ဂဲၫအၪထၪ့ဝ့ၫဒၪ ဆၧၥၭလိၪၥၭလံၬလဖၪဒဲ ဆၧဘံၪၥိၭလဖၪ

ဆၧအၥၭမၧၫ့လဖၪ ထူၭထၪ့ ဆၧၥၭလိၪၥၭလံၬလဖၪဒဲ ဆၧဘံၪၥိၭလဖၪနီၪလီၫႉ ၥံၪ့ထံၭလဖၪ ဒဲဆၧဖိၪဆၧဎါလဖၪ ထူၭထၪ့ ဆၧဘံၪၥိၭဒဲ ဆၧၥၭလိၪၥၭလံၬလဖၪနီၪ နဲၩ့ဎီၩ့ ၥိၩ့ထၪ့ထဲၩ့နီၪလီၫႉ စံၭမၬချၭ- ဆၧဘံၪၥိၭၡၩခိၬဖိၪနီၪ ဘဲၭတံၩရံၩယၩလဖၪဒဲ ဆၧအၥၭမၧၫ့အဂူၫဂၩလဖၪ အၪ့ဝ့ၫဒၪနီၪလီၫႉ လါနၫ့ဂ့ၩ လၧဂၪ့ခိၪချိၫ့ဖၧၩ့ယီၩ ၦၡၩ (၅)  ဘံၫလံၫယၫ့နီၪ ထူၭထၪ့ ဆၧဘံၪၥိၭလဖၪ ဆၧၥၭလိၫၥၭလံၬအမံၩ့မံၩ့နီၪလီၫႉ မွဲဆၧဘဲၫနီၪ နဲၩ့ဎီၩ့ၥိၩ့ထၪ့ထဲၩ့လန့လၧၩ့ဘၪနီၪလီၫႉ ၦၡၩၥံၪလဖၪ ဒၫတုဆၧပိၭဆၧလၫ့အမံၩ့မံၩ့နီၪ ထူၭထၪ့ထၭဂီၩ့ဝဲၩ နဲၩ့ဎီၩ့လဖၪ ဘၪဆၧထီးထၬအမံၩ့မံၩ့နီၪလီၫႉ စံၭမၬချၭ - ၥံၪ့ဎွံၪအမံၩ့မံၩ့ႇ ၥံၪ့ဎွံၪလၧ ပဎွံၪဆၧထံၭဆၧဘီၩ့လဖၪ ပလၭစတ့ၭလဖၪနီၪ အဝ့ၫၥံၭလၩ့ဘျ့ၭ ဂၩ့ဂီၩ့ဂၭစၪလန့ဘၪလီၫႉ ဆၧပိၭဆၧလၫ့ၥံၪလဖၪယီၩ ၦခမျၧးၥံၪလဖၪအဂး မၩအ့ၪဝ့ၫ ဆၧအၪ့ဆၧအီၩၥံၪႇ ဆၧကီၩ့ဆၧၥိၭၥံၪဒဲ ဆၧပိၭဆၧလိၭလဖၪနီၪလီၫႉ လါနၫ့ဂ့ၩ ဆၧပိၭဆၧလၫ့လဖၪယီၩ ထူၭထၪ့ဝ့ၫဒၪအခၫ ဘၪၥၭလိၪၥၭလံၬထၪ့ ဂၪ့ခိၪနဲၩ့ဎီၩ့နီၪလီၫႉ ဆၧပိၭဆၧလၫ့ၥံၪလဖၪနီၪ ၥိၩ့ထၪ့ဝ့ၫဂီၩ့အခၫ ကဲၪထၪ့ ဆၧခွံၬၡိၬဆၧဘံၪၥိၭလဖၪနီၪလီၫႉ  ဆၧဘံၪၥိၭလဖၪၥံၪနီၪအကၠီၩ့ ကဲၪထၪ့ နဲၩ့ဎီၩ့ဆၧၥၭလိၪၥၭလံၬနီၪလီၫႉ