ဂၪ့ခိၪမၫဆမံၭအမ့ၭပၫ ဎိၩထၪ့ဝ့ၫနီၪ ဘဲၫဆၧပဒၩ့ထၬဆၧကအီၪထၪ့အဂး ဆၧဂဲၩဝၬထၪ့ဆၧအလူနီၪ ကိၭၡါထၪ့လါဆံၭ (၁)

 ထၧၫ့ဖုဝဲမုၪခွၫၥံၪဧ့ႇ ဂၪ့ခိၪလုၫလါအဆၧၫ့အထီ အၪ့လဲၩထၪ့အၥၭအကၠီၩ့ ဂၪ့ခိၪချိၫ့ခိထၪ့ဝ့ၫလဆံၭဒဲလဆံၭနီၪ ထီမုဆၫကနံၩယီၩ ၦဂၪ့ခိၪဖိၪၥံၪလဖၪဒဲ ဆၧဖိၪဆၧလံၩလဖၪႇ ဆၧထံၭဆၧဘီၩ့လဖၪ ဘၪထိးဝ့ၫနီၪလီၫႉ အခိအလးႇ အချံၪ့အလးဒဲ ဂၪ့ခိၪချိၫ့ထၧၫ့ဘံၪ့ယၫအလးနီၪ မွဲဘၪဒၪခီၩ့ဆၧၫ့ယၫဆၧနိၫ့ဆၧနၭအနၭထုၬအလးအကျဲၩ့လဖၪနီၪ ဘၪအၪ့ဎၬမၩလိၪထၪ့ လိၫယူၭနီၪလီၫႉ အနီၪမၬ ၦလၧအလိၫဝ့ၫဒၪဆၧမၩဆၧၩ့လဖၪၥံၪအဂး ကမၩဆၧၩ့ ဖ့ၪခိးဖ့ၪတၩထၪ့ ကန့နီၪလီၫႉ 

            ထၧၫ့ဖုဝဲမုၪခွၫၥံၪဧ့ႇ မပၧၩလဲၪ မၩဆၧၩ့ထၪ့ကန့လဲၪ ဂီၩ့နီၪ မပၧၩလဲၪ ဆၧမၩဆၧၩ့လိၫဝ့ၫလဲၪႉ ဂၪ့ခိၪချိၫ့ယီၩ အကၧၩ့ဒိၪထုၬ အီၪက့ၪထၬဝ့ၫ ထံၫခးနံၫမံၩ့ အ့ၪပကလီၩယိၩယိၩဖိၪစွါဘဲၫ ကဲၪဒိၪကဲၪမုထံၫခးဒဲ ၡၪ့ယါဝ့ၫထံၫခးနီၪလီၫႉ ဂၪ့ခိၪအလုၫအလါ အၪ့လဲၩထၪ့အၥၭအကၠီၩ့ ကဲၪထၪ့ဝ့ၫၥ့ၪ ဂၪ့ခိၪအလုၫအလါဆၧနိၫ့ဆၧနၭလဖၪနီၪ အီၪတဲၩ့ဝဲၩ့ပဒၩ့ထၬဆၧမွဲဂ့ၩ ကဲၪထၪ့ဝ့ၫဆၧနိၫ့ ဆၧနၭလဖၪနီၪ ကဒၪဆၧၫ့ယၫဝ့ၫဘဲၫၥ့ၪလဲၪအဂးဒဲ ကဎိၭဒီၪမၩဂ့ၩထၪ့ထဲၩ့ဝ့ၫဘဲၫၥ့ၪလဲၪအဂးမွဲဂ့ၩ လ့ၩထၪ့လ့ၩထီၫထၪ့ယူၭထံၫခး လဖၪဆ့ မွဲတၡါကဂဲၩဝၬထၪ့ဝ့ၫကန့ ထံၫထံၫဆၭဆၭ အၪနဲၪ့န့ လ့ၩထၪ့လ့ၩထီၫၥၫ့ ထံၫခးလဖၪနီၪလီၫႉ ဘၪန့လဲၪစွါဘဲၫ လ့ၩထၪ့လ့ၩထီၫ့ထၬဝဲၩ့ယူၭ ထံၫခးလဖၪနီၪ အကျိၪစ့ၩတၨၭ လၧၫ့ဎွ့ၩဝ့ၫ ဆၧကိၪဘၪကိၪ့ၥ့ၪဒဲ ဆၧၥ့ၪဆၧဘၪ လ့ၩထၪ့လ့ၩထီၫ့ဝ့ၫအကၠီၩ့နီၪလီၫႉ လ့ၩထၪ့လ့ၩထီၫၥၫ့ ထံၫခးလဖၪၥံၪအဂး ကမၩလၩ့ၡၩ ဂၪ့ခိၪလုၫလါအဆၧနိၫ့ဆၧနၭနီၪ ဆၧမၩဆၧၩ့လိၫဝ့ၫအၪမၬနီၪအကၠီၩ့ ဒၪထၪ့ဝ့ၫန့နီၪလီၫႉ

Add new comment

4 + 11 =