ဂၪ့ခိၪချိၫ့ဂဲၫခိထၪ့နီၪ လၧဆၧထုၪ့ၥုၪ့ထုၪ့ၥၭအဖၧၩ့ ဒၪဆၧၫ့ယၫပဒၩ့ဝ့ၫဒၪ ထံၫခး (၃) ခး

့ခီၫ့ၡၩအနိၪ့ ဂဲၫဒိၪထၪ့ထီၪ့ထၪ့အလးထံၫခးလနၩ့နၩ့နီၪ ခိးဂဲးဘၭထၪ့ထဲၩ့လၧ  ထံၫခး အခိဆၧၩ့ချံၪ့ အၪ့လဲၩ့ထၪ့အၥၭယီၩ ကပဒၩ့ထၪ့ဝ့ၫအဂးနီၪလီၫႉ ဆၧလၧဂၪ့ခိၪချိၫ့ဂဲၫခိထၪ့ယီၩ ပကဒၩ့ထၬကန့ အဂ့ၩထုၬဖၧၩ့ၥၭ ကမံၩ့နီၪမွဲ ဆၧၥုၪ့လၩ့ၥံၪ့ထံၭဒဲ ပကဘၪလီၩၥ့ၪယၫ ပခမျၧးၥံၪ လၧ ကယူၭယၪ့ပၭကၩထၪ့ နဲၩ့ဎီၩ့အဂဲးနီၪလီၫႉ မွဲဆၧဘဲၫနီၪ ထံၫခးလနၩ့နၩ့ လၧဆၧၥ့ၪယၫနၪၥ့ၪဎိၩဒိၪအဖၧၩ့ ဘဲၫဂၪ့ခိၪချိၫ့ခိထၪ့ယီၩ ကလၩ့ၡၩအဂး ကျ့ၭစၨၭ ထၪ့ကၠၭဝ့ၫနီၪလီၫႉ ဘဲၫယီၩ ယမိအဲၪဒိၭလီၩၥ့ၪယၫနၥံၪ ဂၪ့ခိၪချိၫ့ဂဲၫခိထၪ့ယီၩ ဒၪဎီၩ့ဆၧၫ့ယၫဝ့ၫလၧ ဆၧထုၪ့ၥုၪ့ ထုၪ့ၥၭအဖၧၩ့ ထံၫခးၥံၪအဂဲးနီၪလီၫႉ

မွဲယူၭ အဆိၪထုၬ ထံၫခးကခးနီၪမွဲ ခးအဲၭစလၫ့ နီၪလီၫႉ နဲၩ့ဎီၩ့အၪ့လဲၩထၪ့အၥၭနီၪ အီၪလၧဆၧထုၪ့လၩ့ၥၭ ထံၫခးဖၧၩ့နီၪ ခးအဲၭစလၫ့ ပၫဝ့ၫဒၪလီၫႉ လၧခဲၫ့ ထီလၧယၫ ၡၩၥၫ့ဘၪ့လဖၪ ဂၪ့ခိၪချိၫ့ဂဲၫခိထၪ့ယီၩ ဘဲၫလဘၪထိးဘၪဝ့ၫနၭနၭအဂး မၩထၪ့ ဆၧထံၫလၩ့ဒီၪလၩ့လဖၪယူၭနီၪလီၫႉ

          ခးအဲၭစလၫ့ ဘၪထွ့ၫလၧနဲၩ့ဎီၩ့ ဆၧဂဲၩဝၬနီၪ အဆၧနဲၪ အီၪထီးထီၩ့ ၉၃ႉ၅ နီၪလီၫႉ ခးအဲၭစလၫ့ပဒိၪ မၩထၪ့ဝ့ၫအရ့ၩဒိၪထုၬဆၧမၩနီၪ န့လၧစီၩ့ဂဲးအီၪ ဆၧအခိလဖၪ မၩလၩ့ၡၩဝ့ၫအၥိၭ နဲၩ့ဎီၩ့ကယံၫစီၪအဂး နီၪလီၫႉ လၧခဲၫ့ အရ့ၩဒိၪထုၬဆၧမၩကမံၩ့နီၪ မွဲ ကမၩလၩ့ၡၩထၪ့ ဆၧခွံၬၡိၬဆၧဘံၪၥိၭၥံၪလဖၪလၧ မၫဆမံၭဖၧၩ့နီၪလီၫႉ ဆၧခွံၬၡိၬဆၧဘံၪၥိၭ လၧမၫဆမံၭဖၧၩ့ယီၩ မၩလၩ့ၡၩထၪ့ဝ့ၫအကၠီၩ့  ထံၫအဆံၫ့အဖျ့ၪကန့ လကၭဒံၭဘၪ ဆၧဖိၪဆၧဎါၥံၪ အအီၪလၧ မၫဆမံၭဖၧၩ့လဖၪ မၩဆၧၩ့ဝ့ၫကန့နီၪလီၫႉ

