲၩ့အၥံၪ့နီၪ ဒီၪ့ထၬအဂံၪ့ဖီၩ့မွဲဂ့ၩႇ ဂံၪ့အဒီၪ့မွဲဂ့ၩ ၥိၩ့ထၪ့ဝ့ၫဒၪနီၪလီၫႉ လကၭဒံၭဘၪ ဂၫ့လၫအဘၪ့နီၪ နၧၩ့မၧၫ့ဝ့ၫဒၪအကၠီၩ့ အ့ၪၦၡၩဘီၪ့မ့ၩထီၩ့အခၫ ၥိၩ့ထၪ့ဝ့ၫဒၪလၧ လၫအလးနီၪလီၫႉ အနီၭဘိၭ မ့ၩထီၩ့ယီၩ နၧၫ့မၧၫ့ဝ့ၫဒၪနၭလ့ၬအကၠီၩ့ လၩ့အၪ့ဝ့ၫဒၪအၪမၬနီၪလီၫႉ

ဂံၪ့လၧပၥိၭထၬအခိၪလၧဂၫ့လၪနီၪ ဘဲၫၥိၭ အၥိၭ ပဒၪလဎံၫဘၪလါနၫ့ဂ့ၩ မွဲနဲၪဖျီၪ့ထၪ့ ဆၧးဎံၫဆၧးလၩ ပလုၫလါထူၫရူၫကမံၩ့နီၪလီၫႉ ခီၫလၧ ၥိၭၥံၪ အူၭကၠိၭၥံၪလဖူၬလၪ့ဒံၭဘၪ နံၪ့ဆံၫလၩ့ယံၬဒံၭဒၪအိၩ ဂဲၫထဲၩ့ၥိၭထၪ့ထၬဝ့ၫဒၪ ခးပယၩ့ဂံၪ့ခိၪၥံၪနီၪလီၫႉ ထီးမုဆၫကနံၩယီၩဆ့ ခီၫၡၩအနိၫ့ဖၧၩ့ အရ့ၩဒိၪဝ့ၫဒၪ ၦၡၩအဆၧၥိၩ့အဂး အၪ့န့ထၪ့ထၬအလးဘဲၫဒံၭနီၪလီၫႉ