လၧခဲၫ့ထံၫခးကခးနီၪမွဲ ခးဆွံဇလၫ့ နီၪလီၫႉ ခးဆွံဇလၫ့နီၪ ၂၀၁၈နံၪ့အဂး ဘၪထွ့ၫလၧ ဆၧယိထွ့ၫနဲၩ့ဎီၩ့ ဆၧဂဲၩဝၬအဖၧၩ့နီၪ အီၪလၧထံၫခးနံၫခးလခးအလး ဂီၩ့ အဆၧနဲၪ အီၪဝ့ၫ ၈၉ႉ၁ နီၪလီၫႉ လၧအီၪအလးနီၪ ကအီၪက့ၪဝ့ၫဆံၫ့ဆံၫ့ဖျ့ၪဖျ့ၪကန့အဂး မၩထၪ့ဝ့ၫဖၧၩ့ၥၭအမံၩ့မံၩ့အၥိၭ ဘဲၫကဆုးအီၪဂုးခၧၫ့ လဆိၩၡၩအဂး ဖီၪ့ထၪ့ဖံၭထၪ့ဝ့ၫနီၪလီၫႉ

          ခးဆွံဇလၫ့နီၪ ဘဲၫဆၧလ့ၩထၪ့လ့ၩထီၫ့အၥိၭ  ပၫထဲး အခၪ့ထံၭခၪ့ဎၧၩ့ ဘၪထွ့ၫလၧ ဆၧၥုၪ့ဆၧဒီၩ့ ဆၧမၩလဖၪၥံၪနးဆ့ ပၨၩ့ဆုၭထၬဝ့ၫလၧ ၥနိၫ့နီၪလီၫႉ ၥနိၫ့လၧခဲၫ့ကမံၩ့နီၪ ဘၪထွ့ၫလၧ ဆၧအၪ့ဆၫအၪ့ဎွ့ၩဖံၬလး ၥနိၫ့ လၧခဲၫ့ထုၬနီၪဘိၭမွဲ ဆၧၥုၪ့လၩ့ၥံၪ့ထံၭလဖၪဒဲ ပဒၩ့ထၬၥံၪ့ကျိၭလဖၪဂီၩ့ မၩလၩ့ၡၩထၪ့ လံၩအၥလိၪၥလံၬ နီၪလီၫႉ

ထံၫခးၥၧၫ့ခးအဖၧၩ့ လၧခဲၫ့ထုၬ ထံၫခးကခးနီၪ ခးကီၭစတၫ ရံကၫ နီၪလီၫႉ ခး ကီၭစတၫရံကၫ လၩ့ဆၫ့ဝ့ၫဒၪ ဆၧနဲၪ့ကမံၩ့နီၪမွဲ  လးဎံၫလၩ လဖၪနီၪလီၫႉ ခးကီၭစတၫရံကၫ ဘၪထွ့ၫလၧ နဲၩ့ဎီၩ့ဆၧဂဲၩဝၬ အဆၧနဲၪနီၪ အီၪ ၈၆ႉ၄ နီၪလီၫႉ ခးကီၭစတၫရံကၫနီၪ လံၩအထုၪ့ၥလိၪၥလံၬဒဲ ထံၫအထုၪ့ၥလိၪၥလံၬလဖၪ မၩလၩ့ၡၩဝ့ၫကန့အဂး ကျ့ၭစၨၭထၪ့ဝ့ၫဒၪလီၫႉ အထံၫခးဆါလဖၪၥံၪနးဆ့ ပဂၨၪထၪ့ထၬဝ့ၫ  ဘဲၫကမၩလၩ့ၡၩ ဆၧထုၬထၪ့ဖၫ့လိၫ့အံၫ့စီၩ့ဂဲးလဖၪ နီၪလီၫႉ ခးကီၭစတၫရံကၫ  အဆၧယိလါလၧခဲၫ့ကမံၩ့နီၪ အထံၫခးဆါဖိၪၥံၪ ဘဲၫကဂဲၫကဲၪထၪ့ လၧဂၪ့ခိၪချိၫ့ဖၧၩ့ယီၩ ၦလၧအမုၬလၩၥၭဎွံၪထုၬၦၡၩၥံၪ နီၪလီၫႉ

          ဂၪ့ခိၪချိၫ့ဂဲၫခိထၪ့နီၪ အီၪထိးဆၧၫ့ဝ့ၫလၧ ဆၧထုၪ့ၥုၪ့ထုၪ့ၥၭအဖၧၩ့ လၧခဲၫ့ ထံၫခးလဖၪၥံၪနီၪမွဲ ခးဆွီဒင် ႇ ခးနော်ဝေ၊ ခးမောရစ်ရှခးခိၪဒိၪ၊ ခးပြင်သစ်ံ၊ ခးသြစတြေးလျား၊ ခးကျူးဘား ံ၊ ခးကိုလံဘီယာဒဲ ခးဖင်လန် နီၪလီၫႉ